（ciep daih 3662 geiz）

Gvan gou hai gyaq mozdozceh haenx ndaw rumz bae ndaw fwn ma, ngoenz singhgiz hix ciuqlaeh bae hwnjban. Mizseiz dauqma le, miz aen hoih laemzseiz aeu hai, gyanghaet 5 diemj cung couh hai gyaq mozdozceh de cung ok dou ranz lo, miz haujlai baez lij doek fwn naek, daengx ranz vunz cungj mbouj gamj caiq ninz lo, hoeng de daengz mbiengj haenx le, cungj dwg lumz dwk denva dauqma bauq bingzan. Dahlwg youq ranzmbanj doeg cuhcungh, gvan gou ciengzseiz youq lajmbanj haenx youq, mbouj ndaej ma hagdangz de youq, hix mbouj miz seizgan cawj hawj dahlwg gwn.

Bi 2020 gvaq cieng，ngamq gvaq co’ngeih, de couh rib ndei buhvaq, gangj aeu daezgonq dauqbae guhhong, youq seiz sinhgvan feiyenz, gunghcoz duiyenz caeuq cunh ganbu caez guh doih. Gou gaem song aen goujcau ciq daeuj haenx, daengq de okdou daiq ndei. Ok dou seiz, mbouj ndaej mbouj yinx deuz daeglwg, mboujne couh aeu laihnyaq lo. Ngoenz haemhndaep daengz banringz ngamq ma, gvaq co- ngeih couh hwnjban. Lwgnyez dang- yienz mbouj nyienh’eiq la. Moix baez dingqnyi rog dou sing mozdozceh yiengj, daeglwg cungj dwg fengfeng buet okbae, youh saetmuengh naeuz：“Mbouj dwg daxboh! Dwg daeggo ranznden.” Cocaet, Daihhaw Cin miz vunz baenz bingh, gangj dwg aen ranz vunz ndeu daj Vujhan dauqma. Gou gipgip muengzmuengz daj ndaw moeg gyuk dahlwg hwnjdaeuj, de sikhaek naeuz:“Dwk denva ha！Daxboh mbouj dwg daiq goujcau mwngz ciq ma haenx ma? Haenx mbouj dwg yihyung, re mbouj ndaej binghdoeg！” Dou ganjgip dwk denva gvaqbae…… Itcig daengz banngaiz, cij dwk ndaej doeng. De cij genjdanh gangj geij coenz:“Mbouj yungh yousim gou! Gou caeuq beixnuengx Daihhaw Cin youq itheij! Seizneix ceiq youqgaenj dwg mbouj hawj gyoengqde ok haw daeuj luenh langq！” Dou lij caengz cam de swhgeij miz yihyung goujcau lwi? Moix ngoenz cungj aeu guh gijmaz hong? De mbiengj haenx couh gaep denva lo. Aen cieng neix dou gwn ninz mbouj onj！Itcig gvaqbae haujlai ngoenz, rog dou ranz sawqmwh yiengj hwnj sing mozdozceh, dahlwg iet gyaeuj ok rog conghcueng, sing hung hemq:“Angqcoux daxboh dauqma ranz！” Raq rumz ityiengh buet daengz suenbyaek, gyuk daegnuengx dauqma, youq gyae couh naeuz:“Daegnuengx, boux haenx dwg bouxlawz? Mwngz lij roxnaj lwi？” De daengx ndang naiqnuek, youq rog duet roengz buhraez caeuq doiqhaiz, cek aen mauh ancienz roengzdaeuj, byoemgyaeuj raez haujlai lo. Naeuz dwg yizcingz daegdingh dauqma ranz daet byoemgyaeuj. Yawj bae, byoemgyaeuj de youh hau youh lai lo, gou siengj gangj vah ndaw hoz youh ndwnj roengz dungx lo. De mingzbeg aen sim gou, riu dwk naeuz:“40 bi saeh nyapsim lai, song bi neix gou bae fuzbinz, ma hagdangz raen doengh boux doengzsaeh hix byoem hau rim gyaeuj lo! Gou gaenq 40 bi gvaq lo, mbouj youqgaenj la！”

Cuengq sujgyaj ngoenz gonq, hagdangz dahlwg aeu hai gyahcangjvei, de caeuxcaeux couh dapwngq lo. Daengz haihoih ngoenz- haenx, gou sim’onj youq hagdangz gaij gienj. Gaij sat gaenq daengz 11 diemj lai lo, gou nyaenx mbouj ndaej dwk denva, de cix naeuz aen hoih fuzbinz ngamq sat, de cingq buet okdaeuj hai gyaq ci ne! Gou gipmuengz hai mozdozceh coh hagdangz dahlwg, buet hwnj sam laeuz, gyahcangjvei gaenq sat lo. Dahlwg miz di siengsim:“Ngoenzneix gou baenz boux cienmonz ingjsiengq lo！Gou gig mbouj yungzheih miz gihvei youq dangqnaj doengzhag saiq daxboh gou baez ndeu, de seizneix lij caengz raen aen ngaeuz！” Daxboh hanh lae hanh roenx ganj daeuj seiz, cij dwg mbouj guh sing bang gou buen doxgaiq……

Ngoenzneix ngoenz singhgiz, de lij gangj gij saeh bae bang ranz bouxgungz baet ranz, gou nyaeuq najbyak naeuz:“Youq ranz cungj mbouj raen mwngz gaem gvaq sauqbaet ne！” De lij miz leix naeuz:“Neix dwg cwngci vwndiz, caeuq ndaw ranz mbouj ityiengh.” Cingq gangj dwk, de lienz caeuz cungj goq mbouj ndaej gwn, couh deng hemq dauqbae guhhong lo.

Lij naeuz gou miz “lwgfwngz swnzdungh” ne, roqroq genbanz, roq ndaej saedcaih daiq menh lo, aen goj de couh camhseiz sij daengz gizneix ba, gou aeu bae gyuk daeglwg ninz lo.（2 sat）