Faengz daengngoenz gvengqyak,

Dak bya dah foed heu;

Dak mbwk sai iq laux,

Angqvauvau diuq ciengq.

Faengz ronghndwen hausi,

Ciuq digiuz ronghrangq;

Vangzhoz raemx bongh nyaengq,

Giuz Cangzgyangh ci mbin.

Faengz seizcin vahai,

Daihgya ganj caux miuz;

Roeg heuh cwz yiengz riu,

Diuq angq ndoi nywj oiq.

Faengz seizhah nditremj,

Nyez hemqciq cauhcangz;

Coz hanh doek hong gaenx,

Goeng baenq haeujok muengz.

Faengz seizcou rumz liengz,

Ronghndwen hau gvaq ceij;

Gva mak henj rim deih,

Raeuz miz geijlai angq.

Faengz seizdoeng nae roengz,

Fongz haeux(go) mienh gvaq doeng;

Nae goeb deih namh mboeng,

Non haih doengzcaez cawz.

Faengz ceiqgviq gyanghaet,

Didez ndaet baenz faengx;

Gwnz loh ci mbin faengh,

Ganj muengz bae hwnjban.

Faengz daengz liux banringz,

Caez dingz hong gwn ngaiz;

Ok cangj vunz ceiq lai,

Danhvei caez angq faengz.

Faengz daengz le banhaemh,

Caemh roengzban dauqma;

Gak boux bae gak nga,

Gyavunz comz guhdoih.

Faengz guek raeuz vunz maengx,

Naemj caux ok veisingh;

Naemj caux gihgiyinz,

Caencingq ceiq coengmingz.

Faengz raeuz Dangjcunghyangh,

Lwgminz cang ndawsim;

Gauj cinghcunj fuzbinz,

Bya rungh ndaej “sam doeng”.

Faengz haw rungh daihbienq,

Cienz baengh Dangj hai loh;

Raeuz ndaej duet gungzhoj,

Gyo Dangj cwngcwz ndei.

Faengz Dangj raeuz yinghmingz,

Gyimh(caz) ok gij fujbai;

Dawz coh cienz gunghgaih,

Daihgya bekfwngz haenh.

Faengz guekgya fouqgiengz,

Faengz minzcuz doxgyaez;

Faengz gya’gya baenzmeiz(miz),

Faengz mbwn ndei deih gvangq.