Doenghbaez, miz boux cangh- dwknyaen gungzhoj ndeu, coh de heuhguh Couh Yin, de guh vunz simsoh lauxsaed, hoeng aenvih ndaw ranz hoj lai, daengz gaenh samcib bi cungj caengz aeu ndaej mehyah.

Ngoenz ndeu haetromh, de caeuxcaeux couh hwnj bya bae dwknyaen, hoeng cigdaengz daeng- ngoenz yaek roengz bya lo cungj dwk mbouj ndaej saek duz, de cingq siengj ma ranz seiz, sawqmwh dingqnyi miz gij sing swenj gyangz he, yienzlaiz dwg youq godoengz sangsang gwnzde, miz duz hagsien ndeu cingq youq gyang nyauj duzyiuh buekmingh cugcak. Couh Yin gipmuengz yaengx hwnj gungnaq, “suk”sing ndeu, duzyiuh yak haenx couh deng nyingz doek roengzdaeuj lo, hoeng riengzlaeng Couh Yin couh roxnyinh gyaeuj ngunh da raiz, moengzloengz ndawde, yawjraen miz dahsau gyaeundei lumj dujva nei doiq bonjfaenh gangj:“Goyin, gou mbouj miz gijmaz bauqdap mwngz, neix dwg diuz bwn ndeu, hix dwg geu buh ndeu, dawz de longz ndang couh ndaej seizdoeng raeuj seizhah liengz, danghnaeuz mwngz mbouj yiemz, gou nyienh baenzciuh cungj fugsaeh mwngz. Ranz gou couh youq Mbanjyangzgeng, aen mbanj youq gwnz dingjbya ceiq sang baihdoeng haenx, danghnaeuz mwngz mbouj yiemz couh daeuj ranz gou guhcaemz baez ndeu ba.”Caj Couh Yin singj gvaqdaeuj, gaenq mbouj raen hagsien lo, dahsau hix mbouj raen ngaeuz, hoeng henzndang caen miz gaiq couznding gyaqciq ndeu. Mwhhaenx cingq dwg mboengq nit haenq, rumzbaek boqhuhu, mbwn nit dot haeuj goet haeuj ngviz, hoeng Couh Yin baez longz hwnj gaiq couz dahraix couh roxnyinh raeujrubrub. Ma daengz ranz le, de sij mbouj ndaej yungh gaiq couz, cix doeb ndei cuengq youq henz swiz, ninz mbouj ndaek seiz couh yawjyawj de, lumhlumh de. Miz vah gangj, lauxsaed lai couh bienq huk. Ngoenz ndeu, Couh Yin dawz gienh saeh neix itit ngeihngeih cungj lwnh bouxfouq ndaw mbanj liux. Byawz siengj daengz, bouxfouq neix dwg boux dam, swnh Couh Yin bae dwknyaen seiz, caeg aeu gaiq couznding doxdoengz daeuj vuenh gaiq Couh Yin bae lo. Haemhhaenx, Couh Yin dauqma le, ciuqgaeuq longz couz aeu raeuj, hoeng gaiq couz bienq ndaej caepcatcat, de vueng lo, gietdingh ngoenz daihngeih couh hwnjroen bae Mbanjyangzgeng cam mingzbeg.

Haet daihngeih, de daiq gungnaq daeuj daengz goekbya aen byaheu daengj soengz hwnj ndaw fwj bae haenx. Sawqmwh raq rumz he boq gvaqdaeuj, de cij roxnyinh daengx ndang unqnemnem, angqfwngfwng, byaengq da baez yawj, aiya, swhgeij haeuj daengz aen ranz gvangqlangh ndeu daeuj lo, hoeng vihmaz mbouj miz saek boux vunz youq? De sim siengj danghnaeuz gyoengqvunz gangj bonjfaenh dwg bouxcaeg swhgeij baenzlawz gangj ndaej cingcuj? De vueng dangqmaz, yamqdin couh buet ok bakdou bae, siengj mbouj daengz miz diuz faex he lanz loh de, de ngiengx gyaeuj baez yawj, yienzlaiz dwg boux goenglaux mumh haucakcak he, goenglaux doiq de caengz naeuz：“Mwngz caeg le gijmaz? Ciuq saed gangj daeuj!” “Goeng ha, Gou Couh Yin coengzlaiz mbouj guh caeg gvaq, mbouj saenq cingj mwngz saeuj ndang gou, danghnaeuz saeuj ndaej ok saekdi huqcang, aeu raemj aeu gaj nyaemh mwngz.”Couh Yin naeuz. Goenglaux cuengq roengz diuz faex, yiemzhaenq dwk naeuz：“Duz mameh lawz mbouj gwn haex, boux vunzhoj lawz mbouj dam caiz？Vaiq di ciu daeuj.” Couh Yin naeuz:“Hoiq yienz- naeuz hix siengj fatcaiz, hoeng coengzlaiz mbouj siengj aeu gijmaz yienzya, muengh goenglaux caz mingz!” “Mwngz gaem gung dawz naq mbouj dwg boux giep dwg maz?”“Dwknyaen gvaq saedceij sat lo, cieddoiq mbouj miz gijmaz siengjfap bae sieng vunz haih vunz!”“Mwngz gawqyienz dwg bouxdwknyaen, vihmaz raen duzyiuh gaemh hagsien seiz, mbouj mbat ndeu nyingz song duz, dauq cij nyingz duzyiuh gouq duzhag?” “Duzyiuh hangz iqnyieg, saedcaih mbouj miz dauhleix, hagsien cingqheiq simsoh, saedcaih mbouj miz coih, Couh Yin yawj mbouj gvaq, ndigah nyingz duzyiuh gouq duzhag.” Bouxlaux sijsaeq yawj dwk Couh Yin, deihdeih ngaek gyaeuj, de youh naeuz：“Mwngz baengh dwknyaen gvaq saedceij, nyingznaq ak, baihnaj gomakgam lij miz sam aen mak, mwngz ndaej sam naq couh nyingz doek gyoengqde mbouj?” Couh Yin sam naq okbae, sam aen mak laebdaeb doek dieg, goenglaux ngaek gyaeuj haenh ndei, mwhhaenx cingqngamj miz sam duz biengzbeih dangqnaj gyoengqde mbin gvaqdaeuj, goenglaux sam naq nyingz okbae, sam duz biengzbeih couh mbouj miz ingj mbouj miz riz lo. Couh Yin raen le, boiqfug dangqmaz, “boem” sing ndeu couh gvih roengzbae, naeuz：“Couh Yin caen dwg mbouj roxsoq, Couh Yin siengj baiqsae hag dinfwngz, gouz saefouh soulouz!”Goenglaux naeuz：“Ndei, gou miz dah dog, bineix ngeihcib, vunz swnzsienh, hoeng yienghceij yakyawj, miz ga naengz gabaiq, de caengz hap vunz, seizneix gou siengj boiq hawj mwngz, mwngz baenzlawz naemj?” Couh Yin ngeix yaep he, naeuz：“Cijaeu song boux habsim hab’eiq, de couhdwg yahndei, yienghsiengq baenzlawz mbouj youq- gaenj.”“Ranz gou hoj, cijmiz aen huzlaeuj rwix guh gyaqcang, mwngz nyienh sou lwi?”“Haeux byaek youq gyang fwngz, gimngaenz youq gwnz mbaq, cijaeu gaenx guh, ngoenzneix mbouj miz ngoenzcog miz!”Goenglaux lienzsing naeuz:“Bouxsimndei, vaiq hwnjdaeuj ba!”

Couh Yin ngamq ndwn hwnj- daeuj, sawqmwh aen ranz bienq ndaej daengx ranz fat rongh, cien gim va ngaenz, saeu doengz liengz nyawh, yiemzdou aen fuengz baih- haenx deng biengj hai, byaij ok dahsau gig gyaeundei he, Couh Yin daj gwnz daengz laj yawj de: Neix mbouj dwg dahsau ngoenzhaenx caeuq bonjfaenh gangjgoj haenx ha? Couh Yin cingq siengj haibak, dahsau dauq gangj gonq lo:“Goyin, bohndei gou……”Ciepdwk couh riunyumnyum yawj dwk Couh Yin. Couh Yin vueng ndaej saenz liux, gangj:“Sau ha, mbouj ndaej bw! Saefouh gou gaenq vih gou boiq bazndei lo.” Dahsau naeuz:“De couhdwg boh gou.” Goenglaux rub- rub mumh de, naeuz：“Seizneix hwnj, mwngz couhdwg lwggwiz gou lo.”

Daj seizneix hwnj, Couh Yin caeuq hagsau couh youq gwnzbiengz gvaq gij saedceij vuenyungz vandiemz lo.