Mboengqneix, swcigih mizgven bouhmonz lwnh vunzlai rox, bi 2024, gih raeuz ndaem cazyouz najdieg daengz 1050 fanh moux, cazyouz baenz mak 275 fanh dunh, gyonj baenz cienz daih’iek 630 ik maenz, najdieg ndaem、baenz mak、baenz cienz cungj baiz youq daengx guek baihnaj sam mingz, daiqdoengh daengx gih 150 fanh boux bouxguhnaz lai ndaej ngaenz roengz daeh.

Swcigih Dangjveij、Cwngfuj cienzmienh doekguh aen canloz baijbouh guekgya gyavaiq guh cazyouz, gonqlaeng guh aen dajveh cazyouz“song cien” couh dwg “najdieg cien fanh moux、baenz cienz cien ik maenz” caeuq aen hengzdoengh sam bi gyavaiq guh cazyouz, doinyoengx cazyouz lai ndaem lai baenz、baenz aen hung lai ndaej cienz. Bi 2024, daengx gih gungh ung din cazyouz ndei 1.8 ik go, guh sat ndaem cazyouz cauh ndoeng moq 88 fanh moux, gaijcauh ndoeng cazyouz baenz mak noix 45 fanh moux, faenbied ciemq aen yinvu dajveh guekgya roengz de 105.3%、100.5%. Daengx gih cazyouz baenz mak cungjsoq doengzbeij lai hwnj 34%.

Geij bi neix daeuj, Gvangjsih dawzmaenh aeu aen leixniemh bienq gunghyez bae guh cazyouz, gauq canjyez daihngeih ragdoengh canjyez daih’it、coihaeuj canjyez daihsam, lai haeujcoengh giyez bonjdieg caeuq- faenh gij hong doigvangq ndaem loh cazyouz moq ndei、mak cazyouz gyagoeng baez nduj caeuq yocang、gyagoeng baenz huq ndei caeuq cauh- laeb binjbaiz miz daegsaek. Seizneix, daengx gih bi canjnwngz 1000 dunh doxhwnj aen giyez gyagoeng cazyouz miz 30 aen baedauq, nyinhdingh guekgya gaep、swcigih gaep cazyouz giyez lingxdaeuz miz 10 aen baedauq, gveihmoz doxhwnj giyez miz 6 aen, bienqbaenz gij rengz gvanhgen doinyoengx canjyez hwngfat. Bi 2024 cazyouz canjyez gungh baenz cienz doengzbeij lai hwnj 36%.

Gvangjsih coihdingh okdaiz 《Aen Ceijnamz Dinfwngz Guenjguh Fukhab“Cazyouz+N”》, doinyoengx “dieg ndeu lai baenz、lai baenz lai ndaej cienz”. Youq Yilinz Si Yicouh Gih Dadangz Cin dieg ndaem cazyouz, dangdieg aeu go cazyouz vahom daeuj ndaem, doenggvaq semzndaem, guh baenz ndaem ndaej biucinj、yungh gihgai guh、gohyoz guenjhoh. Aeu “cazyouz+go’gviq” gungganq hopgeiz 8 bi gujsuenq, aen vunqsik neix 8 bi gyonjgyoeb moux baenz cienz 6.99 fanh maenz, caeuq dan ndaem cazyouz doxbeij moux lai ndaej cienz 6000 maenz.

(Cangh Yibinh Hoz Yenyenz)