1 nyied 12 hauh, Cunghgoz Yinzminz Cwngci Hezsangh Veiyi Gaiq Cibsam Gvangjsih Bouxcuengh Swcigih Veijyenzvei Baez Hoih Daih- sam youq Nanzningz haimuq.

Aen hoih wnggai camgya veijyenz 682 boux, caen daengz 644 boux, hab gvidingh soqvunz.

Sunh Daveij、Vangz Sinhfu、Ciz Sauconh、Fei Ciyungz、Vangz Cinvaz、 Cenz Yozmingz、Couh Cwngzfangh、 Vangz Naijyoz、Hoz Sinhhing、Vuh Gyahsi、Liuz Yungjmeiz、Bungz Genmingz caeuq Luz Nwngzgan daengj youq cujsizdaiz baiz daih’it naengh.

Swcigih Dangjveij lingjdauj Cinz Gangh、Lanz Denhliz、Vangz Veizbingz、 Fangz Lingzminj、Cinz Yizginh、 Nungz Swnghvwnz、Hij Yungjgo、Couh Yigez、Cangh Gwz, youq Nanzningz Daengx Guek Yinzda Vanzging Caeuq Swhyenz Baujhoh Veijyenzvei cujyin veijyenz Luz Sinhse, Swcigih Yinzda Cangzveijvei、Cwngfuj lingjdauj banhswj cwngzyenz, boux cujyau lingjdauj bingdoih cap youq Gvangjsih, Swcigih lizduiyouh cwngswngjgiz dungzci geq, gizyawz swngjgiz lingjdauj daengj daengz hoih cukhoh.

Sunh Daveij daibyauj Cwnghez Gaiq Cibsam Gvangjsih Bouxcuengh Swcigih Veijyenzvei Cangzvu Veij- yenzvei guh gunghcoz baugau. Baugau daezok, bi 2025 dwg bi satbyai “cibseiq haj” gviveh, hix dwg bi youqgaenj caenh’itbouh cienzmienh haeujlaeg gaijgwz. Swcigih Cwnghez caeuq aen cangzveijvei de aeu laemxsim mbouj bienq dingjmaenh Cunghgoz Gungcanjdangj cienzmienh lingjdauj hong cwnghez, gaenjndaet hopheux haenqrengz raiz bien faenzcieng Gvangjsih gij yendaiva yiengh Cungguek hawj coenz genyi cammaeuz saehguek, caezhoz doidoengh caenh’itbouh cienzmienh haeujlaeg gaijgwz byaij onj bae gyae, soujcingq cauhmoq gaenxmaenx laebcaez guhndei aen gihci cidu guhhong cwnghez, ak giek maenh goek haenqrengz gyagiengz hwnqguh cwnghez bonjfaenh. Aeu engqgya gaenjndaet doxgiet youq seiqhenz Cunghgung Cunghyangh aeu Siz Ginbingz dungzci guh goek, youq Swcigih Dangjveij giengiengz lingjdauj baihlaj, fatyiengz conzdungj gijndei, geiqmaenh cwngci cwzyin, comz gij rengz hung daengxcungq lwg Gvangjsih doxgiet buekguh, bang haenqrengz raiz bien faenzcieng Gvangjsih gij yendaiva yiengh Cungguek guh’ok goengrengz engq hung.

Cinz Gangh daibyauj Swcigih Dangjveij cukhoh aen hoih hai swnh. Cinz Gangh daegbied gangj daengz, seizneix, Gvangjsih cingq dwg duenh youqgaenj hwngfat baenaj, cingq dwg aen seiz ndei guh saeh cauhnieb. Raeuz aeu dingjmaenh aen swhsiengj sevei cujyi miz daegsaek Cungguek seizdaih moq Siz Ginbingz guh dazyinx, haeujlaeg gvancez doeksaed gij iugouz youqgaenj Siz Ginbingz cungjsuhgi lwnhgangj hong Gvangjsih, caezhoz、 haenqrengz, caezcaemh guh ndei gij hong satbyai “cibseiq haj”, boiqhab maeuzveh hwngfat “cibhaj haj” gviveh, haenqrengz raiz bien faenzcieng Gvangjsih gij yendaiva yiengh Cungguek. Daengx gih gak gaep cwnghez cujciz caeuq gyoengq cwnghez veijyenz aeu fatyiengz conzdungj gijndei, geiqmaenh cizcwz sawjmingh, dingjmaenh dangj lingj- dauj、dungjyiz cansen、minzcuj doxyaeng giethab ndeindi, gaenjndaet hopheux gij baijbouh hong Swcigih Dangjveij, cungfaen fatok gij cozyung gihgou cienmonz doxyaeng, gyagiengz swhsiengj cwngci yinxlingx, lai canhcwng yicwng, lai gangj coenz miz yungh、 lai ok banhfap ndei, yungh gijndei cidu caez ok rengz ceiq hung, engqgya gvangqlangh comz gij rengz caeuq dungxcaiz gak gizdieg, caezhoz hwnqguh aen Gvangjsih maenghndei seizdaih moq. Daengx gih gak gaep dangjveij aeu cuengq hong cwnghez daengz hong daengx buenz bae maeuzveh doicaenh, haenqrengz haeujcoengh cwnghez hengzguh ciznwngz, miz saeh lai doxyaeng、 bungz saeh lai doxyaeng、 guh saeh lai doxyaeng, dingq ndei、lai yungh gij yigen genyi yinzminz cwnghez, gyagiengz hwnqguh cwnghez lingjdauj banhswj caeuq ganbu duivuj, bang cwnghez cujciz guh hong cauh diuzgienh ndei, netsaed doidoengh hong cwnghez gih raeuz hwngfat ndei saed.

(daj 《Gvangjsih Yizbau》 aeu daeuj genj hoiz Cinz Yizcwz Loz Canghlieng Vangz Veij)