Bawx:

Gou guh hong ywenxywenx,

Cungj ndi dwen dwgrengz,

Mwngz dawz lan yenzyenz,

Ngoenz doxceng daengz haemh.

Goeng:

Gou sim seih goj ndei,

Cix vei bawx mbouj soh,

Saek seiz cawx ndaej noh,

Cix goemqndoj gag gwn.

Bawx:

Cawx noh ma cien youz,

Mwngz youh naeuz gou nyen,

Gyoengq lan youq henz demq,

Lij lw gvemq hawj mwngz.

Goeng:

Langh ndaej gwn saek vanj,

Ngoenz gangj dwk rwzrungz,

Ndaej gwn can duh mwngz,

Raemh cib hwnz ndi liux.

Bawx:

Gou bae mbanj gwn laeuj,

Rom nohgaeuq ma mwngz,

Ndaej gwn gvaq youh lumz,

Nanz daih mwngz le goeng.

Goeng:

Bang mwngz guh reihnaz,

Rap fwnz haz hix aeu,

Caih rap naek rap mbaeu,

Ngoenz gwj aeu ma mwngz.

Bawx:

Goengrengz mwngz nyaenx bengz,

Guh di ceng daengz haemh,

Caengz guh couh sien naemh,

Miz hauhnyaenx guh vunz.

Goeng:

Geu buh gaeuq gemj gyaq,

Mwngz cix vax ma goeng,

Daenj ndang youh mbouj soeng,

Heuh goeng yienghlawz daenj.

Bawx:

Boux miz ngaenz daenj lengj,

Lij doxceng bae aeu,

Lumj ndaw ranz faenh raeuz,

Yawz lij naeuz ndi ngah.

Goeng:

Ngoenz bang mwngz langh vaiz,

Gouh haiz ndi miz daenj,

Langhseih caij deng oen,

Din foeg baenzlawz guh.

Bawx:

Ndaw ranz geij gouh haiz,

Mwngz laihdai ndi daenj,

Gouhgouh cungj naeuz gaenj(ndaet),

Canggyaj daenj ndi roengz.

Goeng:

Fwn doek langh vaiz homq,

Cix deng soemx lohdin,

Ngoenzngoenz mwngz goj raeuq,

Canggyaj lumz ndi cawx.

Bawx:

Ngoenzcog gou bae haw,

Itdingh cawx ma mwngz,

Ndi ndaej ndi dwg vunz,

Nyengh hawj mwngz muenxeiq.

Goeng:

Langh mwngz gangj hauhneix,

Gou miz heiq dauq roengz,

Langh mwngz rox gyaez goeng,

Gou dauq soeng gaemz heiq.

Bawx:

Bawx uk ndi rim cang,

Goeng caez bang cixbah,

Langh loek saek coenz vah,

Goeng geij nyah geij ndaq.

Goeng:

Bawx rox singj hoiz dauq,

Goenglaux sim cix an,

Miz vah caez doengz gangj,

Sim van ranz cix hwng.

Habciengq:

Gaej doxnyaux doxceng,

Guh hong hengz doiq loh,

Goeng caeuq bawx caez soh,

Guh lohloh cungj hingz.

Goeng hix rox guh goeng,

Bawx hix doeng cix ndaej,

Langh mbiengjlawz mbouj seih,

Daihcaez rox cix baenz.

Fwen guh daengz gizneix,

Naeuz gak vih geiq cing,

Cienz ranz caez doengzsim,

Dij gvaq gim gvaq ngaenz.

Cienz ranz caez doengzsim,

Fwngz gaem cim ndaej yungz,

Goeng ndij bawx caez doeng,

Gya cix hwng cix hoengh……

（2 sat）