Lij Danenz naeuz: “Gou dwg vih le ranz raeuz siengj ha, hong hix mbouj lai, doengh laeuz ndeu ngamq canh seiq fanh maenz, vihmaz song vunz bae faen?”

Mehyah de mbouj gangj vah lo, doxyouq cib bi, rox sim rox daej, caiq doxeuq roengzbae couh baenz doxceng, doxceng couh baenz doxdaj, de hix mbouj caemxndang, haeuj rug bae ninz.

Lij Danenz dwk denva hawj Cinz lauxbanj, naeuz Vangz Gencingh yiemz honggyaq daemq lai mbouj guh, de gag guh suenq lo, Cinz lauxbanj naeuz, gawqyienz Vangz Gencingh mbouj haengj guh, mwngz couh gag guh ba.

Doenghbaez betcib goujcib nienzdaih ra vunz deng bae ranz wnq roxnaeuz mbanj wnq cij ra raen vunz, seizneix denva baez bued naenx, geij miux cung couh lienzhaeh hwnj.

Lij Danenz vunzmeg gvangq, cib geij faen cung couh lienzhaeh ndaej seiqcib boux vunz, miz vunz ndawmbanj, miz caencik, beixnuengx, gyoengqvunz saenq de, lai bi daeuj, riengz de guhhong ndaej cienz vaiq, coengzlaiz mbouj yiemq cienzhong bouxlawz. Seizneix aen hong neix dwg daihgya bau roengzdaeuj guh, moix bingzfueng cibhaj maenz, cij bauhong mbouj bau liuh, gyoengqvunz gig nyienh’eiq guh.

Lij Danenz faenboiq seiqcib boux vunz youq gak aen laeuzcaengz, song boux guh caengz ndeu.

Doengh daihlaeuz neix, sang ngeihcib caengz, dwg laeuzsijsaw, caeuq Namzningz Doeng Hojcehcan doxgek mbouj gyae, bi’gvaq caep baenz, bineix dajcang, Cinz lauxbanj cienz bau roengzdaeuj, raemx、 dienh ancang, ciendeihbanj nemdiep, bakdou, conghcueng ancang, gij hong neix guh baenz le, gunghyinz guhsat deuz caez, seizneix dwg gvethau, bangxciengz caeuq denhvahbanj cienzbouh gvethoi, seiqcib boux gunghyinz caezsim gaprengz, song ndwen seizgan couh gvethoi caez doengh laeuz neix, Cinz lauxbanj niemhsou habgek hawj caez cienzhong, Lij Danenz canh ndaej seiq fanh maenz.

（7）