Ciengj Gaisiz mbouj ei,Seizseiz naemj gauj luenh,Cungzging yaeuh damzbuenq,Yaek maeuzsuenq duzcaiz（独裁）.Gwnzmbwn lij laepdik,Byaj gwq mig gwq raez,Damzbuenq bae mbouj bae,Bouh geiz caen hoj byaij.Miz vunz gienq mbouj bae,Gaej gwnvei dangqnaj,Ndaek Ciengj aiq guh gyaj,Dawz cax yo raeblaeng.Bouxdaeuz raeuz mbeifag,Fangzyak goj mbouj lau,Cungzging gyuem mokhau,Cungj mbouj lau mbouj yiep.Dajdingh dwg cang gumz,Caemh caij gwnz sawq ndomq,Dajdingh dwg cang hongx,Hix aeu bongh gvaqbae.Vunz lwnh naeuz miz guk,Cix cang nuk mbouj nyi,Baebak dai dangq viz,Mbouj lau miz yungyiemj.Baih de saj yaemmaeuz,Baih raeuz gangj cingqheiq,Mokhau cw diegdeih,Diemheiq lij dwgrengz.

Caez ceng bak ceng heuj,Doxeuq ngoenz doek ngoenz,Yied gyaux raemx yied hoemz,Yied byaij roen yied lingq.2. Cungguek Aeu MinzcujBued mok bued mbouj deuz,Hoj ep meuz gwn meiq,Rox geijlai capheiq,Ceng gienzleih lwgminz.Cungzging cwnghezvei,Yienznaeuz ndaej hai baenz,Hai va mbouj dawz aen,Doeklaeng cix loenq liux.Mbungqmbaj ngah ciuz va,Marwix ngah gwn haex,Laux Ciengj maij caux saeh,Yaek dam leih aeu gienz.Gungcanjdangj mbouj haengj,Ceng bingzdaengj swyouz,Coh gwnzbiengz hemq naeuz,Cungguek aeu minzcuj.Duzma caeuq duzmeuz,Hoj caemh diuz hongh youq,Song duz guk doxcaeuq,Ceizcaeux miz daisieng.（26）