Song vunz sij ndei habdoengz, Vangz Gencingh daegbied giengzdiuh, hong sat cazniemh ciengzhoi mbouj habgek, bouxgai deng doiq ngaenzhoi caez caeuq gyaboix boiz ngaenzhong.

(Cibngeih)

Seiqcib ngoenz gvaqbae, canghfaex、canghnaez、cangh- raemxdienh、miedfeiz ancang daengj gak cungj hong hwnz ngoenz gyaban, guh ndei caez doiq ok dieghong, song doengh laeuz gvet hoi gaenq ndaej dingz ndeu. Song lauxdoengz baenzngoenz nyaengq dwk daiq vunzmbanj swhgeij guhhong, cijmiz gyanghaemh ndaej raennaj, Lij Danenz hwnj diegyouq seiq laeuz ra lauxdoengz, lauxdoengz cingq caeuq vunzmbanj gwn laeuj, de naeuz:“Doengz ha, mwngz vihmaz mbouj aeu niswjfwnj Lungzingh, de yiem mwngz mbouj dwg beixnuengx bw.”

Vangz Gencingh gejnaeuz:“Haihong ngoenzgonq, daeggo gou hix ra gou aeu niswjfwnj, de baenz bi buet hong saeh, de geij bi gonq couh daengq gou bang de cawx di niswjfwnj, rwed ged gvaq raemx ha.”

Haetromh caet diemj cung, Cinz lauxbanj dwk denva hawj song lauxdoengz bae gunghswh haihoih, gak aen gunghcungj bouxdaiqdaeuz daeuj caez, genjcaz hongsat lijmiz gijmaz vwndiz aeu guh ndei.

Banringz song diemj cung, song lauxdoengz ma dieghong, Vangz Gencaiz heuh Vangz Gencingh hwnj cib laeuz bae, daihgya dinghdingh naengh dwk, bouxboux naj saepsat. Vangz Gencingh doeksat, Vangz Gencaiz naeuz:“Haetneix guenjraemx roh mbouj haihong, ciengzhoi deng raemx ciemq, bouxguenjleix heuh song doengh daihlaeuz cienzbouh daengxhong.”

Vangz Gencingh doq dwk denva hawj Cinz lauxbanj, Cinz lauxbanj hozndat dangqmaz:“Sou mbouj miz liengzsim, cawx huq rwix daeuj dingjlawh, yaep ndeu gou caengh gvaqbae.”

Song doengh daihlaeuz guenjraemx roh caeuq gou gvethoi miz gijmaz gvanhaeh? Vangz Gencingh naemj mbouj doeng.

Cinz lauxbanj denva Vangz Gencingh gvaq cibroek doengh bae, hwnj cibsam laeuz, raen Cinz lauxbanj henz ndang ndwn boux vunz sangseuq ndeu, vix neix ceij haenx, bak damzbyoedbyoed, Vangz Gencingh byaij gvaqbae, yawj dwg Laujuj, de baenzlawz youq neix? De hix yawj raen Vangz Gencingh, Lij Danenz ndwn youq henz mbouj oksing, Cinz lauxbanj cam:“Song lauxdoengz sou baenzlawz gej, ciengzhoi ngamq gvet mbouj daengz ndwen ndeu couh bok roengzdaeuj……” Lij Danenz yaek gangj mbouj gangj, Cinz lauxbanj yawj de lumj yawj vunz najseng nei, cienjnaj yawj Vangz Gencingh, Vangz Gencingh seiq lwgfwngz lumhlumh najbyak, lumj mbouj miz saek yiengh saeh, caiqlij mbouj miz gijmaz youqgaenj. Laujuj ngeizvaeg dwk yawj Vangz Gencingh, caem le geij faen cung, Cinz lauxbanj naeuz:“Bae, gvaq cibhaj doengh bae yawj.”

Laujuj mbouj oksing, byaij hwnj cibseiq laeuz, Cinz lauxbanj、Lij Danenz、Vangz Gencingh hix gaenraengz hwnjbae, de raen ndaw ranz ciengzhoi henz conghcueng cungj bok okdaeuj, nyapnyuk dwk naeuz:“Sou yawj, fwn buet haeuj conghcueng daeuj mienh ciengzhoi deng fwn buet bok okdaeuj, gij hoi neix yungh ndaej geijlai ndwen?”

(16)