Loih Yw

Guengjsae dieg youq Lingjnanz, daj ciuhgeq daeuj couh dieg cumx heiqdoeg lai, vunz yungzheih baenz gij bingh hwnj nyan hwnj baez、samaz、dengdoeg、dungxin ndokin. Baenzbingh lai le, vunz gak minzcuz Guengjsae gag ra ywdoj ywbingh, cugciemh rox yw bingh lo, doeklaeng guhbaenz dauq yawjbingh ywbingh lijlun caeuq yawjbingh ywbingh fuengfap gag miz daegsaek ndeu, ndawde Ywcuengh riuzcienz miz sawyw aeu Sawndip sij. Gaengawq 《Sawloih Hung Guengjsae》(Gienj Minzcuz) diuz “Yw Sawcuengh”: Bouxcuengh ndawbiengz baeznaengz yawjbingh yungh yw heuhguh Ywcuengh roxnaeuz ywdoj, youq Senhcinz seizgeiz ngamq hainduj, ginggvaq Han Vei roek ciuz hwngfat, daih’iek youq Dangz Sung seizhaenx guhbaenz ywdoj gwn、 swiq、oenq fwi、oep nem、raek yw、gvet ndok、gokndang、cimgiuj ngaihcit、cimdiu、cimmeng cib lai cungj Ywcuengh lai cungj fuengfap doxboiq doxhab.” Aen diuzmoeg neix lij geiqsij, gij cimluengz Cangoz seizdaih youq Vujmingz oknamh caeuq cimngaenz Handai youq Gveigangj oknamh haenx, dwg gij dinfwngz yungh cim daengz seizneix cij youq ndaw Cungguek raen miz nienzdaih ceiq caeux.《Vangzdi Neigingh》naeuz: “Gouj cim, hix dwg daj Baihnamz daeuj.” Gangjmingz vunz ciuhgonq Bouxcuengh gig caeux couh cauh ok gij fuengfap yungh cim ywbingh, doiq hwngfat yihyoz guek raeuz ok rengz lai rengz hung youqgaenj. Gaengawq 20 sigij 90 nienzdaih diucaz, gij binghyiengh cungjloih Ywcuengh raen miz haenx miz 500 lai aen, soucomz gij niemhfueng maedfueng bakcienz haenx fanh lai diuz, sawgeq bonj fwngzcau 100 lai bonj, baenz le loih sawgeq gag miz daegsaek haenx.

(Vangz Gyanghmyauz hoiz)