Gou ngoenzngoenz ngiengxyawj benq mbwn sang haenx, seiqhenz cungj dwg ndoengfaex. Ngoenzneix, gou yaek deuz gizneix bae, bae yawjyawj gingjsaek baihrog.

Gou daj gwnzbya buet daengz dinbya, daeuj daengz dieg seng ndeu, gizhaenx miz haujlai doengzdoih. “Ba” mbouj rox dwg gijmaz buet haeuj ndang gou. Gou ngaem gyaeuj yawj, yienzlaiz dwg gyoengq bya iq ndeu, gyoengqde duz riengz duz yawjdaeuj lumj saihoengz. Gyoengqde mwngz yawjyawj gou, gou yawjyawj mwngz, ngeizvaeg cam:“Gou baenzlawz mbouj raen mwngz gvaq?” Gou naihsim gej naeuz:“Gou daj dingjbya baihhaenx guhcaeg buet roengzdaeuj.”

Gyoengqde yawj daeuj yaek mbouj saenq, ndaw sim haengjdingh siengj: Daj bya sang haenx buet roengzdaeuj, senq hawq lo, baenzlawz lij ndei baenzneix ne？

Gyoengq bya iq dingq gou gejnaeuz gvaqlaeng yienznaeuz lij miz di mbouj saenq, hoeng hix gig vaiq ciepsouh gou lo. Gyoengqde caeuq gou naeuz, gizneix dwg gunghyenz, vunzlai ciengzseiz youq gizneix byaijyouz、guhcaemz、lienhndang. Sawqmwh, miz doxgaiq doek haeuj da gou, gou yaep- yaep lwgda cij yawj ndaej saw, yienzlaiz dwg mbaw faex ndeu daj gwnz gofaex hung doek roengzdaeuj. Gou coengzlaiz mbouj raen gvaq gofaex lawz hung baenzneix daegbied baenzneix, mbaw de lumj noegbyoem dahsau raeznangnang, gou iet fwngz couh gaem ndaej. Gofaex hung riunyumj cam gou:“Baenzlawz mbouj raen mwngz gvaq ne?” Gou naj loh riu naeuz:“Gou ngamq daengz gizneix.” Cam bya iq le, gou cij rox gode dwg goengfaexliux, de dwg goliux bi- ndwen ceiq geq haenx.

Daengz gyanghaemh, gou cunjbei dauqbae lo. Goengfaexliux naeuz hawj gou:“ Nyez ha, gyanghaemh giz dou gyaeundei raixcaix, yawj le caiq dauqbae ba!” Sing vah de ngamq dingz, gou couh dingqnyi vunzlai gangjvah cijcij cetcet. Miz vunz hai le yinhyoz, youq gvangjcangz diuq foux; miz vunz youq henz goengfaexliux byaijbyaij youzyouz; lwgnyez caemh youq guhcaemz, yaep ndeu buet daengz gizneix, yaep ndeu buet daengz gizhaenx, youq gwnz mbaek diuq hwnj diuq roengz lumj duzdoq iq. Henz daemz, lij miz gyoengq lwgnyez ndeu cingq aeu soujgih rongh raemx, yungh re iq gaeb bya. Ndawde miz lwg sau iq ndeu seiqhenz humx rim vunz, yawj daeuj de dinfwngz gig ndei. De cingq ciensim cimyawj gwnz raemx, lwgnyez youq henz ndang de caenx bae caenx dauq. Sawqmwh, de mbouj rox ngaiz byawz caenx laemx lo, gou siengj bang de hoeng mbouj rox baenzlawz guh. Caeklaiq miz dah sau iq ndeu gibseiz gaem ndaej de, gou cij sim mbaeu roengzdaeuj.

Gvaq ndaej yaep ndeu, boux riengz boux baema ranz lo, ndaw gunghyenz ciemhciemh caemrwg roengzdaeuj, ndaundeiq ciencien fanhfanh lumj ninz youq ndaw raemxrij.

Youq gunghyenz youzlangh ngoenz ndeu, gou cij rox, yienzlaiz seiqgyaiq baihrog gyaeundei baenz- neix, geizheih baenzneix, ndeigyaez baenzneix. Daj ngoenzhaenx daeuj, gou moix singhgiz cungj daj gwnzbya guhcaeg buet roengzdaeuj, bae damqra seiqgyaiq baihrog, caen dwg angq- yangz mbouj naiq ha!

(Fan Yuiyaj raiz /Lij Yanghlenz hoiz)