Cinz lauxbanj cam Vangz Gencingh, “sam ndwen gonq mwngz youq dieglawz guh?”

Vangz Gencingh naeuz:“Gou itcig deq mwngz heuh guhhong.”

Cinz lauxbanj ngeizvaeg, naeuz:“Lauxdoengz mwngz dwk denva hawj gou, naeuz mwngz yiemz ngaenzhong daemq lai mbouj guh doengh laeuzbanhgoeng neix.”

Vangz Gencingh gyangznaek, gag gangj gag damz:“Lauxdoengz vihmaz baenzneix guh ne……”

Laujuj naeuz:“Lauxdoengz mboujgvaq dwg cungj hingzsik ndeu, caen doengzsim mbouj miz geijlai boux.”

Cinz lauxbanj naeuz:“Dwg ha, bungz daengz cienzcaiz byawz mbouj siengj gag ndwnj, gij vunz doengzsim doengzdaep mbouj miz geijlai, doengz van caemh hoj engqgya noix, neix caeuq gya’gyauq miz gvanlienz, guh vunz guh saeh miz siuhyangj cungj mbouj ngaih.”

（Cibcaet）

Ndaw ranzsaw siujhag, cien lai bonj saw baij gwnz gyaqsaw, song dah hagseng dawz bonj neix cuengq roengz, youh dawz bonj wnq daeuj binj, gyaez mbouj cuengq fwngz.

Liuz Fanghfangh:“Gou miz gauhneix lai saw couh baenz lo.”

Vangz Meijyen:“Gij neix saw miz gijmaz lai, sij ndaej cawx couh miz.”

Liuz Fanghfangh:“Ranz mwngz miz ngaenz couh cawx ndaej, lumj ranz gou seizneix lij youq ranzciengznamh.”

Vangz Meijyen:“Song ndwen lai neix daxboh mwngz guhhong boux vunz ndeu ndaej sam fanh lai maenz, bimoq ranz mwngz ndaej hwnq ranzbingzfuengz lo.”

Liuz Fanghfangh danq naeuz:“Gou siengj cam boh gou aeu di ngaenz bae Namzningz cawx saw, youh lau de ndaq gou.”

Vangz Meijyen dingqnyi Liuz Fanghfangh gangj geij baez gvaq. Liuz Fanghfangh gyaez yawj saw, daegbied dwg sawcuenh, de cozvwnz sij ndaej gig ndei, gingciengz ndaej lauxsae youq daengx hagdangz haenh, cau hwnj “diegsuen hagsib” bae hawj gyoengq doengzhag yawj. De miz aen loqsiengj ndeu, baezlaeng dang boux cozgyah ndeu, sij haujlai cozbinj hawj gyoengqvunz yawj.

Saw dwg mbaeklae vunz lajmbwn baenaj haenx.

Liuz Fanghfangh yawj coenz- vah gwnzciengz, de rox neix dwg boux cozgyah hungmbwk guekrog Gauh’wjgih gangj, de ndwn soh naemj coenz vah neix, Vangz Meijyen roxnyinh miz rongh gvaengxlaengx lumj heiqciengz hung’ak haenx hopheux de……

（22）