Laj cieng, gou daiq daeglwg dauqbae ranzcoj lajmbanj sauqranz, moix bi daengz cieng cungj aeu guh daih baetsauq. Binaengz daxmeh lij youq, moix bi daengz seizneix, cungj dwg daxmeh sauqranz, aenranz baihndaw baihrog, gungxgwnz gungxlaj, baet ndaej saw caez, nem vacueng, vuenh daeuh lozyieng, uet saw ndaw ranz sojmiz doxgaiq, hawj gij doxgaiq ndaej gvaq cieng caez.

Youq gwnz gvih laj mbaeklae miz aen daeng meizyouz ndeu, vit ndaej haujlai nanz lo, gwnz daeng miz haujlai moekmoenq、rongzgyau. Gou gig siujsim dawz hwnjdaeuj, uet saw le. Aen daeng neix miz cib lai goengfaen sang, hung lumj fajfwngz, gyaeuj daeng dwg aeu diet daeuj guh, dungx daeng dwg gingq guh, gyaeuj daeng cap miz aen caudaeng ndeu, yungh daeuj dangj rumz. Diuz muenzdaeng lij youq ndaw daeng, youzdaeng mboujmiz lo, hoeng lij num ndaej miz gij feihdauh meizyouz.

Daeglwg cam gou: Daxmeh, aen neix dwg gijmaz ne? Gou naeuz: Neix dwg aen “huqciuhgeq” laeng raeuz. Aen daeng meizyouz neix youq laeng gou gaenq ndaej geijcib bi lo, hix mbouj rox daxboh youq mwhlawz daj gizlawz cawx daeuj, ndaejgeiq daj gou lij iq couh raen miz aen daeng neix lo. Mwhhaenx youq ranzgeq, mboujmiz dienh, daengz haemh mbwn laep le, daxmeh couh diemj aen daeng meizyouz neix, daengrongh monmu, ciuq rongh ndaw ranz geij bingzfueng mij. Daxmeh youq henz saeuq cauj byaek muengz dwg baenqcienq, laj giengz feiz dawzyubyub, feih sui byaek homfwtfwt.

Daengz haemh youq laj daeng, gou yawj daxmeh dazfaiq. Daxmeh daj ndaw daehnizlungz raix ok gij faiqnoh. “Bineix gij faiq baenz raixcaix, mwngz yawj, baenz aen baenz aen youh laux youh raez, gip daengz baihnaj, baihlaeng youh dek lo, haetngaiz ndeu gou couh gip ndaej song daeh lo.” Daxmeh doq dazfaiq doq naeuz.

Aen loek dazfaiq neix dwg daxboh gag aeu faex daeuj do, geij diuz faex miz song yienghfwngz gvangq, ding baenz aen loek ndeu, congh cingqgyang miz diuz sug ndeu an miz gaiq genngauz, baenq hwnjdaeuj yiengj gokgak gokgak.

Aen daeng monmu lai lo, daxmeh dawz gaiq ciemfaex baez dit gaiq muenzdaeng, aen daeng yaepyet rongh saw hwnjdaeuj, ciuq ndaej ndaw ranz ronghsagsag. Diuz muenzdaeng diemj liux lo, daxmeh youh aeu baengzfaiq daeuj laenh diuz moq, niuj aen gyaeuj daeng okdaeuj, yumj diuz muenzdaeng haeuj ndaw youz bae, dawz diuz muenzdaeng cin haeuj aen gyaeujdaeng bae. Gvet naed feiz ndeu, diemj aen daeng dawz lo.

Gou youq henz aeu fwngz mbaet naedfaiq ok- daeuj, ce haeuj aen daeh bangxhenz bae, louz hawj daxmeh daengz bimoq aeu bae ndaem. Gij faiq hausaksak, daxmeh aeu mbangj ndeu daeuj dazfaiq daemj baenz baengz, aeu daeuj guh buh guh haiz, mbangj ndeu aeu daeuj guh moeg. Boux canghgungfaiq moix bi daengz ndwenlab, couh cing duz lawz ndeu, doz gij doxgaiq gungfaiq haeuj mbanj daeuj gungfaiq guh moeg.

Daxmeh miz di baklai, gyangngoenz muengz hong baihrog, daengz haemh lij diemjdaeng guh hongranz, doq guhhong doq mboen. Yaek daengz cieng lo, daxmeh youh aeu daemjrok, lij aeu hawj geij beixnuengx nyib buhvaq moq, cumh haeux- faengx……Gij daengrongh raeujrub ciuq youq gwnz naj daxmeh, swnzswngq youh yiemzrwd, lumj souj dangzsei yienghneix baijcingq, gij daengrongh diuqdoengh lumj singgo ityiengh unqswnh.

Daxboh couh mbaet lai lo, mboetgyaeuj mboetrwz guhhong, muengz dwk mbouj daengx. De youq laj daengrongh san ndoengj、rongzgaeq、rongzbit、gyoi gij doxgaiq neix, fwngz mbouj dingz gvaq.

Gyanghaemh gou guh liux gij sienqranz, couh aeu aen daengq sang ndaw ranz daeuj baij youq henz daeng doegsaw raizsaw. Gijmaz sawlwgnyez、sawcuenh、daj baihrog gip daeuj、gij bauqceij sawgaeuq cungj aeu daeuj doeg caez.

Baihrog rumz boqfifi, rumz daj conghcueng、luengqdou ci haeuj ndaw ranz daeuj, boq hawj aen daengrongh biuyebyeb, rumz laux di aen daeng couh ndaep lo.

Aen daengrongh ciuq ok gij ngaeuz daengx ranz vunz youq gwnz ciengz, miz sang miz daemq, miz hwnj miz roengz, vunz cak ngaeuz caemh cak, vunz byaij ngaeuz hix byaij, lumj yienj ciengz heiq lwgngaeuz nei, heiq lwgngaeuz yienj ciengz dem ciengz, bohmeh gou geq le, gou hix majlaux lo, aen daeng meizyouz neix buenx gou byaij gvaq mwhlwgnyez.

Doeklaeng, ndaw mbanj doeng dienh le, aen daeng meizyouz couh cuengqce gungxranz de, gvaq ndaej ndwenngoenz le, deng moekmoenq lo. Aen daengrongh lumj naed duh ndeu, fatok gij byaifeiz saekndeng unqswnh haenx, dauqfanj lumj gwnz- mbwn ndaundeiq nei ronghmyabmyab.

Daxmeh mbouj youq lo, aen ranz hoengq- vangvang, gou yawj daengz aen daeng meizyouz gaem youq gyang fwngz uet ndaej seuqsak neix, gou roxnyinh youq gwnz daeng meizyouz neix lumj lijmiz dohraeuj daxmeh caeuq gij luzfwngz de. Geij lai bi gvaqdaeuj, siengj daengz gij ndaejgeiq iqet neix, daeglwg dangyienz dwg mbouj rox ne. De daj mwh seng okdaeuj, couh miz dendwngh ronghyadyad lo, youq ndaw hawsingz moix diuz gai cungj miz daeng ronghyubyad, daeng rongh daengz haetlaeng. Lohdaeng ronghsag, ciuq rongh moix boux vunz byaij roen. Hoeng daxmeh, couh lumj aen daeng meizyouz neix rongh youq ndaw sim gou.