Yaek daengz geizbyai gauj, ndaw sim Loz Veifangh cungj geiq dwk gienh saeh ndeu, de dwk boux fuyaucangj Dafungh Cin Cunghsinh Yozyau. Gijmaz saeh? Haenx couh dwg gij cingzgvang hagsib sam boux lwgnyez laeng fuzbinz duisieng Luz Hungzguj. Ndigah geij aen singgeiz roek neix, gienh saeh daih’it Lozfuyaucangj couh dwg daengz ranz Luz Hungzguj, hawj geij boux lwgnyez fujdauj cozyez.

Loz fuyaucangj baez yamq haeuj ranz Luz Hungzguj, daengx ranz couh sikhaek angqyangz hwnjdaeuj. Ceiq angq dwg sam boux lwgnyez de, doiq lwgsai songseng haenx doeg roek nienzgaep, dah lwgmbwk doeg it nienzgaep. Sam lwgnyez angq dwk couh lumj duz roeg iq heuh cici caca dwk comz youq henz Loz fuyaucangj, gwn mak diemzsisi, lij gwn di saejdaeuz dem, Loz fuyaucangj dawz gij doxgaiq baij okdaeuj: Doxgaiq guhcaemz、daehsaw moq、bitmaeg daengj, cungj dwg Loz fuyaucangj daiq daeuj. Gyoengq lwgnyez raen le angq raixcaix. Yienzhaeuh Loz fuyaucangj couh daiq gyoengqde fuzsiz gunghgo. Loz fuyaucangj baez daeuj daengz, gyoengq lwgnyez couh lumj coux daeuj cin raeuj va hai. Cingq dwg seiz- haenx, mehyah Luz Hungzguj ninz youq congzbingh loh ok gij naj riunyumj, cungj siengj bingh ndei vaiq di caeuq gyoengqde caemh guh’angq.

Hoeng, Luz Hungzguj yawj youq ndaw da, raeuj youq ndaw sim. Gij saedceij Loz fuyaucangj daengz ranz de, Luz Hungzguj okbae guhhong ceiq cuengqsim ceiq miz rengz.

Daj Loz Veifangh fuyaucangj dang boux bangfuz ganbu ranz Luz Hungzguj daeuj, mboujdanh daiq daeuj gij fuzbinz cwngcwz cwngfuj, hix daiq daeuj haujlai raeujrub, dan suenq hawj lwgnyez fujdauj gunghgo, Loz Veifangh hix geiq mbouj ndaej geijlai baez lo, cungj dwg faen cienz mbouj aeu. Luz Hungzguj dingq vunz gangj gvaq, danghnaeuz sam boux lwgnyez neix moix cou soengq bae hawj vunz son, ngaiz aeu 600 maenz. 600 maenz? Aen soq neix caen dwg hawj Luz Hungzguj doeksaet dahraix! Aenvih aeu ciuqgoq mehyah baenz bingz de, Luz Hungzguj nanz mbouj nanz cij ndaej okbae dajgoeng ra di ngaenz, mizseiz baenz ndwen hix ra mbouj ndaej 600 maenz. Ndigah hawj lwgnyez boujgoq, lienz siengj hix mbouj gamj siengj. Hoeng Loz fuyaucang mbouj gangj ngaenz, cixdwg moix baez daengz ranz senhconz fuzbinz cwngcwz, cungj dwg riuj doxgaiq gwn ndei、 daehsaw moq、 doxgaiq guhcaemz daengj, lij seiz mbouj seiz soengq di ngaenz hawj Luz Hungzguj yw bingh mehyah de, mizseiz mehyah Luz Hungzguj youq yihyen, Loz fuyaucangj daj ranz cawj dang daeuj hawj de bouj ndangdaej. Neix baebae dauqdauq, ranzvunz Luz Hungzguj hix dangq Loz fuyaucangj guh ranzvunz swhgeij, lumj de dwg bangfuz ganbu lo. Hoeng ndaw mbanj vunz cungj laihnaeuz Loz fuyaucangj dwg caencik Luz Hungzguj.

Dahraix, fuzbinz ganbu Loz Veifangh daeuj daengz, hawj Luz Hungzguj caeuq mehyah de byaijok gungzhoj hix mbouj lau bingh, miz saenqsim caeuq ligliengh haekfug de. Bonjlaiz Luz Hungzguj aen ranz gig vuenyungz, lwgsai lwgmbwk caez- cienz, song goeng’yah youh gaenx guhhong, saedseij gvaq ndaej gig ndei. Hoeng bungz daengz doek fwn ranz youh roh, daj mehyah de baenz bingh feiqlauz le, Luz Hungzguj mbouj ndaej okbae guhhong, mehyah de youh aeu gwn yw, Luz Hungzguj nanz mbouj nanz cix aeu bae yihyen ciuqgoq, caiqgya sam boux lwgnyez doegsaw、gwndaenj cungj aeu yungh ngaenz, yienghneix aen ranz Luz Hungzguj couh sawj ngaenz doenghbaez rom haenx caez lo, aen ranz neix couh bienq gungz bienq seuqsat lo. Aen bingh fouz cingz vunz miz cingz, diuz loh cwngfuj fuzbinz ronghsag, cwngfuj ok ngaenz bangfuz de hwnq aen ranz laeuz ndeu, diuzgen ranzyouq caeuq nungzyez swnghcanj cungj ndaej bangcoh caeuq gaijndei.

Hoeng Luz Hungzguj aenvih aeu ciuqgoq yah de, youh mbouj miz onjdingh souhaeuj, swnghhoz diuzgen haemq nanz di, Loz fuyaucangj guh cwngcwzsing cijdauj bangfuz, lij swhgeij ok ngaenz、 ok doxgaiq、 ok rengz bae bang, daegbied dwg bangcoh lwgnyez de fuzsiz gunghgo, hawj Luz Hungzguj roxnyinh gij cwngfuj cwngcwz aen seizdaih moq neix ndei raixcaix, vunz bang vunz raen caencingz, baenz bingh cungj mbouj lau, seiqgyaiq gizgiz miz caencingz.

Loz Veifangh fuyaucangj hix cungj nai Luz Hungzguj song goeng’yah naeuz:“ Byawz rox ciuh vunz byaij loh cungj mbouj daemj ne? Cwngfuj bang sou gvaq nanzgvan, raeuz dwg caemh yangh ranz vunz ndeu, ndaej bang couh bang, daihgya ndei cijdwg caen ndei. Daengzcog ndangdaej dahsauj ndei hwnjdaeuj, aen ranz couh miz muengh lo.”

Luz Hungzguj gig gamjdoengh, bungz vunz couh naeuz:“Cwngfuj cwngcwz ndei lai lo, bangfuz ganbu Loz Veifangh daiq ndei lo, gou aeu ganjvaiq ndei hwnjdaeuj, ciuqgoq ndei aen ranz gou, ceng’aeu vaiq di duetgungz.” Mehyah de engqgya gikdoengh, haibak couh ciengq fwen hwnjdaeuj:“Docih lo, docih cwngfuj ndei cwngcwz, bangfuz ganbu caen- cingq ndei, bang aen ranz gou ndei hwnjdaeuj, ngoenzneix gou mbouj miz laeuj caz ndei, cij miz fwen ndei gingq vunzcaen ha gingq vunzcaen.