Gaenriengz baenz raq baenz raq sing bekfwngz caeuq gij sing aenvih gamjdoengh daejsebseb, denyingj 《Mwngz Ndei, Lij Vanyingh》cuengqingj sat lo. Bouxyawj ndwn hwnjdaeuj foenfoen byaij ok denyingjyen bae. Hoeng gou cix naengh youq gwnz eij naemj cien yiengh fanh loh, sim hix riengz denyingj mbin dauq gaxgonq lo.

Baez daih’it bungz daengz“hauq”cih saw neix, dwg youq siujyoz hwnj goq nyinh saw. Lij geiq ndaej ngoenzhaenx lauxsae gig nyinhcaen, baez bit baez vet youq gwnz hwzbanj sij cih saw neix ——“hauq”.

“Gyoengq doengzhag, hauqswnh dwg gij conzdungj ndei Cunghvaz Minzcuz, raeuz bouxboux cungj aeu hag rox hauqgingq bohmeh bw! Mbouj dandan dwg geiqmaenh cih saw neix couh ndaej lo. ” Lauxsae yienghneix gangj, ndaw da de daiq miz deqmuengh. Gou lij dwg lwgnyez mbouj rox cih saw neix, roengzdangz le gou ciuqyiengh lumj baezgonq nei, mbouj dawz gij vah lauxsae haeuj sim saekdi, hix mbouj caengz guh gvaq gij saeh hauqgingq bohmeh.

Baez daihngeih bungz daengz “hauq”cih saw neix, dwg youq cuhcungh dangz gyoebhab hagsib goq ndeu. “Hauqgingq couh youq seizneix” ——Neix dwg gij vah seizhaenx lauxsae sij youq gwnz hwzbanj.

Youq dangz goq haenx, lauxsae gangj le haujlai goj gvendaengz hauqswnh hawj dou, caemhcaiq cingj geij boux doengzhag hwnj daiz bae raemhgangj. Gou ndwn youq gwnz daiz, coenz caiq coenz gangj gij goj cien bak bi gaxgonq gvendaengz hauqswnh haenx, ndaw sim caemh deng mboujduenh ningdoengh, aen yaemcih doeklaeng gangj sat, gou lumjbaenz rox le hauqswnh gig youqgaenj. Yienghneix, gou hainduj cawx gak cungj gak yiengh huqlaex iq hawj bohmeh, daeuj naeuz faenh hauqsim gou.

Baez daihsam bungz daengz “hauq”, dwg youq gwnz aen densi cezmuz ndeu. Geiqndaej cezmuz sat seiz, riengz gij singgo 《Ciengz Ma Ranz Yawjyawj》gij singgo doenghcingz haenx, bouxcujciz menhmenh naeuz:“Hauqswnh, cix mbouj dwg soengq geijlai huqlaex dijbauj hawj bohmeh, buenxbangh、daejliengh caemh dwg cungj hauqdauh ndeu……”

Gij sing bouxcujciz dwg baenzneix caensim, gou hainduj dauqngeix ——Gij bohmeh siengj aeu haenx, lauheiq mbouj dwg gij huqlaex gou soengq haenx, cix dwg genjgenj danhdanh buenxbangh.

“Fat gijmaz ngawh? Byaij lo.” Sing coi daxboh daetgat gij naemjngeix gou, gou ngiengx gyaeuj hwnjdaeuj, raen ndaw yingjdingh hunghung de cij lw gou caeuq bohmeh lo.

“Daxboh daxmeh, ngoenzcog gou buenx sou okbae guhcaemz ngoenz ndeu ba!”Gou dwen naeuz. Lauheiq dwg doeksaet, bohmeh dingq le cungj ngawh liux, gaenlaeng couh loh ok najriu, gou yawj ndaej ok, haenx dwg daj ndaw sim fat okdaeuj.

Gij doxgaiq bohmeh siengj aeu haenx, lauheiq mbouj dandan dwg huqlaex……

(Ciengj Hozlingz raiz Loeg Haijdaek hoiz / 作者：蒋何灵 翻译：陆海德)