Bi ndeu cin guhdaeuz, fanh saeh aeu guh gonq. 2 nyied 6 hauh gyanghaet, Liyenz Sanhcangh ngeih laeuz ndaw ding haihoih laeng Gvangjsih Bouxcuengh Swcigih Nanzningz Si, 350 boux lingjdauj ganbu caeuq gak boux daibyauj giyez doxcomz giz ndeu, youq neix hai aen hoih caeuq baeznaengz mbouj doengz ndeu—Aen Hoih Genhciz “Gejcuengq Swhsiengj、Cauhmoq Gouz Bienq, Coh Haij Maeuz Ak、Haicuengq Hwngfat” Doinyoengx Ginghci Coh Ceiq Ndei Hwngfat.

Aen daizcujsiz baihlaeng dwg aen bingz hung LED ronghda ndeu, gij anhbaiz gangjvah caemh gig mizyinx. Gwnz daizcujsiz, vihgangjvah caeuq vihcujsiz gag miz aen ndeu, gyoengqvunz camhoih cij ndwn dwk gangjvah. Swcigih dangjcwng lingjdauj caeuq gizyawz vunz hix naengh youq lajdaiz. Doengh bouxdawzrap 14 aen sezgihsi doxlwnz hwnj daiz gangjgangj haicieng yaek guh hong lawz caeuq baenzlawz baujmaenh geiq daih’it “haicieng couh hoengh、 daengx bi cungj baenz”, mbouj gangj vahhoengq, caenh gangj yaek guh daengz yienghlawz、dawz maz rap caeuq baenzlawz guh. Lwnz daengz bouxdawzrap aen sezgihsi lawz gangjvah, gij bingz hung LED ndawding couh cuengq ok gij cijbyauh ginghci cawjdaeuz caeuq baenzlawz hwngfat geiq daih’it “haicieng couh hoengh” dieg de.

Gvangjsih Bouxcuengh Swcigih boux dangjveij suhgi Cinz Gangh naeuz, Siz Ginbingz cungjsuhgi daengqdak Gvangjsih guhhong aeu “gejcuengq swhsiengj、cauhmoq gouz bienq, coh haij maeuz ak、haicuengq hwngfat”. Gij vah doengh boux- dawzrap 14 aen sezgihsi neix dwg gyoengqde goenghai wngcingz le 5700 fanh vunz Gvangjsih, aeu saedguh cauhmoq gouz bienq、doinyoengx ginghci coh ceiq ndei hwngfat. Gij vah gyoengqde caemh yaek guh baenz sibinz dinj, fat hwnj gwnzmuengx bae, yiengh le hawj vunzlai caez gam caez bingz, moix aen geiqdoh sat hix ndaej aeu neix guh gaujhwz dem.

Mwhneix ceiq youqgaenj dwg aeu gohgi coi ginghci fatmaj ndei. Doengh bouxdawzrap 14 aen sezgihsi gangj gij vah haenx gak miz mbouj doengz, hoeng, gyoengqde cungj roxnyinh, yaek yungh swhyenz ndei gak dieg hwngfat aen canjnieb dijhi yendaiva、ciengj byaij “yinzgungh cinwngz+” daengj roen moq hwngfat yiengh swnghcanjliz rengzmoq.

Nanzningz Si bouxsicangj Houz Gangh guh bouxdaih’it gangjvah. De naeuz, Nanzningz Si gunghyez giekdaej mbangnyieg, caeuq gij canjnieb guekgya Dunghmungz gvanlienz noix, Nanzningz Si yaek gyavaiq gungganq yinzgungh cinwngz daengj canjnieb moq, dap ndei bingzdaiz hamjbiengz doxgap cauhmoq yinzgungh cinwngz. Liujcouh Si dwg Gvangjsih aen si guh gunghyez hunghoengh ndeu, gyawj geij bi neix guhhong caemh daemdengdeng, Liujcouh Si bouxsicangj Cangh Cang gangj, yaek yawjnaek gyagiengz gohgi cauhmoq, gaijndei yezdai canjnieb, ganq ok ganq hung cinwngz cunghdonh caeuq bouxgihgi、nwngzyenz moq、 caizliuh moq daengj canjnieb, ceng’aeu youq bineix canjciz dem lai maj lai. Yilinz Siveij bouxsuhgi Vangz Cinh naeuz, gij minzyingz ginghci Yilinz fat ndaej lai, gohgi gwzming moq hix daiq daeuj gij gihvei hwngfat, hwnqguh aen canjnieb dijhi yendaiva yaekaeu cacoemj ndei gihvei moq bae guh aen hengzdoengh “yinzgungh cinwngz+” hwngfat yiengh ginghci soqcih, haenqrengz hwngfat yiengh swnghcanjliz rengzmoq. Bwzhaij Si dwg buek hawsingz hailangh daih’it guek raeuz ndawde aen ndeu, Bwzhaij Siveij bouxsuhgi Cai Ginjginh nyinhnaeuz, yaek guh bouxdaeuz haicuengq hwngfat Gvangjsih, yaekaeu genhciz yawjnaek saedguh, gyavaiq hwnqguh diuz lienh caezcienz swnghdai “maeqfat gisuz+ciengzgingj+niemhcingq+canjnieb yungzhab” ndeu, aeu lai aen mozdai gyavaiq yinzgungh cinwngz caeuq yiengh ginghci saeddaej haeujlaeg yungzhab、doxdaengh fatmaj.

“Daengz seizneix, dou gaenq aeu daengz gij cienzngaenz cunghyangh yawhsuenq douzhaeuj caeuq 23 aen ‘song cung’ hanghmoeg, suenq daeuj gungh dij 117.23 ik maenz ngaenz, gak si aeu vaiq guh hanghmoeg、vaiq yungh ngaenz, doeksaed swcigih geiq daih’it ‘haicieng couh hoengh’23 diuz guhfap dingh aeu saedguh haenx, baujmaenh gak hangh cienz daeuj vaiq、 faen hix vaiq, vaiqvaiq guh ok cingzcik saedcaih.” Gvangjsih Bouxcuengh Swcigih Fazcanj Gaij- gwzveij bouxcujyin Bwz Sunghdauh naeuz.

《Yinzminz Yiz Bau》（Bi 2025 2 nyied 7 hauh banj daihcaet）gicej Dwng Genswng