4 nyied 28 hauh, Aen Hoih Angqhoh Cunghvaz Daengx Guek Cungjgunghvei Laebbaenz 100 Hopbi Nem Byaujcangh Daengx Guek Lauzdung Mozfan Caeuq Bouxguhhong Senhcin youq Baekging banh. Baez hoih neix, Gvangjsih gungh miz 58 boux ndaej mingzdaeuz, ndawde daengx guek lauzdung mozfan 39 boux、daengx guek bouxguhhong senhcin 19 boux.

Bineix dwg bi byaujcangh daengx guek lauzdung mozfan caeuq bouxguhhong senhcin 5 bi baez, dwg guek raeuz baez daih 17 bingzsenj byaujcangh daengx guek lauzdung mozfan caeuq bouxguhhong senhcin. Swcigih Dangjveij、Cwngfuj yawjnaek hong bingzsenj doigawj daengx guek lauzdung mozfan caeuq bouxguhhong senhcin, ciuq bouhloh, dawzmaenh goenghai、goengbingz、goengcingq, hawj daihgya rox, ciepsouh ndawbiengz gamduk, ginggvaq baenz caengz baenz caengz senjleh, Gvangjsih gungh miz 58 boux ndaej aen cwngheuh daengx guek lauzdung mozfan、bouxguhhong senhcin.

Gvangjsih 58 boux ndaej byauj- cangh miz vunz gihgvanh swyez danhvei、vunz giyez、vunz itsienq caeuq ciennieb gisuz、bouxguhnaz doengh gij vunz neix. Gyoengqde mboujdan dwg boux maenhndei daibyauj gak hangz gak nieb, engq dwg bouxvunz senhcin 5 bi gvaqbae Gvangjsih ginghci sevei hwngfat miz okdaeuj de. Doengh gij bouxguhhong neix coengh aenbiengz doxbae ok goengrengz hung, langhbaij gij yienghndei caeuq dangrap boux- guhhong seizdaih moq.(Goz Yenginz)