Haj、Dingzlai sanq youq ndawbiengz, dingzlai mbouj rox bouxlawz dwg bouxsij bouxcau

Sawgeq cihsaw minzcuz vunz noix Guengjsae riengz vunz youq gak dieg riuzcienz, miz gij daegdiemj mbangjdi doxcomz、dingzlai faensanq, couhdwg mbangj noix comz souyo youq gak gaep duzsuhgvanj、bozvuzgvanj、gohyenz gihgou doengh aen danhvei neix, dingzlai faensanq yo youq ndawbiengz gak minzcuz vunz noix, cujyau dwg bouxvunz ndaw mbanj gak minzcuz vunz noix (lumjbaenz goengmo、goengsae、goengdauh、canghfwen、gak loih bouxcienzswnj minzcuz vunz noix caeuq bouxgyaezmaij) souyo. Daj aen gvanj souyo ndaw dangjan daeuj yawj, gak minzcuz、vwnzboz、duzsuhgvanj、gauhyau sou sawgeq minzcuz vunz noix Guengjsae gyawj 1.5 fanh cek (gienh). Ndawde, Swcigih Duzsuhgvanj souyo 1488 cek(gienh), Cunghgoz Minzcuz Duzsuhgvanj souyo 250 cek (gienh), Gvangjsih Saujsu Minzcuz Gujciz Baujhu Yenzgiu Cunghsinh souyo 1.2 fanh cek(gienh), Cunghyangh Minzcuz Dayoz Bozvuz- gvanj souyo 425 cek(gienh), Gvangjsih Minzcuz Bozvuzgvanj souyo 200 cek(gienh) daengj. Daj ndawbiengz sanq yo daeuj yawj, gaengawq Gvangjsih Saujsu Minzcuz Gujciz Baujhu Yenzgiu Cunghsinh daj 2014-2016 nienz cujciz cazyawj sawgeq minzcuz vunznoix daengx gih, sam bi ndawde gungh cazyawj caemhcaiq daenggeiq ndawbiengz sanq yo gak loih sawgeq minzcuz vunz noix 39678 cek(gienh). Aenvih cujyau comz youq Namzningz、Liujcouh、Laizbinh、Baksaek、Hozciz、Cungzcoj roek aen si vunz Bouxcuengh comzyouq haenx cazyawj, mbouj ndaej caz doh daengx gih, dingzlai si、yen、yanghcin、mbanj gyok caz mbouj daengz. Vihneix, duenhdingh dangq- naj gak loih sawgeq minzcuz vunz noix Guengjsae sanq yo youq ndawbiengz ceiq noix miz 10 fanh cek(gienh).

Gij gisuz yaenq saw gvangqlangh doihengz, sawj yienghsik sawgeq cugbouh dinghyiengh, moix cungj bonj gaekyaenq cungj miz biensaw daejlaeh、cohsaw、moegloeg、si、baz、gienjbaez daengj gveihfan. Hoeng sawgeq cihsaw minzcuz vunz noix, mboujlwnh dwg ndaw gvanj souyo daenggeiq youq ndaw dangjan, roxnaeuz dwg sanq yo youq ndawbiengz, cix mbouj miz daejlaeh gezgou gveihfan, giepnoix ceksaw gak cungj yausu, lumjbaenz ca mbouj lai cungj dwg mbouj miz bouxsij roxnaeuz bouxbien, mizmbangj engqlij cohsaw、bouxcausij hix mbouj miz. Daj neix hix yawj ok bouxyungh、bouxcienzswnj sawgeq cihsaw minzcuz vunz noix cungj dwg doenghboux vunz bingzciengz, gyoengqde caeuq bouxcausij、bouxsouyo ciennieb mbouj doengz, ndigah ciengzciengz cij gaengawq swhgeij yawj ndaej daengz roxnaeuz ngoenznaengz aeuyungh daeuj causij、cienzswnj, miz gij goengyungh gig saedcaih, mbouj haeujsim gij banjbonj gyaciz caeuq lizsij gyaciz de.