4 nyied 25 hauh, Swcigih Caizcwngdingh lwnh vunzlai rox, Gvangjsih mboengqneix laebdaeb buedroengz gij ngaenzcienz roengz- goek hwnqguh giekdaej cunghyangh 19.11 ik maenz, yungh daeuj baujcang yihliuz、gyauyuz、suijli doengh gij aen gvaengx hanghmoeg hungnaek roengzgoek hwnqguh aeuyungh, coenghrengz Gvangjsih onjdingh roengzgoek demlai rengzlaeng. Ndaej daengz caizcwng coenghrengz, geiqdoh daih’it, daengx gih guding swhcanj roengzgoek（mbouj baugvat nungzhu） doengzbeij lai hwnj 5.4%.

Mboengqneix buedroengz gij ngaenzcienz roengzgoek hwnqguh giekdaej cunghyangh gujsuenq 19.11 ik maenz, cujyau haeujcoengh gvaengx baihlaj guh hanghmoeg: Haeujcoengh daengx aen fugsaeh veiswngh yihliuz yiengh ceiq ndei cienhangh 6.31 ik maenz, ciemq 33.02%; caemhyamq doihaeuj guh aen hanghmoeg Cunghsanh Dayoz Fusuz Daih’it Yihyen Gvangjsih Yihyen、Gvangjcouh Si Mehmbwk Lwgnyez Yihliuz Cunghsinh Liujcouh Yihyen、Yilinz Si Cunghyih Yihyen laeuzndeidauq doengh gij saeh neix, san deih san maenh aen muengx fuengzhoh gunghgung veiswngh, hawj gij bonjsaenh fugsaeh giekdaej sezsih yihliuz veiswngh Gvangjsih lai ak. Haeujcoengh aen gunghcwngz hwnqguh giekdaej sezsih gyauyuz ak guek cienhangh 5.01 ik maenz, ciemq 26.22%; haeujcoengh hwnqguh hag- dangz laeuzdozninz、laeuzcunghab、dieggiek caenguh lienhguh, gaijndei diegyouq dieghag lauxsae hagseng, canjnieb caeuq gyauyuz doxyungz guhndei gyauyuz boiqdauq giekdaej sezsih. Suijli suijyin cienhangh 5.23 ik maenz, ciemq 27.36%; yungh daeuj guh aen gunghcwngz ceihleix donh dah、cingjceih re raemxrongz baiz raemxrongz, caeuq hopheux aen gunghcwngz Gyauzbwzhaij Dezsanh- gangj gaep 20 fanh dunh hangzdau doengh gij hanghmoeg neix, hawj hong suijli re cai gemj cai ndaej raenhamq, cukmaenh fajciengz re raemxrongz, caemhcaiq gyavaiq hwnqguh rangh ginghci Dahyinh Bingzluz, doinyoengx diuz roen moq baihsae doeng haij gya ndei demndaej. Aeu hong lawh gouq cienhangh 2.56 ik maenz, ciemq 13.40%; cujyau haeujcoengh hangh- moeg aeu hong lawh gouq giekdaej sezsih baugvat roen lajmbanj、suijli daengj, hawj vunzlai ceiq noix miz hong guh.

(Huz Daiveij)