Youq ndaw biengz lai saek lai yiengh neix, miz gizdieg hawj gou sim siengj bae lili ndeu——suenangqyouz. De mboujdanh dwg dieg ndei ndaw loq gyoengq lwgnyez, hix dwg aen suen gyoengq vunzlaux dauq ra sim’angq seiziq. Ngoenzneix, gou yaek yiengq daihgya doigawj aen dieg ndei angq riu he——aen suenangqyouz gyawj ranz gou.

Byaij haeuj ndaw suenangqyouz, gij doxgaiq guh’angq gak cungj gak yiengh haenx ingj haeuj da daeuj, gyoengqde lumj caw ndongq ronghsagsag, seb youq gwnz aen dieg angqyangz. Ciconbya lumj duz lungz hung ngutngeuj, mizseiz bongh daengz gwnz fwj, mizseiz baek bongh roengz- daeuj, hawj vunz sim diuqbwgbwg; ruzcaeghaij cix lumj aen ruz ndaw daihhaij langhloet fan hwnj boek roengz byaij dwk, mwh sang mwh daemq, hawj vunz swenj set heuh mbouj dingz. Aen mozdenhlunz haenx, cix dwg boux vunzhungsang unqswnh ndaw suenangqyouz, menhmenh baenqcienq, daiq gyoengqdou ngaem yawj gingjsaek ndei daengx aen suenangq.

Cawz le gij guh’angq simdiuq neix, suenangqyouz lij dwg gizdieg comz gijgwn gyaqciq. Gaeqcaq youh rang youh byot、raemxcazcij youh van youh diemz, moix cungj ndeigwn cungj hawj vunz myaiz rwibyoegbyoeg. Youq gizneix, raeuz ndaej angqyangz gwnguk, yiengjsouh gij sim’angq simsangj ndeigwn haenx.

Gou ceiq maij naengh cidoxbungq guh’angq, de hawj gou daejniemh daengz sim’angq simdiuq doxbungq, lij ndaej hawj gou lumjnaeuz swhgeij bienqbaenz boux ak hai ci doxdax ndeu, youq gwnz roen bongh bae buet dauq. “Daxmeh, mwngz vaiqdi daeuj caeuq gou guhdoih naengh cidoxbungq ba!” Gou angqbwngbwng iu daxmeh. Daxmeh riunyumnyum ngauz gyaeuj:“Gou couh mbouj bae lo, mwngz angq couh baenz lo.”

Gou gag daejniemh gij simdiuq cidoxbungq haenx. Roengzdaeuj le, daxmeh cam gou:“Cawx mbouj cawx di doxgaiq gwn? ” “Dangyienz aeu cawx la! ” Gou han naeuz. Daxmeh cawx gij raemxcazcij gou ceiq gyaez haenx hawj gou, gij feihdauh vanswd diemzcup haenx hawj gou gwj naemj gwj siengj gwn, hawj gou roxnyinh vuenyungz fouzbeij.

Youq ndaw suenangqyouz, dou ndaej cuengqroengz gij saeh nyaengq ngoenznaengz, yiengjsouh duenh seizgan mbouj you mbouj heiq ndeu. Seiz guh’angq doeksat, gou yawjraen dujva haihoengh caeuq doenghgo heuswd henz bakdou doxok haenx, gyoengqde youq laj ndit ciuq yienj ndaej daegbied mwnhoengh. Gou gig maqmuengh baezlaeng, dou lij ndaej caiq daeuj gizneix, caiq angqyangz youzlangh baez ndeu.

游乐园

在这个五彩斑斓的世界里，有一个让我心驰神往的地方——游乐园。它不仅是孩子们的梦幻天堂，也是大人们重拾童心的乐园。今天，我要向大家推荐一个充满欢声笑语的好地方——我家附近的游乐园。

一踏入游乐园，各式各样的游乐设施便映入眼帘，它们像一颗颗璀璨的明珠，镶嵌在这片欢乐的土地上。过山车如同一条蜿蜒的巨龙，时而冲上云霄，时而俯冲而下，让人心跳加速；海盗船则像一艘在波涛汹涌的大海中航行的船只，忽高忽低，让人尖叫连连。而那摩天轮，则是乐园中的温柔巨人，缓缓旋转，带我们俯瞰整个乐园的美景。

除了刺激的游乐项目，游乐园还是美食的聚集地。炸鸡的香脆、奶茶的甘甜，每一种美食都让人垂涎三尺。在这里，我们可以大快朵颐，享受美食带来的愉悦。

我最喜欢的游乐项目是玩碰碰车，它能让我体验到互相碰撞的刺激，让我感觉自己仿佛变成了一名赛车手，在赛道上驰骋。“妈妈，你快来和我一起玩碰碰车吧！”我兴奋地邀请妈妈。妈妈微笑着摇摇头：“我就不去了，你玩得开心就好。”

我独自体验了碰碰车带来的惊心动魄。结束后，妈妈问我：“要不要买点什么好吃的？”“当然要！”我回答。妈妈给我买了我最爱的奶茶，那甜蜜的味道让我回味无穷，让我感到无比的幸福。

在游乐园里，我们可以放下日常的忙碌，享受一段无忧无虑的时光。当游玩结束，我看到出口处那些绚烂的花朵和翠绿的植物，它们在阳光的照耀下显得格外生机勃勃。我期待着下一次，我们还能再次来到这里，继续我们的欢乐之旅。

(lauxsae son raiz： Cinz Cozli / 指导老师：覃作利)