Gyoengqvunz youq lajdeih,

Miz boux ndei boux yak,

Mingh ndei riugakgak,

Mingh yak cag cug hoz.

Guh bouxvunz hwnjdaeuj,

Yawj raeuz dwg maz mingh,

Seng daeuj mbwn cawqdingh,

Saenzlingz mbouj ndaej gaij.

Lajmbwn faen mbouj bingz,

Mbangj mingh ndei dangqmaz,

Mbangj boux doiq gvanbaz,

Bae reihnaz doxgaen.

Beij haeuj laeng gou daeuj,

Gou ndang saeuj ndang saenz,

Haq deng ranz mbouj baenz,

Dangq rin daenz gwnz dungx.

Ngamq haq vuenh diegmbanj,

Seiq gak ranz cungj haenh,

Naeuz gou guh hong baenz,

Faen ngaenz mbouj luenh yungh.

Goyez gou cix dij,

Mboujmiz gijmaz you,

Swiq vanj faeg byaek mou,

Mbouj yungh gou bae guh.

Mbat miz lwg miz lan,

Cienz ranz cungj luenh caez,

Mbouj gangj naeuz doxgyaez,

Faex raez lap dingj gyaeuj.

Caen doxceng doxdaeuq,

Cungj youq mbouj cingsaenz,

Vihliux ceng cienzngaenz,

Guh baenzbaenz mbouj dwg.

Mbat haeujma daengz ranz,

Faexhanz doq roq gyaeuj,

Gou siengj buet okdaeuj,

Gaem fouj boenq baihlaeng.

Aeu ndaej song boux bawx,

Guh lawz naeuz mbouj ndei,

Raeuz gwed gvak gwed gei,

Caiq gwn heiq fuz fanh.

Bawxlaux ngeiz bawxngeih,

Cungj ngeiz faen mbouj bingz,

Hawj daegngeih lai lingh,

Bae yienhsingz cawx ranz.

Mwngz guenj hawj daegngeih,

Caiq ndaej cawx ranz moq,

Bawxlaux guenj mbouj goq,

Goj bae lajroq ninz.

Faenh raeuz guh vunzlaux,

Cungj lau lwg mbouj miz,

Dajhong giz dem giz,

Caiq ciq ngaenz aeu hawj.

Daeglaux caeuq daegngeih,

Gou sim ngeix doxdoengz,

Hung nyaeq mbouj bae loeng,

Ngaenz doxdoengz faen hawj.

Bawxlaux cix boemz gu,

Mboenjgyu bawxngeih ndek,

Ceng dwk ranz yaek dek,

Mbei meh dek liux caez.

Raen bawxlaux doxceng,

Bawxngeih nyengq ndang daeuj,

Gou ndang saenz ndang saeuj,

Mbouj ndaej naeuz saek coenz.

Bawxlaux dinfwngz hwnj,

Coh mbwn cuengq sing hemq,

Daengx mbanj vunz daeuj demq

(yawj),

Naj dou remj(saetlaex) yaek dai.

Bawxngeih cix mbouj fug,

Bek dinfwngz mbouj dingz,

Naeuz cungj naeuz mbouj dingq,

Ceng daengz hingz cij youq.

Song boux bawx doxceng,

Cax raeh deng rin genq,

Bouxboux cix bak geng,

Daj haet ceng daengz haemh.

Gvan hix gvan mbouj baenz,

Raek raem mboujmiz yungh,

Ma rug ninz gutgungq,

Dangq nya’nyungq diengz mou.

Daengq gak boux simjbaj,

Daihgya geiq ndawsim,

Lwgbawx dij dangq gim,

Caezsim caux gyadangq.

Dawz vanj cuengq haeuj ringj,

Nanzmienx dingqnyi sing,

Simjsauj caez doengzsim,

Ciengim cawx mbouj ndaej.

Beixnuengx dem simjsauj,

Yaek gauj ndei donzgez,

Caez hauqgingq bohmeh,

Ce hawj daihlaeng hag.

Simjsauj raeuz doxndei,

Seiqseiz cungj vuenheij,

Mboujmiz gijmaz heiq,

Bi seiqgeiq fatcaiz.