Naeuz bouxmbwk bouxsai,

Wnggai aeu roxndeq,

Ndiep bouxboh bouxmeh,

Aeu roxndeq cingq baenz.

Ndiep bouxboh bouxmeh,

Roxndeq guh couh deng,

Bouxboux bohmeh seng,

Guh mbouj deng doxnaeuz.

Meh raek(bazlwg) raeuz baenz eng(lwg),

Seng raeuz ciengx raeuz geq,

Naeuz gak boux roxndeq,

Ndiep meh raeuz ciengxlwenx.

Bohmeh seng ndang raeuz,

Muengh raeuz hung baenz vunz,

You daenj caiq you gwn,

Aenhwnz mbouj baenz ninz.

Bohmeh seng ndang raeuz,

Caiq aeu haeux daeuj bwnq,

Ngoenz raeuz hung baenz vunz,

Miz gwn heuh bohmeh.

Daengq bouxmbwk bouxsai,

Wnggai ndiep bohmeh,

Naengh miz saek gaiq nyeq(noh),

Hawj bohmeh gwn gonq.

Hungmbwk dwg bohmeh,

Gyoengqde ciengx raeuz hung,

Naeuz gak boux daengxcungq,

Aeu cunhcung(aeueiq) bohmeh.

Miz raemx cij miz bya,

Miz naz cij miz haeux,

Miz meh cij miz raeuz,

Yaek aeu ndiep bohmeh.