Namzningz faex lai, Lenzhozgoz bingz baenz “Singzheu”, gyangngoenz byaij gvaq laj faex, gwnz gyaeuj lumj gang liengj nei mbouj deng ndit ciuq. Geij cieng mbawhenj loenq youq gwnz namh, seizcou yaek daengz.

Cinz lauxbanj “ndei lajmbwn” dajcang gunghswh youq Namzningz gig mizmingz, hong yied daeuj yied lai, ngamqngamq ciep ndaej dan hong ndeu, dwg song doengh daihlaeuz vunzyouq haenx, moix doengh samcib ngeih caengz, gauhdang canghsiuh, aeu guhbaenz vaiq di hawj boux cawx ranz haeujbae gvaq cieng.

Sam ndwen seizgan gyau hong, seizgan gaenj diuzrap naek, hong gizyawz mbouj gangj, hong gvethau dwg aen hong ceiq labcab ndeu, song doengh daihlaeuz aeu hajcib boux vunz guh, moix doengh aeu ngeihcib haj boux vunz.

Cinz lauxbanj ma ranz, naengh gwnz sahfaz mbouj doengh saek di, mehyah de gaenq rox gij singqcingz de, youq baihrog bungz daengz saehcingz mbouj swnhleih, ma ranz couh dinghdingh naengh dwk, gaej bae gauxca de, gwn caz de gag guenq raemx cung mbawcaz, couhcinj gwn gaemz raemxheu, de hix caenfwngz bae ndingq. Mehyah cij guenj cawj haeux, guh saeg. Song boux lwgnyez,daeg ndeu, dah ndeu, gaenq daihhag bizyez gag miz hong, de mbouj maqmuengh lwgnyez ciep ban de, hong dajcang raemx laeg mbouj ndei guh, de dajsuenq guh daengz caetcib bi couh daengx, bineix ngamq ndaej hajcib bi, byoem gaenq hau liux, seizneix de ceiq yousim dwg ra mbouj ndaej boux gvethoi, Lij Danenz cienz bau mbouj cuengqsim, lau couh lau boux vunzdog ndeu bau song doengh daihlaeuz, guenj mbouj gvaqdaeuj, cizlieng couh yaez, gij saehcingz sai seiz sai rengz sai cienz deng lai lo, bietdingh aeu song vunz gag bau doengh ndeu. Vangz Gencingh yiemz cienzhong noix, couh hawj de lai maenz ndeu ba, sawq dwk denva cam mbat ndeu.（8）