Daj iq daengz hung, gou doeg gvaq haujlai sei, mbangj sei yungh daeuj biujdap gij simcingz caeuq eiqceiq swhgeij, mbangj sei yungh daeuj biujdap gij cingz swhgeij siengjniemh vunzranz, lij miz mbangj sei yungh daeuj biujdap gij cingz baengzyoux lizbiek. Youq ndaw gawqsei gou doeg gvaq haenx, gou ceiq haengj gawq sei haenx dwg “giemqbauj raeh daj rinbaenz ok, vamoiz hom daj nitgyaengj daeuj”. De couh lumj boux baengzyoux ndeu gujli gou: Yaek siengj miz souhaeuj, couh itdingh roengzrengz mbouj daengx, haekfug hojnanz.

Lij ndaejgeiq seiz ngamq hai- nduj hag diuq cag, gou cungj diuq mbouj ndei, yienghneix ndaw gyaj- seizhwngq, gou gietdingh dingjguh moix ngoenz cungj diuq cag. Seiz vunzwnq youq ndaw ranz gunghdiuz soengset yawj densi, gou cix youq rog ranz ndatfwdfwd haenx baez mbat baez mbat lienhguh. Daxmeh youq henzgyawj yaepyaep daezsingj:“Song fwngz mbe hai, ndwn soh!” Couh yienghneix, famhloek、daezsingj、gaij- deng, caiq famhloek、caiq daez- singj、caiq gaijdeng. Guh baez liux baez moq, diuzcag lij ciengzciengz fad deng gwnz gyaeuj gou. Yienghneix dingjguh le geij ngoenz, dungcoz doeklaeng deng lo. Menhmenh, daj ndaej laebdaeb diuq 2 aen demgya daengz 5 aen、10 aen、30 aen…… Ndawgyang hix aiq miz seiz yawj mbouj raen doxbae roxnaeuz dauqlaeng, hoeng yied dwg simgaek yied dwg diuq mbouj ndei. Gou nanzsouh lai lo, hainduj doeknaiq saetmuengh vanzlij siengj yaek vutvak mbouj diuq lo. Seizneix daxmeh hozraez nai gou naeuz:“Mwngz lumz le song gawq sei nem henz daizsaw mwngz haenx lo ma? ‘Giemqbauj raeh daj rinbaenz ok, vamoiz hom daj nitgyaengj daeuj.’ De lwnh raeuz, yaek siengj baenzgoeng, mboujdan aeu roengzrengz, engq aeu miz gij saenqniemh dingjguh roengzbae. Mwngz diuqyat baez ndeu cungj aiq depgyawj baenzgoeng yamq ndeu.” Dingq le gij vah daxmeh, gou youh nyoengxgaeuq saenqsim laebdaeb dingjguh roengzbae.

Hai hag le, lauxsae gauj dou diuq cag, gou ndaej le cingzcik maenhndei, gou angq lai lo, engq dwg gyo’mbaiq ndaw gyajseizhwngq gij duenhlienh moix ngoenz hanh lae lumj fwn haenx.

Mbouj nanz gaxgonq ngamq ingj le denyingj 《Manhmaz Ndatnad》, dahnax Gyaj Lingz vih yienj ndei bouh denyingj neix guh hawj ndang byoem bae 100 lai gaen, vihneix de hix baenz buengjyiengh gikfat ceiqheiq daihgya. Haujlai vunz aiq mbouj ndaej baenz dahnax Gyaj Lingz, hoeng raeuz cungj ndaej ciumauh gij gaxgonq swhgeij. Ndaw saedceij gij deuqnyex lairaeuh, hawj raeuz diemjdawz daengdap ndaw sim, vihliux swhgeij engq maenhndei lai roengzrengz ba!

(Lij Swjmingz raiz / Lingz Hinghningz hoiz)