Haetromh codoeng, nyoengx cueng muengh bae, seiqgyaiq lumjbaenz hwnz ndeu ndawde couh deng gij nae hausak haenx cwgoemq lo. Naefaiq baenz limq baenz limq mbinfifi, lumjbaenz duz cinglingz dwggyaez nei, conndonj seizhoeng, mbindoek youq ndaw sei ciuhgeq. Vunz ciuhgeq ndiep nae, couh dangq nywjheu ngah fwncin. Gyoengqde youq ngoenz seizdoeng humx saeuq byoqfeiz, yaengx cenj gwn laeuj, da yawj gij nae mbin rogcueng, ngonciengq ok baenz souj baenz souj sei daeuj. Gij sei neix couh lumj baenz fuk baenz fuk vehraemxmaeg, dawz gij gingjsaek seizdoeng caeuq cingzgamj bouxvunz doxhab youq itheij. Hawj dou con gvaq duzngaeuz cien bi haenx, maijyawj gij naefaiq daj ndaw sei mbin daeuj haenx.

“Sawqmwh byonghhwnz rumzcin daeuj, cien go fanh go valeiz hai.” Gij nae laj bit vunz ciuhgeq, caenh dwg baenzhaenx lingzdoengh youh hamz- miz eiqsei. Youq ndaw souj sei neix, gij nae henz guek lumj seizcing unqswnh, lumj valeiz hoenghhai gyaeundei. Gij nae sawqmwh daeuj daengz haenx, hawj vunz saetangq, hix caenh yienjok gij saenzgeiz aen swyenz.

“Douhaz sing ma raeuq, hwnz rumznae vunz dauq.” Youq gyang- hwnz rumz nae doxgyaux haenx, boux canghsei Liuz Cangzgingh Dangzdai haenx, mboujdan dingqnyi sing ma raeuq, lij miz gij sing vunz byaij daj gizgyae dauqma dem. Gij yamqdin neix gaenjsisi byaijbae, baihnaj lumjnaeuz miz aenranz heuh de, miz vunzcaen maqmuengh. Nae, yienz- naeuz daiqdaeuj mbwnheiq nitgyoet, hix daiqdaeuj le gij maqmuengh doxcomz.

“Goenggeq naengh ruzgyax, gag ep bya naedah.” Youq ndaw doz gag ep naedah Dangzdai sanjvwnzgyah Liuj Cunghyenz raizveh haenx, mbwndeih caemrwdrwd, seiqlengq hoengqvangvang, naehung cwgoemq sojmiz singyaem caeuq rizdin, caenh miz goenggeq dog dinghcubcub naengh henzdah ep bya. Fuk veh neix lumjbaenz daiq dou haeuj aen cingsaenz seiqgyaiq youh godan youh nyangqnyw he, hawj dou yawjraen gij ndokgaengq caeuq gij damjliengh vwnzyozgyah. Nae, mboujdan dwg gij funghgingj aen swyenz, hix dwg gij ndaej beij naeuz cingsaenz vunz raeuz. De haenhndei vunzseiq maenh lumj rinfanx、ngiengxngwd gag ak.

“Yaek doh Vangzhoz nae saek dah, yaek bin Daihangz siet goemq bya.” Naehung fung bya, roenloh yungyiemj, canghsei Lij Bwz vanzlij aeu bin Byadaihangzsanh, cungj cingsaenz mboujlau yungyiemj、daih- damj doxbae neix, cungj cengqheiq aekgvangq、dwkhoenx gannanz neix, hawj vunz danqheiq caeuq saenqhwnj. Nae, dwg gij lokhawj swyenz, dwg gaujniemh sengmingh.

“Naehau dauq yiemz seizcin haemh, con gvaq mbawfaex mbinfifi.” Seizcin yienzbonj dwg aen geiqciet fanhfaed ndiudauq ndeu, caengz liuh daengz dauq deng naehau ciengj youq baihgonq bae. Canghsei Dangzdai Hanz Yi dawz naehau beijbaenz bouxvunz, naehau ienq seizcin daeuj nguh lai, doq gag bienq ndang baenz “va’mbin” ndonjbyaij youq geh faex ndaw gyanghongh. Cungj siengjngeix geizmiuq neix, hawj gyoengqvunz doiq gij yienghsiengq naecin haenx engqgya rox liux, gamjsouj engq laeg.

Gij naefaiq mbindoek youq ndaw sei ciuhgeq haenx, dwkdoeng le aen douhung hawj dou doxrox gij cingzgamj canghsei haenx. Gyoengqde yungh gij vahcoenz genjdanh suglienh caeuq gij yienghsiengq sengdoengh haenx, dawz swhgeij roxyiuj swnghhoz, doiq swyenz gingqcungh caeuq roxyiuj singqheiq vunzbiengz, sij ndaej saeqnaeh caezcienz. Moix gawq sei, moix cih saw, lumjbaenz doek haeuj ndaw sim dou, hawj dou gamjsouh daengz gij cingzlaeg caeuq cinghseuq naefaiq.

Gij nae ndaw sei ciuhgeq, gag miz gag yiengh yinhfeih caeuq eiqsei laegna. De dwg godog, dwg ngeixnaemj, hix dwg gij raeujrub ndaw ranz, dwg gij dauhleix ndaw swnghhoz. Hawj dou cehcimq youq seiqgyaiq naedoeng, gamjsouh faenh gyaeundei caeuq simnyap doek youq ndaw sei ciuhgeq haenx.

(Goz Cinh raiz / Yinj Fuzgen hoiz)