Cij ndaejnyi ndaw denva cienz daeuj sing daej, gyoengq beixnuengx Laujliuz boux riengz boux naeuz:“Gou hawj song bak”“Gou hawj song bak”……

Cinz lauxbanj gikdoengh dwk naeuz:“Cihciz lwgnyez hagsib, gou gienhawj song cien.”

Vangz Genhuj naeuz:“Lwgnyez gyaez yawj saw, haengjheiq, gou hawj song bak hajcib.”

Vangz Gencaiz naeuz:“Gou gienhawj sam bak, lwgnyez gou hix gyaez yawj saw, baezlaeng ngoenz singhgiz bae laeng Gocingh yawj saw.”

Gyoengq vunzmbanj hix caez naeuz moix vunz gienhawj song bak, bouxboux dawz soujgih doenggvaq veizsin fat hawj Vangz Gencingh……

（Cibgouj）

Nanzningz daihlaeuz bued gai saw ndawde, ciencien fanhfanh bonj saw dong youq gwnz namh, gwnz gyaqsaw hix oet rim liux, bonj dem bonj cek dem cek, miz na miz mbang, saek rongh yiengh lai, lumj ndaw ndoengfaex, faex hung faex iq, gogeq gooiq daengjsoh. Vangz Meijyen caeuq Liuz Fanghfangh lumj song duz roeg nei baebae dauqdauq mbin youq gofaex deihdwddwd ndawde. Neix dwg seiqgyaiq daegbied geizheih haenx, neix dwg dieg caenleix fatmingz, neix dwg dieg rengzcingq riuzok.

Boux vunzmbwk ndeu samcib lai bi, saeknoh loq hau, naj ngveihgva, byoem cik lai raez, cagheu cug byoem bog ndeu venj youq baihlaeng. De dinghdingh ndwn youq henz gyaqsaw. Boux vunzmbwk seiqcib lai bi ndeu, bizbwdbwd, boux vunzmbwk neix ngamq daenj geu buh na di ndeu, seizneix dienheiq baenzneix nit, dwg mbouj miz cienz cawx buhmoq, din daenj haizbaengz haenx moq di, boux vunzmbwk neix itdingh dwg bouxndaemnaz, daj lajmbanj daeuj, doeng byaij sae byaij byaij daengz neix, caengz raen saw hauhneix lai, yawj ngaez lo.

“Mwngz ndwn gvaq baihhaenx bae.” Vunzmbwk biz nitsaengsaeng naeuz.

Vunzmbwk naj ngveihgva vaez- nanz raixcaix, lumj guhcaeg deng vunz caenh deuz.

Song dah lwgnyez lumj song duz rwi yaeb va, neix nyaeb song bonj haenx dawz sam cek, vunzmbwk biz raen songde cawx saw lai, couh vix giz dieghoengq cuengq youq haenx, saw yied genj yied lai, vunzmbwk biz angq youq ndawsim, song mbiengj naj biz lumj song gaiq nohbiz, aenvih biz, lwgda bienq iq, bwn’gyaeuj fei lumj vunzsai, giepnoix miz gij gyaeundei vunzmbwk, dauq lumj boux vunzsai ndeu.

De cam:“Song boux siujbaengz- youx, sou dwg gag cawx roxnaeuz doxcaeuq cawx?”

Vangz Meijyen naeuz:“Gag boux gag cawx.”

（24）