Lajmbanj lumjbaenz fuk veh saek lai, hawj vunz simmaez gwdgwd; lajmbanj lumjbaenz hot fwen moqyat, sawj vunz simlangh ywdywd; lajmbanj lumjbaenz najriu daxmeh, dinghcoeb an’onj.

Mbwn ngamq wenj, sing gaeq- boux haen couh nyoegbyoengq gij caemdingh lajmbanj. Daengngoenz daj baihlaeng bya laeglemx loh’ok naj riu, lumj dahsau oiqnem najnyaenq ndeu. Gyoengq bya dak ndit, youq ndaw ndit saekgim, gyoengqvunz foenfoen daj ndaw fangzhwnz ndiu gvaqdaeuj, ngoenz nyaengqfoedfoed ndeu youh hainduj lo.

Daxbuz cuengq gyoengq bit gaeq senq foengxgyu’gyu haenx, gyoengqde huzhaz roemx bae coh aen buenz gueng haeux. Hoeng gyoengqde yawjraen aenbuenz byouqbyangbyang, couh lumj duzbing nei nemhumx daxbuz. Gaeqboux gag diuq hwnj sangsausau, maqmuengh baengh aen ndang sang cangq bonjfaenh ndaej gwn gijgwn ndaw fwngz daxbuz gonq, duzbit baetniuj aen caeghangx luenz de deuzhumhum, gip dwk “ga ga”luenh hemq, gaeqmeh hix youq henz “gu gu”heuh mbouj dingz, roeglaej “cici cetcet”youq gwnz faex yawj nauhyied.

Gwn ngaiz caeux le, malwg ranznden daeuj liuhranz. Meuzva iq yawjraen de, sikhaek gung hwnj aenndang, iet ok ganaj, daengx ndang bwn cungj daengj hwnjdaeuj lo, maenj “meuz meuz”, lumjnaeuz yaek caeuq duzde buek dai nei. Youq gwnz diegnywj gizgyae, gyoengq yiengz iq menhyauyau gwn nywj, saek seiz“mbe mbe” heuh geij sing.

Gwnz loh iq bakdou, nungzminz gwed gvak yaek roengz naz, gyoengqde miz gangj miz riu, doxdongx. Gou riengz daxbuz daeujdaengz reihbyaek, byaekheu iq senq couh daj ndaw namh iet gyaeuj okdaeuj, geizheih yiekyiek yawj seiqlengq; duhgak riengz gij fwen ndaw rumz haenx, mbouj dingz fouxdoengh; aen gve daenj mauh, youq ndaw rumz ngauznged……Fuk gingj- siengq hoenghhwdhwd neix caen ndei lai lo. Gou caeuq daxbuz mbaet gij byaek baenz aeu haenx, gwnz naj cungj riunyumnyum.

Ndithaemh ngeng ciuq byasae, ingj hoengz le gij fwjhoengz henz mbwn. Gyoengq vunz guh hong reihnaz sat le boux riengz boux dauqdaeuj, gwnz naj gyoengqde cungj miz riu, bineix wnggai lij dwg aen bi fungsou dem! Gwn caeuz le, miz mbangj vunz ok bae youz ga, doq byaij doq gangjgoj; gyoengq lwgnyez guh cozyez sat haenx, buet daengz gwnz gvangjcangz dwk lanzgiuz, guh’angq, buetbongh……

Mbwn laepmomj, ndaundeiq gwnz mbwn cix yaepda yepyep, ronghrib youq gwnz caz rum mbin bae mbin dauq. Duzgoep mbouj rox ndoj youq gizlawz “gva gva” ciengqgo hwnjdaeuj, duzbid hix “ci ci” heuh riengz bak, lumjbaenz hot go coi ninzndaek nei. Youq ndaw sing duzgoep heuh, mbanjbya iq menh- menh loqfangzhwnz vanswdswd.

Neix couh dwg aen lajmbanj gyaeundei lumj sei lumj veh nei.

(Gyangh Mingzsenh raiz / Loeg Haijdaek hoiz)