1 nyied 13 hauh, Gvangjsih Bouxcuengh Swcigih Gaiq Cibseiq Yinzminz Daibyauj Daihhoih Baez Hoih Daihsam youq Gvangjsih Yinzminz Veidangz haimuq.

Aen hoih wnggai daengz 677 boux, miz 643 boux daibyauj camgya aen hoih haimuq, hab fapdingh soq- vunz.

Swcigih Dangjveij suhgi、daihhoih cujsizdonz cangzvu cujsiz、caephengz cujsiz Cinz Gangh cujciz aen hoih.

Daihhoih cujsizdonz cangzvu cujsiz、caephengz cujsiz Vangz Veizbingz、Fangh Cunhmingz、Cangh Yaujginh、Hoz Vwnzhau、Vangz Veijgingh、Luz Yenbenj、Yangz Cingvaz、Liuz Youjmingz youq cujsizdaiz baizdaeuz naengh.

Swcigih cujsiz Lanz Denhliz daibyauj Swcigih Gaiq Cibseiq Yinzminz Cwngfuj coh daihhoih guh cwngfuj gunghcoz baugau. Baugau faen baenz song dingz: Dauqyawj hong bi 2024, moegbiu yinvu caeuq hong cungdenj bi 2025.

Lanz Denhliz naeuz, bi 2024 dwg Cunghvaz Yinzminz Gunghozgoz laebbaenz 75 hopbi, dwg bi youqgaenj saedyienh “cibseiq haj” gviveh moegbiu yinvu. Siz Ginbingz cungjsuhgi lai baez guh cijsi hong Gvangjsih, Dangjcunghyangh、Gozvuyen okdaiz baenzroix cwngcwz、banhfap hungnaek, nyoengxhwnj gij saenqsim caeuq ceiqheiq daengx gih gak cuz ganbu ginzcung doxgiet buekguh lai raixcaix. Raeuz haeujlaeg gvancez doeksaed gij iugouz youqgaenj Siz Ginbingz cungjsuhgi lwnhgangj hong Gvangjsih, gaenjndaet hopheux aen yinvu daihdaeuz hwngfat ndei saed neix caeuq aen yinvu canloz gwzgiz hwngfat moq neix, gyavaiq hwnqguh “it gih song dieg it suen it roenloh”, doidoengh ginghci yinhhengz cungjdaej onjdingh、ndaw onj ndaej baenaj.

Lanz Denhliz naeuz, bineix dwg bi satbyai “cibseiq haj”, hix dwg bi youqgaenj caenh’itbouh cienzmienh haeujlaeg gaijgwz. Raeuz yaek aeu aen swhsiengj sevei cujyi miz daegsaek Cungguek seizdaih moq Siz Ginbingz guh dazyinx, cienzmienh gvancez gij cingsaenz Ngeihcib Daih caeuq Ngeihcib Gaiq Ngeihcung、Samcung Cienzhoih Dangj caeuq Aen Hoih Hong Ginghci Cunghyangh, gvancez doeksaed gij cingsaenz Gaiq Ngeihcib Cunghyangh Gijveij Baez Hoih Daihseiq, haeujlaeg gvancez doeksaed gij iugouz youqgaenj Siz Ginbingz cungjsuhgi lwnhgangj hong Gvangjsih, aeu couqmaenh gij eiqsik caezcaemh Cunghvaz Minzcuz guh sienqmeh, gejcuengq swhsiengj、cauhmoq gouz bienq， coh haij maeuzak、hailangh hwngfat, dingjmaenh aen giekdiuh daeuz ndaw onj ndaej baenaj, caezcingj cinjdeng cienzmienh gvancez aen leixniemh hwngfat moq, gaenxmaenx fugsaeh caeuq yungzhaeuj aen gwzgiz hwngfat moq, netsaed doidoengh hwngfat ndei saed, comzyawj hwnqguh aen canloz “it gih song dieg it suen it roenloh”， caenh- itbouh cienzmienh haeujlaeg gaijgwz, hawj doiqrog haicuengq lai miz suijbingz, hwnqguh aen dijhi canjnieb yendaiva, dungjcouz hwngfat caeuq ancienz ndei bae, doeksaed gij cwngcwz hunggvangq lai miz yungh de, lai coi siuhfei、lai roengzgoek、lai hawj baihndaw aeuyungh、caeuq rogguek gaicawx lai ak, doidoengh ginghci laebdaeb dauq ndei, mboujduenh hawj bouxminz ndwenngoenz gvaq ndei, baujmaenh aenbiengz huzndei onjdingh, guhsat “cibseiq haj” gviveh moegbiu yinvu ndei saed, bang saedyienh “cibhaj haj” haidaeuz ndei roengzgiek.

Lanz Denhliz daegbied gangj daengz, dah haij ngamq hwnj langh, haenqguh cingq ngamj seiz. Raeuz aeu gaenjndaet doxgiet youq seiqhenz Dangjcunghyangh aeu Siz Ginbingz dungzci guh goek, youq Swcigih Dangjveij giengiengz lingjdauj lajde, caen ca caen guh、haenqheiq baenaj, roengzrengz hawj “cibseiq haj” souhong ndaej swnh, haenqrengz raiz bien faenzcieng Gvangjsih gij yendaiva yiengh Cungguek！

Ciuq aen hoih anbaiz, daihhoih saemjcaz gij baugau Swcigih Yinzminz Cwngfuj mizgven swcigih bi 2024 gozminz ginghci caeuq sevei hwngfat giva caephengz cingzgvang caeuq bi 2025 gozminz ginghci caeuq sevei hwngfat giva caujanq、mizgven daengx gih caeuq swcigih bonj gaep bi 2024 yawhsuenq caephengz cingzgvang caeuq bi 2025 yawhsuenq caujanq.

(daj《Gvangjsih Yizbau》 aeu daeuj genj hoiz Gungh Vwnzyingj Cinz Yizcwz Cungh Siujgij Loz Canghlieng )