7 nyied 4 hauh, aen cietdaznuj Majsanh Yen Lijdangh Yauzcuz Yangh youq Lijdangh Segih Mbanjlahmwnh haimuq. Vunzlai gak minzcuz ndaw yienh caeuq hekyouz gak dieg foenfoen daeuj neix guhcaemz, camgya hozdung hunghoengh daegbied neix, daejniemh yienghndei minzsug cienzdoengj Mbanjyauz caeuq vwnzva ndei Yauzcuz.

Ngoenzde, vunzlai dieg de aeu foux- faexsaux、fouxgyongnyag、fouxsaeceij daengj bae coux bouxhek gak dieg. Doengh aen doih vwnzyi gak mbanj（segih）ndaw yangh biujyienj le gij cezmuz lumjbaenz 《Angqhoh Cietdaznuj》《Mbaw Siengq Cienz Ranz Cunghvaz》《Minzcuz Doxgiet Ndei》 daengj, gyoengqde caez haenh aendangj、guekcoj、seizdaih moq、ndwenngoenz ndei, yienh’ok gak minzcuz vwnzva daih yungzhab、minzcuz daih doxgiet. Hozdung lij doxdax hatmax guh bouxak、coemj gaeq、gaemh bya daengj youzyenz hozdung, caiq baijgai huqdoj gaiqfeih, gwn laeujbakranz daengj, hawj vunzlai gak minzcuz caenndang daejniemh gij vwnzva saedceij Mbanjyauz.

(窦大全/Dou Dacenz)