Gaenh geij bi neix, Lozcwngz Mulaujcuz Swciyen Vangzginh Cin aeu couqmaenh gij eiqsik caezcaemh Cunghvaz Minzcuz guh sienqmeh, doidoengh vunzlai gak minzcuz youq vwnzva、ginghci、 aen biengz daengj haeujlaeg doxyungz, mboujduenh gyamaenh gij cingzcik minzcuz dox- giet baenaj.

Aen cin neix haeujsim aeu dangjgen dazyinx, baengh “sam hoih it goq、cawjdaez ngoenzdangj” daengj bae daengz lajmbanj lwnhgangj gij cwngcwz minzcuz dangj. Bineix doxdaeuj, gungh miz 3000 lai boux dangjyenz ganbu camgya, coicaenh dangjyenz ganbu engq rox guh hong minzcuz, vunzlai engq haengj guh hong minzcuz doxgiet.

Aen cin neix haeujsim aeu canjnieb fouq minz, lai aeu cwngcwz bangrex, guh ndei canjnieb baijbouh. Bineix lai ndaem oijcaqdangz, ndaem le 8599 moux oijcaqdangz; roengz- rengz hwngfat gij canjnieb yenz- caizliu lozswhfwnj caeuq canjnieb raet, ndaem le 408.7 moux faex- cukmaz、330.02 moux duhseiq, gij raet baenzgwn gungh canj le 85.03 dun；gungganq canjnieb moq, ndaem le 10231 gonengznuengx bae ciengx nonsei.

Aen cin neix haeujsim aeu vwnzva nyinh simvunz, youq cietheiq cienzdoengj guh hozdung lai cungj lai yiengh, hawj vunzlai daejniemh yienghndei Cunghvaz vwnzva. Cin de caemhcaiq hwnqguh ndei “gaiqdap vwnzva doengzsim”, hawj vunzlai gak minzcuz engq gaenjmaed doxgiet, doxcaez okrengz coicaenh aen biengz mwnhoengh hwngfat.

（黄 丽/Vangz Li）