Loih Beigaek

Beigaek bingzciengz gangj dwg doengh cihsaw caeuq dozveh gaek youq gwnz rin. Beigaek youq Guengjsae gak dieg soqliengh lailang, daj neiyungz faenloih daihdaej miz bei coengdangz、bei ranzmiuh (miuhdauh)、bei mbanjbya、beisingz、beigyaiq、beiloh、bei goengdaek、bei gvidingh ndaw mbanj、bei gauqseih、beimoh daengj. Gij beigaek Guengjsae bet gouj cingz doxhwnj dwg yungh Sawgun gaeksij, daihngeih dwg buenq Sawgun caeuq buenq Sawndip gaeksij, cienzbouh aeu Sawndip gaek sij gig noix raen. Daengz seizneix Guengjsae raen miz daengx bien faenzcieng yungh cihsaw geq minzcuz sij haenx gig noix raen. Daengz seizneix Guengjsae raen miz gij beigaek daengx bien faenzcieng aeu cihsaw geq minzcuz gaeksij dwg《Bei Doumoh Liuz Sw’gvanh》. Gaiq bei neix youq seizneix Gvangjsih Hozciz Si Yizcouh Gih Anhmaj Yangh Gujyuz Cunh, Cinghdaugvangh Cib’it Bi (1831 nienz) seiq nyied cibgouj hauh laeb hwnj, dwg Cingdaih vunz Bouxcuengh Liuz Sw’gvanh lixyouq seiz vih swhgeij hwnjguh gij dou bei aenmoh, baihgwnz gaek Fwencuengh Sawndip 《Gij Faenzcieng Gag Danq》 swhgeij biensij, eiqsei dwg “gij fwen danqheiq seiqvunz”, daengx bien fwen gungh 15 hot 120 baiz 600 cih, geiqloeg gij ginglig ciuhvunz bouxcawj aenmoh, seizcoz gaenxguh ciengx ranz, hoeng ciuhvunz mbouj miz lwg、cungnienz seiz song boux lwgciengx gvaq giuz vut dwngx deuz ok ranz bae、seizgeq mehyah dai bae boux vunz gadog, gangj ok swhgeij simndaenq siliengz, maqmuengh bouxlaeng gaej byaij roen gaeuq swhgeij mbouj roebdeng saeh boihseiz.

Loih Faenzsaw Mbawheiq

Faenzsaw mbawheiq dwg gij faenzsaw mbawceij sanqyieb geiqloeg gak minzcuz ndawbiengz ginghci swnghhoz ndawde mizgven gaicawx、ciqcienz、codangq、gienzsug faen’gvej diegreih ranzyouq、ndoengbya、aensuen doengh gij caizcanj neix caeuq minzgveih minzsug gag miz haenx. Faenzsaw mbawheiq bingz- ciengz aeu Sawgun sij, mbangj noix aeu Sawndip geiqloeg gij cohvunz、cohdieg caeuq vahswz gag miz ndaw saw. Gij faenzsaw mbawheiq Guengjsae ciengzseiz raen haenx miz mbawheiq gaicawx reihnaz、mbawheiq gaicawx diegreih ndoengbya、mbawheiq gaicawx gomak、mbawheiq gaicawx diegranz、mbawheiq duh dangq cuengqcaiq、mbawgawq ciq (boiz)、mbaw saw (dan) faen’gven (gya)、habdoengz hwnjcoemq geiq ciengx doengh gijneix. Faenzsaw mbawheiq doiq yenzgiu vwnzyenyoz、minzcuzyoz、ginghciyoz、seveiyoz、fazyoz、minzsuzyoz doengh aen yozgoh neix daezhawj baengzgawq ciuhgonq camgauj youqgaenj, ndaej dienzbouj swhliu gwnz saw guenfueng geiqcienz mbouj gaeuq.

（Vangz Gyanghmyauz hoiz）

Gij doz lanz neix dwg Swcigih Saujsu Minzcuz Gujciz Baujhu Yenzgiu Cunghsinh hawj.