Haetromh, daengngoenz ciuq roengz ndaw yozyau daeuj, seiqlengq ronghsagsag.

Gyoengq hagseng boux riengz boux byaij haeuj yozyau, miz riu miz ciengq, saetsaet diuqdiuq angq lumj bang rwi daeh va nei.

Vangz yaucangj naengh youq doiqnaj dennauj, cingq naemj yaepciuq haihoih yaek baenzlawz gangj vah.

Ngoenzneix dwg singgeiz ngux, yozyau haihoih son gak boux lauxsae baenzlawz sonsaw, baenzlawz guhvunz, Vangz yaucangj aeu youq gwnz hoih gangj vah.

“Gou ra yaucangj! Gou ra yaucangj!”Vangz yaucangj fwt dingqnyi bakdou yozyau miz vunz hemqcaca. De lauheiq miz vunz daeuj nauhsaeh, couh ganjgip buet okbae lo.

Bakdou yozyau, miz boux mehmbwk ndeu, mehmbwk neix samcib lai bi, daenj geu vinj hau ndeu, aek foeg noh youh maeq, byoemgyaeuj raezrangh youh fonxfidfid.

Mehmbwk fatheiq fofo, cap din vid gen, caeuq boux hendou doxdingj laekgaek, naemj cung haeuj bakdou daeuj.

Vangz yaucangj byaij daengz henz mehmbwk cam de naeuz:“Dahnuengx, mwngz miz gijmaz saeh?”

Mehmbwk fatheiq coh yaucangj naeuz:“Gvan gou baihrog miz lwgsau lo, lij miz boux lwgndai ndeu dem, hix youq aen yozyau mwngz doegsaw!”

Yaucangj dingqnyi le gig doeksaet, aen saeh neix danghnaeuz dwg caen, couh hoj gangj lo, aen mingzsing yozyau couh vaih lo.

“Dahnuengx, miz saeh couh haeuj ranzbanhgoeng bae gangj ba.” Yaucangj ganjgip heuh mehmbwk haenx haeuj yozyau daeuj.

“Gvan gou heuh Lij Vwnz.” Mehmbwk doq byaij haeuj ndaw ranzbanhgoeng doq gangj coh yaucangj, “haetneix de ciep aen denva ndeu le couh muengzfob muengzfw okbae lo, muengz dwk aen soujgih lij lumz mbouj dawz bae.”

“De muengz bae guh maz saeh a?” Yaucangj ganjgip cam.

Miz vunz fat saenqsik hawj de naeuz:“Boh, gou dungxin yaek dai lo, haetneix mbouj ndaej bae yozyau doegsaw lo.” Mwngz yawj, danghnaeuz de baihrog mbouj miz lwgsau, yienghlawz miz boux lwgnyez heuh de guh boh?

Vangz yaucangj hozndat ringring, ngeix daengz gienh saeh neix danghnaeuz dwg caen, baenzneix Lij lauxsae baihgya lo, gaiq noh vaih daengx banz, lij vaih aen mingzdangz yozyau dem.

“Bae, raeuz bae caeuq Lij lauxsae doiqbak cijndaej.” Yaucangj gangj liux couh caeuq mehmbwk doengzcaez bae gyausiz ra Lij lauxsae.

“Lauxsae bae ra boux lwg de gvaq lo, haha!” Hagseng doq riu doq doiq yaucangj naeuz. Mehmbwk dingqnyi le ndaenq dwk naj bienq fonx caiq bienq heu bae, haeb heuj ringring, gangj vah mbouj ok bak.

“Doxliz! Gou aeu caeuq de doxliz!” Gvaq yaep ndeu, mehmbwk cij ndaej caenx ok coenz vah neix.

Vangz yaucangj hoz raeng lumj hoz duzvaiz nei naeuz:“Dahnuengx, mwngz mbouj yungh heiq, gou itdingh vih mwngz guhcawj! Raeuz bae ra raen bouxvunz de gonq!”

Lij Vwnz dwg gauhgiz lauxsae aen yozyau neix. Ciengzseiz hwnj dangz ndei, hagseng maij dingq, hix maij caeuq de gangjgoj guhcaemz, lumj baengzyoux nei.

Haetneix Lij Vwnz sou daengz siusik, hagseng Lij Linz naeuz dungxin haenq lai, mbouj ndaej daeuj hagdangz, Lij lauxsae couh muengzfoedfoed buet bae laeng Lij Linz, aemq Lij Linz bae yihyen genjcaz.

“Lij lauxsae!” Lij Vwnz ngamq gyau ngaenzyw liux, couh dingqnyi miz vunz heuh de, de nyeux gyaeuj baez yawj, raen Vangz yaucangj naj mong lumj daeuh nei byaijcoh de, mehyah Lij Vwnz byaij riengz baihlaeng, yawjraen Lij Vwnz le couh lumj duz gukmeh fatheiq, bungz daengz dangqnaj Lij Vwnz bae, gingz fwngz lumj cauj duzyiuh nei, vix haeuj najbyak Lij Vwnz bae, aj bak lumj aen gamj laeg, mbouj faen ndaem hoengz hau heu, couh byej(ndaq) hwnjdaeuj:“Ndaek ma bag neix! Muenz gou youq baihrog caeuq mehsau lawz dox- gyangh, lij miz ndaek lwgndai dem! Yaemgoeng sonj lo, byaj mbouj rox bag mwngz lo! Bae! Doxliz! Gou mbouj naemj caeuq mwngz gvaqciuh lo!”

Lij Vwnz lumj haeuj ndaw mok bae nei, mbouj rox dwg gijmaz saeh.

Seizneix cingqdwg seiz roengz- ban, ndaw yihyen vunz byaij bae byaij dauq, dingqnyi miz vunz doxndaq, haujlai vunz couh humx gvaqdaeuj yawj dwg gijmaz saeh. Lij Vwnz engqgya raen najcik lo, maek cam mehyah de dwg gijmaz saeh.

“Mwngz gag yawj!” Mehyah gingz aen soujgih daengz dangqnaj Lij Vwnz naeuz:“De vih gijmaz heuh mwngz guh boh? Ngoenzneix mwngz aeu gangj cingcuj!”

“O! Gou laihnaeuz gijmaz daihsaeh! Laxlawz dwg di neix.” Lij Vwnz baez yawj soujgih, daej riu mbouj dwg.

Mwngz dingq gou gangj gonq. Lij Vwnz doiq mehyah naeuz:“Boux hagseng neix dwg lwggyax, boh de bingh dai, meh de mbouj rox deuzbae gizlawz, de youq hagdangz ngoenzngoenz cungj mbouj gangj vah.” Miz ngoenz ndeu, gou hwnj dangz 《Boh Gou》, de raiz geij cih saw hawj gou:“Lauxsae, gou heuh mwngz guh boh ndaej lwi?” Gou gig doeksaet, umj de haeuj ndaw rungj daeuj dapwngq de:“Daj ngoenzneix doxbae, gou couhdwg boh mwngz lo!” Gvaqlaeng le, gyoengq hagseng cungj maij riengz de heuh gou guh “lauxsae boh” lo.

Mehyah Lij Vwnz dingqnyi le, naj cikee, lumjnaeuz yaek ra congh ndonj roengz ndaw namh bae, yaeng’yaeng byaij deuz lo.

Seizneix, Lij Linz byaij gvaqdaeuj, beng cimqbuh mehyah Lij Vwnz naeuz:“Meh，mwngz gaej bae.”

Mehyah Lij Vwnz baenq ndang dauqlaeng, ndaetndaet dwk got Lij Linz haeuj rungj bae.