Ranz yahdaiq gou caeuq diuz dah iq ndeu doxnem, diuz dah neix lumj diuz saibaengz saeq, con gvaq rog doengh ndaw mbanj, daj gizgyae yawj bae, raemx saw doengh heu, lumj fuk doz gig ndeiyawj ndeu. Baezbaez ma laeng yahdaiq yawjraen diuz dah iq neix, gou couh siengj daengz gij saeh mwh gou lij iq.

Gou lij iqetet caengz roxsoq seiz, ndaengj dangqmaz, ceiq haengj buet gizneix ndonj gizde, caiq gya meh gou cawx le aen ci niuj ndeu hawj gou, gou gig gyaez aen ci neix, gwih gvaq ngoenz. Yahdaiq caeuq goengda mbouj hawj gou boux ndeu gwih ci ok rog guhcaemz, songde lau gou gag ok bae miz maz saeh. Sojlaiz mwh gyoengqde baez yaep da mbouj gaeuj gou ndei, gou couh caeuq gyoengqde guh gaemhndoj, caegcaeg gwih ci doeng buet sae ndonj.

Gou ndaejgeiq baez iq seiz hwngq, mbatmbat cajdaengz yahdaiq caeuq goengda ninzngoenz, gou cix lohdin le, fwngzswix gaem haiz, fwngzgvaz rag ci, menhmenh caegcaeg deuz ok bakdou bae, ndaej ok dou le gou couh lumj duzlingz haeuj ndoeng nei, siengj bae gizlawz couh bae gizlawz. Hoeng miz baez ndeu, gou meuz laux doek ringj lo. Gou ngamq caegcaeg ok daengz bakdou yaep he, yahdaiq couh rox lo, de gaem diuz faexsaux ndeu boenq gou, swenj naeuz: “Mwngz naeuz mbouj dingq ha! Ngoenzneix hawj mwngz rox hit bae cij ndaej!” Gou raen yahdaiq baenzlai yak, doq ndek gouh haiz ndaw fwngz, naengh youq gwnz ci, song diuz ga dinj cengqdai vad aen ci bae vaiq dangqmaz.

Boihseiz lai lo, gou youq giz van loh iq haenx baenq vaiq lai, aen buenz fuengyiengq gaem mbouj maenh, lienz ci daiq vunz sohsoh bongh roengz diuz dah iq henz ranz bae. Mwh doek roengzbae, ndaw uk gou hoengqvangvang, gou hemq gouqmingh hemq mbouj dingz, hix hemq hix deng saekndaek, gwn le baenz geij gaemz raemxdah. “Gouq......” Caiq hemq coenz ndeu, gou caiq gwn le gaemz raemx ndeu. Couh youq bande, yahdaiq song fwngz cuengq lajeiq gou bae, gaenlaeng daj ndaw dah riuj gou hwnjdaeuj. “Ngw’ngw……” Doek roengz dah bae le, gou lau liux, boemz youq gwnz mbaq yahdaiq daejnga’nga.

Fawh lwgnyez bouxboux, cungj guh gvaq haujlai saeh dwgriu, baezbaez siengj daengz gij saeh baez iq, gag raen najnyaenq caeuq ndeiriu.

(Yangz Yinhyiz raiz Veiz Munglingz hoiz)