Daizvanh dwg diegguek Cungguek,

Siengj dawz muekdieg Daizvanh deuz,

Couhdwg beu sienqhoengz guek raeuz,

Mboujguenj lawz naeuz cungj fanjci!

Daizvanh dwg diegguek Cungguek,

Caeuxlaeng ma daengz rungj guekcoj,

Vunz raeuz gangj vah cungj suenqsoq,

Byawz caeuq mwngz luenh boq luenh gangj?

Bouxdaeuz Meijgoz——Beilozsih,

Mbouj dingq gienq i’gyaeuh ndonj Daiz,

Cienz seiqgyaiq doiq de biq myaiz,

Guek raeuz hai cingdan fanjci.

Beilozsih ndonj fangj Daizvanh,

Couhdwg famh cawjgienz guek raeuz,

Daengx guek lwgminz bouxboux naeuq,

Bouxbing raeuz sujdauj ginhyenj.

Baez gangj ginhyenj vunzvaih lau,

Ruz vunzvaih couh deuz gyae’gyangq,

“Daizduz” cacaemj ra vunz bang,

Ndaw sim mbouj angq caenh naiqnuk.

Guekrog bangcoengh guek raeuz lai,

Caezcaemh hai bak biuj laebciengz,

Boux yakrwix cungj mbouj gamj eng,

Aenbak deng fung saenzdedded.

Bouxbing raeuz sujdauj ginhyenj,

“Daizduz” genga saenz nanzyawj,

Yaep he bienqbaenz ndaek vunz ngawh,

Gwnhaeux gaem dawh hix mbouj baenz.

Gwnhaeux gaem dawh hix mbouj baenz,

Saenz ndaej vaiqvaiq gaijbak gangj,

Songhenz doxhuz lwgminz angq,

Caen dwg rox cang gangj vahndei.

Dangj raeuz gyaez doxhuz doxyouq,

Hoeng hix mbouj ngaem gyaeuj guh vunz,

Dalu、 Daizvanh dwg vunzcaen,

Daengzseiz caen haeuj rungj daxmeh!

Dalu、 Daizvanh dwg ranz ndeu,

Byawz dawz Daizvanh beuj okbae,

Daengzseiz byajbag de dai bae,

Caemhcaiq seigyaeuj ra mbouj raen!

Danhnyienh “Daizduz” dingq dangj vah,

Dawz sim daiqma ranzmeh raeuz,

Gaej yungh hwnzngoenz caeuq meh daeuq,

Mboujnex daengz seiz nyaeuq(gaemh) haeuj gam!

Gij guekgya seiqlig fanjvaz,

Dauqdingq ndaemhau ra saeh guh,

Baenzlawz haep ndaej laemx guekcoj?

Heuh de ienqhoij cienfanh daih!

Seiz mbouj seiz iet fwngz iet ga,

Laebluenh fatvah guh saeh vaih,

Cien youq lajbiengz cauh huxhaih,

Neix dwg ra dai hawj vunz yawj!

Vih swhgeij ndei hoenx guek iq,

Laihnaeuz swhgeij miz rengz ak,

Cijaeu swhgeij baez hai bak,

Doengh gij mageq gag daeuj gaen?

Demgya yaenq ngaenz “gvej coenggep”,

Aeu gij cungqbauq ep guek iq,

Guh hingz dauqdaeuj riu’ii,

Hix miz guek iq mbouj ngaem gyaeuj!

Aeu “songbiu” luenh gangj yaeuh vunz,

Yaengx hwnj cicaiz faexgyaengh daeuj,

Ngoengqngwtngwt buet daeuj haep raeuz,

Laihnaeuz raeuz lij dwg gaxgonq!

Hai ruz okdaeuj danq ndangnoh,

Itloh luenh roemx naeuz de ak,

Byawz rox mbouj nanz couh gag fak,

Caencingq doiqnaj bak bienq ngoemx.

Guek raeuz mbouj gwn dauq ngeix mwngz,

Doiqnaj couh wng doengz bingz yawj,

Gamj roemx haeujdaeuj dingh gaemhdawz,

Byawz heuh mwngz ngawzngoek luenh guh!

Vahlaux gangj：Vunz guh mbwn yawj,

Guh caeg sim haw ndoj mbouj gvaq,

Seiqgyaiq lwgminz miz lwgda,

Daengzseiz deng gaj mwngz gaej gvaiq!

Ranz mwngz gij saeh mbouj guh ndei,

Guek mwngz seizneix vunz simnyap,

Yaepyet mbouj re deng vunz gab,

Lwgminz nyapnyuk mwngz luenh guh!

Lajbiengz huzndei gyoengqvunz maij,

Cien caux huxhaih vunz biq myaiz,

Henhoh huzbingz vunz soengq ngaih,

Ndwenngoenz cwxcaih gyoengqvunz muengh.

Guh gij saeh sieng mbwn haih leix,

Gij vunz seiqgyaiq bouxboux haemz,

Saedlig mbouj hung caengz gamj daemj,

Cungjmiz saekseiz hoenxlaemx bae!

Raeuz guh ndei it rangh it loh,

Doxgap caez canh ndaej simvunz,

Mboujguenj baenzlawz hix daeuj gaen,

Coengh vunz hwnghoengh mbwngeq rox!

Simnyaen Meijgoz gyoengqvunz rox,

Saehvaih guh doh ndaw lajbiengz,

Loenghvaih guek iq dawz bauj ciengj,

“Gingjcaz seiqgyaiq” engqgya vaih.

Gij vunz lajbiengz lwgda loengh,

Byawz ndei byawz yak cungj rox caez,

Byawz roengz simdoeg de gag geiq,

Daengzseiz sienh yak cungj miz bauq.

Aen minghyinh caezcaemh vunzloih,

Daengx biengz gak guek cungj miz ik,

Haujlai guek naeuz miz gyaqcig,

Cungj giglig daeuj gaen raeuz byaij.

Daeuj capfwngz neicwng guek raeuz,

Guek raeuz cungjcig boiz daengz laj,

Vunzvaih “luenh gangj” guek wnq ndaq,

Guek raeuz ra ndaej banhfap ceih.

Lai aen bouhmonz caemh fat sing,

Hawj Meijgoz dingq rox gij vah,

Ginhyenj humx Daiz cingqciengzvaq,

Haeplau vunzvaih gen ga saenz.

Yungh ndei gij gozci yizlun,

Ndaej baengzyoux buenx gaen raeuz byaij,

Doiq seiqlig fanjvaz cicaiz,

Habdangq dawz “Meijcaij” ndek bae.

Faenmbek guekcoj dwg loqmoengh,

Mbouj ndaej simvunz cungj mbouj hingz,

Guek raeuz hwngfat mbwn cawjdingh,

Daekmax lanz ci mingh lij lw?

Aen ci lizsij baefafa,

Daizvanh dingh ma rungj daxmeh,

Neix dwg mbwngeq gaenq dingh he,

Byawz nyig mbwngeq mingh nanz bauj!

Cunghvaz Minzcuz caez haenqguh,

Guekcoj saedyienh yendaiva,

Daengzseiz vunzvaih lau deng gaj,

Daizvanh dauqma raeuz angqyangz!