Laujuj bwn’gyaeuj raez yaek cw da, de aeu fwngz roi doxhwnj, loh ok najriu, hoengheiq lumj siet nei deng ndit ciuq yaepyet couh yungzvaq, Cinz lauxbanj sim gaenj daengz conghhoz seizneix menhmenh soeng roengz- daeuj. Vangz Gencingh ndawsim miz soq, de itcig song gen doxgeuj, caih Laujuj baenzlawz loengh de cungj mbouj youheiq.

Laujuj doiq Vangz Gencingh lingh da yawj lo, de riunyumnyum cam Vangz Gencingh:“Gij nizswjfwnj mwngz caeuq cibroek doengh mizmaz faenbied?”

Vangz Gencingh naeuz:“Gou cawx bau ndeu deng cibhaj maenz, cibroek doengh dwg caengh cib maenz.”

Cinz lauxbanj raen baucang caeuq de baeznaengz cawx haenx doxdoengz, cam:“Gou cawx couh deng cibroek maenz bau ndeu, mwngz baenzlawz siuj maenz ndeu?” Vangz Gencingh naeuz:“Mwngz dwg lauxbanj, gou cij dwg bouxdajgoeng, bouxgai hojlienz gou ha.”

Laujuj riu dwk ae mbouj dingz.

(Cibsam)

Mienhciengz veiswnghgenh roh raemx, mbouj dwg cienzbouh cungj roh, dwg cawx gij fuengz raemx swnghliudai cab miz huqyaez, cawx daeuj doxcab yungh le, mienhciengz lawz yungh deng gij huqyaez, mienh de couh nyinh raemx. Vangz Gencingh caeuq Cinz lauxbanj yaeng mienhciengz rog veiswnghgenh mbouj nyinh raemx couh gvethoi hwnjbae.

Banringz, bouxhongcab daeuj siuq gij suijniz fung cauz guenjraemx haenx okdaeuj le, suijdengungh niuj guenjraemx okdaeuj geuj swngh- liudai hwnjbae ndei couh baenz.

Cinz lauxbanj gvaq cibroek doengh bae, ndaejnyi gwnz itlaeuz cauzhuhu, dingq sing hemqcauz lumj yaek doxdaj, de youq fouqitlaeuz caj dendih, dou dendih hai le, de mbouj haeujbae, cienj ndang byaij bae giz daengx ci, hai ci ma gunghswh.

（Cibseiq）

Cibroek doengh itlaeuz, Lij Danenz deng ngeihcib haj vunz humx youq cungqgyang, de heuh daihgya vaiq di conx hoiciengz, vunzlai raen hoj conx lai, bouxboux naemj cib caengz laeuz aeu conx seuq, yungh ngeihcib ngoenz seizgan, byawz rox conx caez le Cinz lauxbanj hawj dauqcungz guh roengzbae mbouj?

Lij Danenz hix mbouj ndaej baujcingq, “Hojnaengz ndaej ba.” De naeuz. Vunzlai dingqnyi dwg “hojnaengz”, simliengz lo, vunzlai mwngz coenz gou coenz, daihgya gietdingh heuh Lij Danenz sien hawj moixvunz cib ngoenz ngaenzhong caengj guh.(18)