Mbatneix hagdangz nienzgaep cujciz le biujyienj heiqgobwnj, aen cuj dou yaek biujyienj《Haj Naed Duh Ndaw Faek Duh Ndeu》，gou yienj dah lwgsau ndeu. Ndaw goj miz duenh cingzcez yienghneix: Dah lwgsau ndeu baenz ciengz bingh naek ndeu, gaenq mbouj miz maz maqmuengh lix roengzbae lo, sawqmwh miz ngoenz ndeu, naed duh ndeu mbin daengz gwnz cuengdaiz, did ngaz、hai va, hawj de yawjraen le gij maqmuengh sengmingh. Gou couh yienj dah lwgsau haenx. Hoeng gou cix doiq daxmeh gangj:“Gou mbouj siengj yienj aen giek haenx!”“Vih gijmaz?” Daxmeh doeksaet yawjyawj gou, “aenvih baezgonq yienj duz iucing ndokhau, gyoengqde cungj heuh gou iucing ndokhau, baezneix, gou lau gyoengqde ndaq gou miz bingh!” Daxmeh siengjsiengj, rag gou haeuj fuengz naeuz:“Gaej haeujeiq gij gangjfap bouxwnq baenzlai, yawj, raeuz seizneix mbouj dwg ndei dangqmaz ha! Caemhcaiq cit heiqgobwnj neix doeklaeng bienqbaenz gienh saeh angqyangz ndeu, yunghsim bae yienj ba!” Gou sijsaeq baez siengj, doeklaeng lijdwg gietdingh yienj cit heiqgobwnj neix.

Baizlienh mbouj swnhleih geijlai. Aenvih dou mbouj sug gij neiyungz daizswz, seiz mbouj seiz lumz daizswz cix boux yawj boux, mizseiz lij nyoegnyoeg bouxwnq saeqsing daezsingj:“Gawq laj dwg mwngz gangj.” Hoeng doiqfueng cungjdwg giendingh gangj:“Mbouj dwg gou!” Mizseiz, gvaq saek song faen cung cij caenx ok gawq ndeu, roxnaeuz cungj moengzluenh liux. Lauxsae doiq gij biujyienj dou mbouj muenxeiq geijlai, gou hix hainduj heiqlau singhgiz laeng biujyienj seiz, miz doengzhag aenvih lumz daizswz cix mwnhsaeng- saeng gyaengj youq gwnz vujdaiz.

Gig vaiq couh daengz seiz cingqsik biujyienj lo, gou youh angqfwng youh gaenjcieng. Lwnz daengz cuj dou biujyienj lo, gyoengq doengzdoih yienj ndaej lij suenq swnhleih, daengz gou le, sim gou fwt diuqbubbub hwnjdaeuj, caeklaiq mbouj lumz saek gawq daizswz, mboujgvaq, seiz gou biujyienj, laj daiz cix miz di yaenglwnh, mizmbangj vunz lij singsaeq riu lo, gyoengqde lwnh maz? Riu maz? Gou biujyienj mbouj ndei ha? Gyaeuj gou ciemhciemh hanh conh lo, gij vwndiz ndawsim aen daeb aen, caj daengz biujyienj sat le, gou byaij roengz vujdaiz, roxnyinh lumj gvaq aen sigij ndeu nei raezrangrang.

Ma daengz ranz, gou dawz sam aen vwndiz lwnh hawj daxmeh dingq, daxmeh han gou naeuz: “Gyoengqde dwg lwnh mwngz gizlawz yienj ndaej ndei, gyoengqde riu dwg aenvih gyoengqde haengj gij biujyienj mwngz, mwngz wnggai sim’angq, loenghriu vunzlai hix dwg cungj baenzgoeng mbouj doengz ndeu ha!” Gou dingq le, lumj naemj doeng gijmaz ngaekngaek gyaeuj.

Mbat biujyienj heiqgobwnj neix, hawj gou soundaej le baenzgoeng mbouj doengz .

(Gyangh Cijhanz / raiz Nungz Cinfung / hoiz)