Dieghong mbouj lumj ngoenz- gonq baenzlai cauzcab, gizyawz hongcungj sathong le, gyoengqvunz deuz caez, mbouj miz gijmaz gaz. It caengz bet boux vunz, song vunz gvet aen ranz ndeu, gyaux hoi gig youqgaenj, aeu gyaux yinz, danghnaeuz gyaux hoi mbouj yinz lumj haeuxgapseng, gvet hwnj ciengz le gvaqlaeng daj saceij, hoindip cix lumj naed haeux nei doek roengzdaeuj, mienhciengz couh miz congh.

Vangz Gencingh ngoenzngoenz daezsingj gyoengqvunz, gyaux hoi aeu naihsim, menhmenh gyaux couh yinz lo. Vangz Gensuh danq naeuz:“Aen gihgyauxhoi neix mbouj gaeuq rengz, gyaux haj faen cung caengh ndaej doengj ndeu, ndang gutgungq dwgrengz beij gvet doengj naez ndeu engq hojsouh.”

Vangz Gencingh gvaq cibroek doengh bae, raen daxboh Liuz Fanghfangh Laujliuz ram byongh doengj raemx iq ndeu daeuj henz bakdou dendih, bok daeh nizswjfwnj ndeu, miz seiqcib gaen, song fwngz gaem gihgyauxhoi, sing gihgai yiengj gig hung, seiqcib lai miux cung couh gyaux ndei doengj hoi ndeu.

Vangz Gencingh doeksaet dangqmaz, yawj gwnz gihgyauxhoi sij miz vaxsoq dwg 2300W, Laujliuz naeuz, aen gihgyauxhoi neix cawx moq dwg it bak betcib maenz, faen cung ndeu mbouj daengz daj ndaej doengj hoi ndeu, youq gwnz muengx cawx bienzngeiz.

Vangz Gencingh sikhaek bae Namzningz gihden hawciengz cawx haj aen gihgyauxhoi daeuj, gyoengq vunzmbanj yungh cungj gih moq neix gyaux hoi vaiq dangqmaz, caeux rox miz cungj gihgai rengz neix baenzneix vaiq, hong couh mbouj guh ndaej baenzlai sinhoj lo. Vangz Gencingh naeuz:“Raeuz huk gvaq, dwgrengz mbouj gangj nguh hong, nguh seizgan lai lo, gyaux bau hoi ndeu haj faen cung, gih moq seiqcib miux, suenq seizgan raeuz yungh bae song cien lai bau couh deng bet cien lai faen cung.”

Gyoengqvunz dingq le singjsak lo, guh saehcingz aeu yiengq senhcin hagsib, youh vaiq youh ndei caengh gaen ndaej hwnj seizdaih moq.

Cibroek doengh Laujliuz daiqban, gyaban daengz gyanghwnz gouj diemj cung caengh souhong, cindu beij cibhaj doengh vaiq haujlai.

Vangz Gencingh caeuq Laujliuz siengliengz, anbaiz song vunz dawz gihsaceij youq caengz gwnz daj roengzdaeuj, haj boux gaen riengz yungh fwngz gaem saceij cat goeg cat bien conghcueng, song boux aeu gihbwnduz boq ciengzcaet, boq baez daih’it, coih bouj saekdi, mbouj miz hong cungzfuz, boq baez daihngeih couh sathong.

Cinz lauxbanj caeuq Laujuj daeuj niemhsou, song doengh laeuz hung guh ndaej gig habhoz. Cinz lauxbanj doiq Vangz Gencingh naeuz, Laujuj dwg cungjginghlij daihlaeuz, Vangz Gencingh:“Vuengzdaeq couhdwg vuengzdaeq, banh saehcingz yiemz raixcaix.” Laujuj riunyumnyum, goegda diuzdiuz nyaeuq haenx lumj bit sij ok caencingz、youxcingz.（21）