Vunzmbwk doq beuj song giz dieggvangq hawj song lwgnyez dong saw, de sim’angq raixcaix, gai saw cibhaj bi daeuj, caengz raen byawz cawx baenzlai saw.

Daxmeh Vangz Meijyen ndwn youq gizgyae, de ndwn din naet le youh maeuq roengzdaeuj, din maz le youh doeng byaij sae byaij, vunzmbwk biz doq gaet gvamaex doq singjgaeh dwk yawj bae, lau boux vunzmbwk neix siengj guh gijmaz saeh vaih. Vunzmbwk biz saemjyawj de byonghngoenz lo, mbouj ae mbouj o, roxnaeuz dwg vunzmwnh, vunzmwnh mbouj lau nit, buh raeuj mbouj miz lai geu. Daxmeh Vangz Meijyen gaenq rox vunzmbwk biz yawjsiuj de, de byaij bae gyae di.

“O, ra raen lo.” Liuz Fanghfangh hemq naeuz.

“Gijmaz?” Vangz Meijyen cam.

“Seiqdaih saw mizmingz Cungguek.” Liuz Fanghfangh naeuz, dwg hab cang, daejbauj dangqmaz, ngamq miz song dauq. Ngamjhab moix vunz ndaej dauq ndeu. Vunzmbwk biz naeuz:“Song dauq saw neix baij ndaej cib bi lo, sam bi gonq gou oet youq giz gex haenx.” Saw mizmingz seiqgyaiq hix ra ndaej hajcib lai bonj, song vunz ndawsim rimhoz, lumj gip ndaej gim nei, ngoenznaengz hwnz siengj ngoenz muengh ha!

Daxmeh Vangz Meijyen cam song lwgnyez, aeu gaeuq caengz? Song lwgnyez naengh youq gwnz namh henzsaw, youh naiq youh iek, gangj mbouj ok vah, Liuz Fanghfangh byoem deng hanh nem youq gwnz najbyak, naj song mbiengj hoengz lumj duj va ndeu, Vangz Meijyen noh hoengz bienq heu, songde caeuq daxmeh Vangz Meijyen haetromh caengz gwn haeux couh daeuj daengz gizneix.

“Geijlai ngaenz song dong saw neix?” Daxmeh Vangz Meijyen cam vunzmbwk biz.

Vunzmbwk biz fan dahau yawj de, Vangz Meijyen doq naeuz:“De dwg meh gou.”

Vunzmbwk biz miz di najnyed, daxmeh Vangz Meijyen cim de lumj duzmoumeh nei, hawj de mbouj cwxcaih.

“It fanh haj cien maenz.” Vunzmbwk biz naeuz.

“It fanh haj cien maenz?”Daxmeh Vangz Meijyen doq rax fwngz Liuz Fanghfangh, “deuz, mbouj aeu!”

Vunzmbwk biz naeuz:“Ciuq gyaqcienz gwnz saw mboujcaih gauhneix cienz.” Daxmeh Vangz Meijyen naeuz:“Gwnz saw gyaez sij geijlai byawz bae guenj? Bonj saw ndeu bonjcienz ngamq geij maenz, yaenq okdaeuj gai couh aeu geij cib maenz, dang baenz gim daeuj gai ma? Haemhneix mbouj miz haeux cawj caeuz lo， itdingh aeu cawx haeux gonq cijndaej!”

（25）