Lij Danenz caeuq Vangz Gencingh gapdoengz le, couh heuh Lungzingh caeuq lauxdoengz moq bae ranz de gwn laeuj, youh heuh beixnuengx doengzdangz daeuj doxcaez nauhyied. Yienznaeuz de mbouj dwg caiz lai sing gok, lai bi daeuj, de daiq vunz ndaw mbanj caeuq mbanj gaenhlaenz okbae guh hong dajcang, gangj ndaej daengz guh ndaej daengz, miz byawz mbouj haenh de！

Vangz Gencingh roxnyinh, miz lauxdoengz bonjsaeh baenzneix hung, gijmaz saehcingz banh mbouj swnh！

Vunz ndaw mbanj bingzciengz maij haeuj laeng de bae gangjgoj, ngoenzneix ndaejnyi naeuz de daiq lauxdoengz moq dauq, cungj siengj yawj mbat ndeu doengz neix baenzlawz yiengh. Seizhaenx cingq dwg seiznit, cib lai boux vunzmbwk youq ranzdajcawj byoqfeiz, raen lauxdoengz moq lauxlaux saedsaed naengh dwk yawj vunzlai caimoiz, miz boux beixnangz ndeu sing daemq naeuz:“Dwg duz cwzdaeg ndaem ndeu.” Gyoengq vunzmbwk riu dwk yungh fajfwngz fung bak, mbouj hawj gyoengq vunzsai ranzding ndaejnyi.

“Vunz ndaem cixbah hangzbaz cix soem dem.”

“Gij byoem de ngutngut ngeungeu lumj byozrum.”

“Gou yawj lumj rongzgaeq faeg gyaeq”

Gangjdaengz Lungzingh, gyoengq vunzmbwk haenh naeuz Lungzingh dwg boux vunzsai yiengh gyaeu ndeu, youq Namzningz guh seng’eiq lai bi, miz geij aen bouqdiemq, song bi gonq hai aen cangj ndeu, guh niswjfwnj, couhdwg hoi gvet ciengzhau yungh, ngoenzneix song lauxdoengz yawj hong laeuz le, Lij Danenz heuh Vangz Gencingh bae cimh Lungzingh aeu hoi. Lungzingh miz geijlai angq!

“Aenq aeu geijlai bau?”Lungzingh cam, songda de gig rongh, rongh dwg song lauxdoengz hawj, dwg rongh maqmuengh!

（11）