Gwnz bya hung miz duj va saeksaihoengz ndeu, de bang le haujlai duz doenghduz iq, swhgeij cix sied limqva bae liux, bienqbaenz ndoqndangndang. De gietdingh mbouj caiq bang bouxwnq lo.

Ngoenz ndeu, fwnraq doeksasa, duzdouq gipgip muengzmuengz buet daeuj cam naeuz:“Ndaej soengq limq va ndeu hawj gou dang liengj lwi?” Va saeksaihoengz ngauzngauz gyaeuj naeuz:“Mbouj ndaej, yienghhaenx gou couh mbouj gyaeundei lo.” Duzdouq buet deuz lo, ngaiz fwn soen lumj duzgaeq doekroengz raemx nei.

Youh ngoenz he, nditndat lumj feiz, duzcenh baegfofo buet gvaqdaeuj:“Ndat lai lo, gou yaek dai ndat lo, mwngz ndaej soengq limq va ndeu hawj gou dang beiz lwi?” Va saeksaihoengz daliuq de mbat ndeu le naeuz:“Cij mbouj ne! Yienghhaenx gou couh yakyawj lo!” Duzcenh byaij- ngoengngoeng bae lo.

Ngoenz bae ngoenz, daihgya mbouj caiq maij va saeksaihoengz lo, haujlai nanz cungj mbouj miz bouxlawz daeuj ra de. Va saeksaihoengz raen nanzgvaq dangqmaz. De gyae’gyae yawjraen duz maxloeg iq, angq dwk hemq:“Mwngz ndei!” Duz maxloeg iq caengz de da ndeu, buet bae lo.

Va saeksaihoengz cungj siengj doeng lo: Gij limqva gou moix bi cungj maj ndaej okdaeuj, hoeng danghnaeuz mbouj caiq bang bouxwnq, couh itcig mbouj miz baengzyoux. Gou wnggai lumj bi’gvaq ityiengh bang bouxwnq ha!

Mbouj geij nanz, va saek- saihoengz dingqnyi duz nonbwn ndeu daej. Duz nonbwn doq daej doq naeuz:“Haemhlwenz doek fwnhung, gwnz namh cwk raemx laeg lai, danghnaeuz miz aen ruz iq ndeu couh ndei lo!” Va saeksaihoengz mbouj ngeizvaeg saek di couh mbaet limq va ndeu roengzdaeuj, soengq hawj duz nonbwn guh ruz iq.

Youh gvaq le geij ngoenz, duz moed iq ndeu gvez yaek gvez yet byaij daeuj, naeuz:“Va saeksaihoengz ha, ga gou deng sieng lo. Gou yaek dauq roengz aen congh bae, mwngz ndaej hawj gou limq va ndeu guh liengj mbin roengzbae lwi?” Va saeksaihoengz ngaekngaek gyaeuj, riengjret mbaet roengz limq va ndeu.

Va saeksaihoengz youh hainduj bang doenghduz iq lo, doenghduz iq hix dauqcungz caeuq de guh baengzyoux. Va saeksaihoengz mbat siengj daengz limq va bonjfaenh limq- limq cungj baenzneix miz yungh, ndaw sim gaej naeuz geijlai angq lo.

Vah Diemjbingz:

Aen gojgaeq neix dwg aen gojlwgnyez mizyinx ndeu, gij gezgou bouxraiz siengj cungj gig giuj.

Geij baez “byonj”, hawj aen gojgaeq ngutngeuj cix caezcingj. Duj va saeksaihoengz, aenvih bang bouxwnq cix ndoq liux mbouj gyaeundei, ndigah mbouj caiq bang bouxwnq, yienghneix couh mbouj miz baengzyoux lo. Doeklaeng de youh caiq hainduj bang bouxwnq, ndaej daengz cingzngeih baengzyoux, hix gamjsouh daengz gij gyaciz swhgeij, bienq ndaej vuenyungz.

Va saeksaihoengz hix mbouj- duenh “bungzraen”, bouxraiz iq anbaiz de bungzraen duzdouq、duzcenh、duz maxloeg iq……Moix baez bungzraen, cungj miz gojgaeq fatseng.

Aen gojgaeq neix lij hamz miz dauhleix——Bangcoh bouxwnq, mboujdan hawj bouxwnq sim’angq, swhgeij hix rox sim’angq. Hoeng aen dauhleix neix cingq dwg daj ndaw gojgaeq mboujduenh “byonj” “bungzraen” haenx biujyienh okdaeuj.

(Sanghaij Swhfan Conhgoh Yozyau Fusuz Siujyoz ngeih (1) ban Gu Suhhwngz raiz / Lij Lungzfangh hoiz)