Youq seizneix, ndaw mbanj miz geij boux laux ganj gvaqdaeuj, gipmuengh hwnjbae lanz naeuz：“Yahcawj ha, mwngz mbouj rox ne, de dwg vunzbag ha, de youh mizrengz youh yakrwix, vunz mbanj dou mbouj miz byawz gamj nyex de.”Dingq daengz gij vah neix, mbong vunz mehcawjdieg deng hag dwk hix ringx hix ruenz, baenzlaenz deuzbae lo. Gungh Vwnzfangh caeuq geij boux laux neix doq gangj doq riu ma ranz lo.

Naenx Ganjcungq

Hoeng, gvaq sauh he, mehcawjdieg baijok caet lwg mageq, daiq song fag cungqsa, lij miz caxhung nangxraez daengj, daeuj gaeb Gungh Vwnzfangh. Vunzmbanj cungj vih Gungh Vwnzfangh yousim, hoeng de cix heuh gyoengqvunz cuengqsim.

Ngoenzhaenx, Gungh Vwnzfangh aemq aen rumrin he, bae gyangnaz gip saenaz. Gvaq yaep he, mbong mageq daeuj lo, gyoengqde raen boux vunz neix gig geizheih, cungj nyinhnaeuz de dwg vunzbag, cungj homh gvaqbae yawj nauhyied. Gungh Vwnz- fangh gig mizlaex camnaeuz：“Gak boux hakyez, sou daeuj neix guh gijmaz?”“Daeuj gaeb Gungh Vwnz- fangh!”Mageq dasang ndaengndiengq naeuz. “Gungh Vwnzfangh yak lai bw, gij cungq neix ndaej me?” Gungh Vwnzfangh cang guh doeksaet naeuz. Miz boux mageq gaem cungq he yaengx daengz naj Gungh Vwnzfangh naeuz：“Neix dwg huq ndei bw, aeu diet guekrog cauhbaenz, mwngz rox maz!” Gungh Vwnzfangh ciengj fag cungq gvaq- daeuj, aeu mehfwngz caeuq lwgfwngzyinx baez naenx, ganjcungq deng naenx benj lo, de caiq euj mbat ndeu, ganjcungq goz lumj fag gung nei, doeklaeng, de youh vut fag cungq bae, naeuz：“Gijmaz naengdiet guekrog, gou yawj dwg naengdiet naeuh.”Mbong vunzvaih cungj deng hag doeksaet liux, ndwn youq haenx da hung daengx da iq. Gungh Vwnzfangh swnh gyoengqde fatmoengh seiz, ciengj gvaq fag cungq wnq, youh lumj haxbaenh baez naenx baez euj baez vut. Mbong mageq hainduj roxsingj gvaqdaeuj lo, ngamq siengj doengh fwngz, Gungh Vwnzfangh dawz aen rumrin bau ok ciengh baj gyae, youh ciengj gvaq diuz nangxraez he naeuz：“Gou baek diuz nangx neix roengz namh bae, sou byawz yut ndaej ok couh gvaqdaeuj.” Diuz nangxraez baek roengz laj namh song cik lai laeg, Gungh Vwnzfangh youh ndwn youq henz, mbong mageq neix yienghlawz yut ndaej ning? Gungh Vwnzfangh yungh mehga baez geb baez rag diuz nangxraez gvaqdaeuj， yienzhaeuh gaem youq gyangfwngz, naeuz：“Gou couhdwg Gungh Vwnz- fangh, byawz mbouj lau dai couh gvaqdaeuj.”

Yawj daengz gizneix, mbong mageq deng hag dwk cadi nyouh conh, engq mbouj yungh gangj bae gaeb Gungh Vwnzfangh lo. Gyoengqde gipmuengz buet bae ndawsingz, gya lauz gya meiq dawz Gungh Vwnzfangh gangj ndaej ak gvaq bouxsien bae, mehcawjdieg dingq le hix hag dwk caiq mbouj gamj baij vunz bae gaeb Gungh Vwnzfangh lo.

（2 sat）