Hawfwen Yizfungh Liujcouh, dwg gij dijbauj Cunghvaz Minzcuz vwnzva. De rapdawz gvaq cien bi lizsij, cwkrom gij fwen ndei Bouxcuengh, baenz aen dieg gangjnaeuz Cunghvaz vwnzva lai cungj lai yiengh ndeiraeuh ndeu. Seizgan lae bae foedfoed, Hawfwen Yizfungh gaenq daj hainduj vunzbiengz gag comz daeuj doiq fwen, daengz seizneix hwngfat baenz aen dieg comz cienzswnj vwnzva、 langhbaij yisuz、gyaulouz gamjcingz ndeu.

Gij Daegdiemj Hawfwen Yizfungh

Lizsij gyaenanz. Vunz raeuz nyinhnaeuz, hawfwen ceiq ceiz youq mwh Dangzdai gaenq miz lo, dwg vunz gak minzcuz Guengjsae youq ndaw gwndaenj guh’angq、 dajndaem dajciengx cugciemh gag baenz cungj sibgvenq ndeu. Sungdai Couh Gifeih youq ndaw bonj 《Rog Lingj Lawh Dap》、Mingzdai Yoz Hozswngh youq ndaw bonj 《Bonj Laeng Geiq Gwih Fungh Bae》caeuq Ndawbi Genzlungz Cinghdai ndaw 《Liujcouh Fuj(Yen)ci》cungj geiq sij vunz Guengjsae gyaez doxcomz eufwen. Cinghdai 《Vah Moq Gvangjdungh》《Lwnh Gvangjdungh》《Aendaemz Baihbaek Seizbienh Lwnh》daengj vwnzyen, cungj geiqsij aen gojgaeq Liuz Sanhcej caeuq daegmbauq Bwzho doiqfwen baenz sien. Ndawbiengz riuz naeuz Liuz Sanhcej youq Byayizfungh gwih duzbya mbin hwnj mbwn baenz duzsien, ndigah, couh miz vunz comz daeuj neix eufwen, cugciemh baenz aen Hawfwen Yizfungh, laebdaeb cienz daengz seizneix.

Caez miz caez yungh. Daj ciuhgeq daeuj, vunz gak minzcuz Guengjsae caemh youq laj aen mbwn ndeu、caemh cae doengh naz ndeu、 caemh gwn diuz dah ndeu、caemh cauh dieg ranz ndeu, Hawfwen Yizfungh hix dwg vunz gak minzcuz caez miz caez yungh. 1963 nienz, Goz Mozyoz youq Liujcouh dingq ginzcung doiqfwen le, sim’angq sij sei:“Byonghbya Yizfungh singfwen hwnj, wng dwg Sanhcej caiq daeuj moq. Gwih duz lungz bya mbin Giujcouh, biengz raeuz gizgiz dwg hawfwen.” Hawfwen Yizfungh ciucomz gyoengq canghfwen caeuq boux gyaez eufwen gak minzcuz gak dieg daeuj, gyoengqde aeu fwen hoih youx、aeu fwen cienz cingz, mbelangh gij ndei gij ak Cunghvaz vwnzva. Hawfwen Yizfungh couh yienghneix yied ngoenz yied ndei, yied ngoenz yied okmingz, daengz seizneix cungj hawj vunzlai gig haengj de yawjnaek de.

Son vunz roxsoq. Daeuj Hawfwen Yizfungh cujyau dwg daeuj doiqfwen. Ndaw fwen miz gojgaeq lizsij、 dauhleix guhvunz, gij neix doenggvaq eufwen ndaej daih cienz daih. Bouxcoz hag eufwen le, ndaej rox gij cihsiz caeuq dauhleix ndaw fwen.

Vatgud Gij Gyaciz Hawfwen Yizfungh

Vatgud gij dijbauj coengmingz de. Hawfwen Yizfungh naengh youq laj Byayizfungh, dieg ndeiyouq hab eufwen. Vunz gak minzcuz comz daeuj neix eufwen, ndaej baenz baengzyoux dox hagsib. Gij coenz fwen haenx dangq boux dangq doq, baij gij coengmingz gyoengqde okdaeuj liuxnauq, gij fwen ndei riuz ciengq gyae’gvangq, hawj vunzlai yied ciengq yied lumj dwg ranz vunz ndeu.

Vatgud gij vwnzva daej na de. Hawfwen Yizfungh mboujdan dwg dieg eufwen, engq dwg dieg miz vwnzva daej na ndeu. Gizneix caeuq dieg gaenhgyawj de, riuz gij gojgaeq canghfwen Liuz Sanhcej daengj lairaeuh, gij gojgaeq neix mboujdanh hawj Hawfwen Yizfungh hamz miz vwnzva naekna, hix ce cingsaenz caizfouq hawj ciuhlaeng lai lai. Daj ciuhgonq roengzdaeuj, haujlai canghraiz canghsei、canghgaicawx daeuj neix, raiz faenzcieng raiz sei、guh gaicawx, ce haujlai sei faenz roengzdaeuj hawj ciuhlaeng, hawj aen haw neix hoengh raixcaix.

Vatgud gij fuengfap gaeuq moq yungzhab. Seizneix saenqsik gisuz hwngfat hoenghhwd, vulenzvangj、se- gyauh meizdij、bingzdaiz sibinz dinj daengj, ndaej youq gwnz vangj cigboq、faenyiengj sibinz dinj daengj, aeu ra gij fuengfap gaiq gaeuq caeuq gaiq moq yungzhab, hawj vwnzva Haw- fwen Yizfungh yied riuz yied gyaenanz.

Doi Hawj Hawfwen Yizfungh Ndaej Hwngfat Moq

Seizneix Hawfwen Yizfungh mboujdanh dwg dieg hawfwen ndeu, hix dwg dieg cienzboq Cunghvaz vwnzva ndeu. 2013 nienz, Hawfwen Yizfungh baenz aen hanghmoeg guhyiengh cauhlaeb guekgya gungh- gung vwnzva fugsaeh vunzlai. Daj neix hwnj, cwngfuj youq neix guh daengx guek eufwen doxdax, iucingj canghfwen doihfwen daengx guek gak dieg daeuj neix doxdax eufwen. Aeu ciq gij hozdung neix doi hawj Cunghvaz vwnzva ndaej hwngfat moq.

Aeu gyarengz laebguh aencang soqgawq. Soucomz caeuq cingjleix gij lizsij vwnzyen、yinhsieng swhliu、doxgaiq Hawfwen Yizfungh, laeb dangjan caeuq aencang soqgawq, caemhcaiq leihyungh soqcih gisuz bae baujcunz caeuq langhbaij de.

Aeu gyarengz ungganq aendoih vunzcaiz. Mbiengj he laeb aen gihci vwnzva hawfwen cienzswnj, ungganq boux cienzswnj, gingciengz guh beizyin; lingh mbiengj aeu yungh ndei “muengxhoengz” , yungh gyoengqde doigvangq vwnzva hawfwen, lwnhgangj dangdieg lijyouz swhyenz, coi hawj vwnzva caeuq lijyouz yungzhab hwngfat.

Aeu gyarengz leihyungh vwnzva cauh’ok gij doxgaiq gyoengqvunz gyaez yungh haenx. Naemjnaemj seizneix gyoengqvunz haengj yungh gijmaz, cauh’ok gij doxgaiq miz gij daegdiemj Hawfwen Yizfungh ndeiraeuh youh habyungh haenx.

Hawfwen Yizfungh ndawbiengz gag baenz、 youq ndawbiengz hoenghfat、 fugsaeh vunzbiengz, vunz gak minzcuz cungj gig maij de, doiq doidoengh Cunghvaz vwnzva cienz- swnj hwngfat、coihawj gak minzcuz dox baedauq dox gyaulouz dox yungzhab miz cozyung youqgaenj. Aeu henhoh yungh ndei gaiq vwnzva swhyenz neix, dawz Hawfwen Yizfungh guh baenz aen vwnzva binjbaiz okmingz、 gyoengqvunz gyaez bae youzlangh ndeu.