Guek raeuz dwg dieg seng mbawcaz, hix dwg dieg cauh vwnzva caz. Ciuq gaujcingq, gij hongsaeh mbawcaz miz cihsaw geiqloeg haenx gaenq miz song cien lai bi lizsij lo. Heiqmbaetcaz dwg caz vwnzva ndawde duj va lwenqda ndeu, de dwg vunz guh hongsaeh caz le gag cauh baenz ndaej riuz roengzdaeuj, yungzhab diuq foux、 ciengq heiq doengh gij yisuz yenzsu neix, dwg cungj biujyienj vunz ndawbiengz gig gyaezmaij ndeu. De youq ranghdieg Gyanghnanz caeuq Lingjnanz mbangj swngj gih gig riuzhengz. De cungjloih gig lai, lumj fuk veh caenliklik gak dieg, moix cungj cungj gig miz deihfueng daegsaek. Youq Gvangjsih, Nanzningz Yunghningz、Gveilinz、Fangzcwngzgangj、Hocouh Bazbu、Yilinz Bozbwz daengj dieg cungj miz heiqmbaetcaz. Gyoengq heiq de yungzhab dangdieg fungsug, yienjok gij daegsaek deihfueng, gij biujyienj de youh angq youh sengdoengh, vunzlai haengj dangqmaz.

Nanzningz dwg gizdieg lajmbwn ceiq gyaez eu fwen, Yunghningz dieg youq baih doengnamz Nanzningz, gizneix cienzswnj vwnzva ciengq heiq hix gig fungfouq. Yunghningz heiqmbaetcaz Bouxcuengh、 Yunghningz bet yaem Bouxcuengh doengh gijneix deng vunz senj dieg、 vwnzva doxgyau daengj yingjyangj, cugciemh bienqbaenz cungj heiq gig miz daegsaek dangdieg, gyoengqde dwg gij heiq vwnzva yungzhab yawj ndaej raen haenx.

Ciuq cienznaeuz, Mingzdai geizbyai Cinghdai geiznduj, Yunghningz Nazlouz Cin Nazliengz Cunh Bonazmungz aenvih diegnamh oembiz, mbwn raeuj rumz swnh, yinx mbouj noix minzcuz senj daeuj neix youq. Bouxgun singq Ningz daj Guengjdoeng senj daeuj, caeuq Bouxcuengh singq Dwngz daj Nanzningz Si Hinghningz Gih Hajdangz Cin senj daeuj haenx doengzcaemh youq neix youq, hawj Heiqmbaetcaz Bouxcuengh Yunghningz cungj vwnzva Lingjnanz daegbied neix ndaej sengbaenz.

Bonjheiq Heiqmbaetcaz Bouxcuengh Yunghningz ciengq haenx cungj dwg gaengawq beksingq gwndaenj daeuj raiz, aeu heiq daeuj gangj ok vunz Bouxcuengh mbouj hawj apbik、yaek aeu coux haq gag guhcawj、gouz aeu gwn van youq ndei vuenyungz gvaq saedceij, doiq coihawj vunzlai gaenxguh caux gyaranz miz goengrengz youqgaenj. 2010 nienz, Heiqmbaetcaz Bouxcuengh baengh gij ndeiraeuh daegbied de, ndaej lied haeuj aen mingzloeg feihvuzciz vwnzva yizcanj daibyaujsing hanghmoeg gaep swcigih buek daihsam, baenz gij dijbauj minzcuz vwnzva.

Yunghningz Gih Nazlouz Cin Nazliengz Cunh Bonazmungz dwg diegdeih henhoh、cienzswnj Heiqmbaetcaz Bouxcuengh. Cungj heiq neix vunz dangdieg cibfaen maij, gyoengqde gag rib ngaenz laebguh heiqdonz heiqmbaetcaz, gag biensij bonjheiq、nda daiz baizlienh, miz vunz cingj bae yienjheiq le lij ciengzciengz bae gaenhgyawj yienh- gih yanghcin haeuj mbanj bae yienj.

Heiqmbaetcaz Bouxcuengh Yunghningz biuj- yienj dwg ciengq go diuq foux guhcawj, lij gig haengj hagsib mbaet aeu heiq gizwnq gij ndei de, gij ndei de gij fwen ndei diegwnq gyoengqde cungj gig gyaez dawz daeuj yungzhab biensij. Gij fwenbaiz de lai cungj lai yiengh, saekseiz sekrwenz sisi, saekseiz ciengq vaiq vuedbued, miz fwengaicaz、fwenhoengzva、fwenbouxsai、fwenseiqbingz daengj 50 lai cungj ciengqfap.

Boux daibyauj cienzswnj Heiqmbaetcaz Bouxcuengh、boux donzcangj Heiqdonz Heiqmbaetcaz Nazmungz Dwngz Swhdui naeuz:“Danghnaeuz youq ndaw mbanj biujyienj, dou couh aeu Vahcuengh ndaw mbanj daeuj ciengq, vunz- mbanj cungj rox dingq. Bae gizwnq biujyienj ne, dingzlai dwg aeu Begvah ciengq, saekseiz hix aeu Vahgveiliuj ciengq.”

Gij heiqmoeg Heiqmbaetcaz Bouxcuengh Yunghningz dingzlai dwg heiq cienzdoengj, aeu gij gojgaeq ndawbiengz ndeidingq haenx guh maesienq, doenggvaq fwenbaiz mbaetcaz daeuj ciengq, dwg heiqangq、heiqnauh lai, haeuj loih “heiq sam siuj”, couhdwg siujseng、siujdan、siujcouj, hix heuhguh “ban sam gak”.

“Dou baeznaengz yienj Heiqmbaetcaz Bouxcuengh, neiyungz dwg gangj vunz biengz fanjdoiq funghgen maezsaenq, ngah aeu coux haq gag guhcawj, haemq depgaenh vunz raeuz gvaq ndwenngoenz, vunzlai gig maij.”Dwngz Swhdui naeuz.

Heiqmbaetcaz Bouxcuengh Yunghningz gij yozgi buenx roq buenx danz haenx gig lai, aeu gij yozgi roq guhcawj, bauhamz aen laz、 aen gyong、 aen caz、 aen cemqcemq、 aen moegnyawz daengj cib lai cungj, lai cungj yozgi roq danz yiengjhunghung, gig nauhyied. Linghvaih lij aeu loxlez、aen dig daengj daeuj boq dem, hawj biujyienj gig miz yinhfeih. Bouxyienj ndaw fwngz dawz beizva、gaenfwngz、diuzbien doengh gij doxgaiq neix vadvwdvwd, doxboiq doxhab, youq gwnz daiz doq ciengq doq diuq, yienj ndaej caenlili.

Gij buhheiq gyoengqde dwg gaengawq yienj gij gaksaek ndaw heiq daeuj dapboiq, yienj gijmaz gaksaek couh boiq gijmaz buh. Gyoengqde lij rox yawj boux yienj beizsingq daegdiemj daeuj faenboiq gaksaek, hawj boux yienjheiq yienj ndaej lumj caen nei.

Ciengz Heiqmbaetcaz Bouxcuengh Yunghningz ndeu aeu yienj daihgaiq 4 aen cungdaeuz. “Yaek biujyienj, gyoengq bouxyienj aeu haeujsim cingsaenz; mwh hwnjdaiz yienj, mbouj ndaej dingzgaz hawj daizheiq dinghcaem, aeu hawj bouxngonz raen ndei ngonz cij ndaej.” Dwngz Swhdui naeuz, de maqmuengh heiqdonz yienj heiq ndei hawj daihgya yawj.

Dwngz Swhdui dauqngeix, Heiqmbaetcaz Bouxcuengh Yunghningz hwngfat daemdengj lailai. De daj 1980 nienz ciep aen rap neix roengzdaeuj, daengz daih de gaenq cienzswnj bet daih lo, aenvih gak cungj yienzaen, aen doih de deng sanq lo. Daengz 2002 nienz, vunzmbanj iugouz le, heiqdonz heiqmbaetcaz cij caiq laebguh gvaq.

Seizneix Heiqdonz Heiqmbaetcaz Bonazmungz miz 22 vunz, bi’ndwen 32 daengz 65 bi baedauq. Gyoengqde dingzlai vunz bi’ndwen laux lo, lij youheiq mbouj miz dieg baizlienh、mbouj miz ngaenz baizlienh yienjheiq dem.

“Seizneix dou dwg ciq aen dieg cunhveij daeuj baizlienh, ngaenz dwg dou dangq boux dangq rib, bae biujyienj ndaej ngaenz ma, cungj dwg dawz daeuj cawx daugi caeuq buhheiq.” Dwngz Swhdui lwnhnaeuz gij gannanz seizneix.

“Gou siengj rag bouxcoz lai di haeuj heiqdonz daeuj, hawj gyoengqde cienzswnj. Naeuz yaek daj lwgnyez guh hwnj, hoeng gou cix caengz ndaej haeuj hagdangz bae lwnhgangj gvaq.” Gangj daengz cienzswnj Heiqmbaetcaz Bouxcuengh, Dwngz Swh- dui nyinhnaeuz rag bouxcoz haeujdaeuj caeuq guh gig youqgaenj. Seizneix yienznaeuz haujlai bouxcoz ok rog dajgoeng, hoeng hix miz mbangj bouxcoz siengj gyahaeuj donzdoih daeuj, doiq cienzswnj cungj heiq neix, de naeuz miz saenqsim bw.

Dwngz Swhdui lij maqmuengh miz cwngcwz bangfuz, ndaej gaijgez gij gannanz seizneix bungzdaengz haenx, hawj boux yawj Heiqmbaetcaz Bouxcuengh engq lai, gag rox de, gyaez de, hawj Heiqmbaetcaz Bouxcuengh yied riuz yied gyae.

(Vuz Yaujyij)