Makdumh gyangbya van,

Cingq van liux dieg gvaq;

Gizlawz cungj ndwi ha,

Cix ra doh lajmbanj.

Aen youh laux youh hung,

Baenz gyung youh baenz gyoengh;

Caih aen hau aen hoengz,

Cungj doengz van ityiengh.

Dieg ndaem daengz gyang naz,

Baenz caz maj doh reih;

Ndwencieng naengh gwnzreih,

Makdumh ndei gaeuq lai.

Hai diuzroen ginghci,

Makdumh hix najhai;

Mbaet daengz gyaeujreih gai,

Najhai ndingyenyen.

Cienz mbanj ndaem makdumh,

Baenzcumh dwk haeuj ci;

Lajmbanj gauj ginghci,

Bouxgungz hix bienqfouq.

Gaeuj vunzlai makdumh,

Cumhcumh ngeix daengz Dangj;

Ndawsim vunzlai angq,

Aencingz Dangj nanzlumz.