Boux vunz ndeu maij gienh saeh ndeu, couh haeujmaez. Mwh iq, gou maez yawj dung’vaben, daxmeh heuh gou guh boux maez dung’va; gou maij dwk geizciengh、veizgiz, daxboh heuh gou guh boux maez geiz; gou maez guhcaemz, dahcej heuh gou guh boux maez guhcaemz……Gizsaed, haeuj ndaw gienh saeh ndeu bae caemhcaiq haeujmaez dwg cungj mbouj ndei ndeu, gou gingciengz deng bouxlaux naeuz. Hoeng doeklaeng, gou maez yawj saw, cix ndaej daxboh haenh lo!

Bi’gvaq sujgyaj, daxboh cawx ndaej dauq 《Aen Seiqgyaiq Bingzciengz》. Mwh ngamq cawx dauq haenx, gou geizheih bae fan geij yieb, siengj: Sam bonj saw nanwd neix, byawz ndaej hozraez bae doeg liux ha? Couh yienghneix, gou couh coq gij saw dauq gwnz gyaqsaw bae. Doeklaeng, gou raen daxboh moix haemh baez miz hoengq couh dawz saw daeuj yawj, gou hozhumz nyaeknyaek, bonj saw neix dauqdaej miz gijmaz ndei yawj ne?

Gou roxnyinh geizheih lai, hix aeu saw daeuj yawj hwnjdaeuj. Aiqnaeuz doeg hwnjdaeuj miz di dwgrengz, hoeng gij ginglig vunz caeuq gojgaeq ndaw saw yinx gou dangqmaz. Mbouj rox mbouj nyinh couh daengz banringzgvaq, daxmeh baez dem baez coi gou gwn haeux, hoeng gou caeux couh maez youq ndaw saw haenx mbouj miz banhfap okdaeuj, cijmiz baez dem baez naeuz: “Ndaej lo ndaej lo, caj gou yawj liux duenh neix gonq!” Caj daengz gou haeuj daiz gwn haeux, gij haeux byaek yienzbonj ndatfofo haenx gaenq gyoet liux. Gou hix mbouj dawz haeujsim saekdi, vueng- vueng vatvat gwn haeux liux, ganjmuengz dawz saw daeuj doeg roengzbae.

Mbouj gvaq geij ngoenz, gou couh rubrub rabrab yawj liux sam bonj saw nanwd haenx lo. Neix dwg gou baez daih’it yawj bonjsaw na baenzneix, ndawde gojgaeq lwnh vang lwnh raeh、gangj vunz lairaeuh, gou yawj ndaej moengjmoengj doengjdoengj. Gou roxnyinh mbouj gvaqyinx, nyaenx mbouj ndaej youh daj goek yawj hwnjdaeuj. Daxboh yawj gou haeujmaez baenzneix, couh gienq gou haeujsim yietnaiq, guh yenj- baujgencauh, roxnaeuz okbae guhcaemz yaep ndeu, cuengqsoeng lwgda. Daengzlaeng saedcaih mbouj miz banhfap, de cix yo saw bae.

Gvaq aen haggeiz ndeu le, miz aen couhmoz ndeu, gou loeklak youq gungx gyaqsaw raen gij saw haenx. Gou caegcaeg bae yawj lo, deng daxboh raen liux, gou naeuz baez daih’it yawj caengz rox, hawj gou caiq yawj baez doeksat dem, daxboh cijndaej doengzeiq lo. Caemhcaiq, vihliux hawj gou yawj rox, daxboh bang gou swnh lohriz gojgaeq, gangj gij saeh gaijgwz hailangh、bau canj daengz hoh daengj caeuq gojgaeq mizgven haenx hawj gou rox. Ciep dwk, daxboh youh cawx dauq bonj 《Banhaet Daj Banringzgvaq Hainduj》 ndeu, hawj gou rox gij ginggvaq sij bonj saw haenx. Doeklaeng, daxboh lij doigawj 《Lozdoz Siengzswj》 《Bouxgeq Caeuq Haij》 《Lix》 《Nya Faex Ndaw Biengz》 hawj gou.

Baenz boux sawmaez ndeu, gig angqyangz! Yawj saw ndaej coi cingsaenz vunz baenaj, hawj gou nyinhrox engq lai engq gvangq.

Yienzlaiz, “maez” miz ndei miz vaih. Doiq gij ndei haeujmaez, ndaej hawj raeuz gaenxmaenx baenaj, beijlumj yawj saw ndaej hawj raeuz yawj gyae rox lai, dwkgeiz、dwkgiuz doengh gaiq neix ndaej leih uk、leih ndangdaej.

Nyezrauh nyeziq itdingh aeu dingq lauxsae caeuq bohmeh son, dingj youq mbouj ndaej hawj swhgeij deng gij saeh rwix yaeuhlox, raeuz itdingh mbouj maez youq ndawde. Doiq gij ndei “maez”, raeuz yaek haeujsim seizgan, yingjyangj hagsib aeu mbouj ndaej bw.

（Cangh Fungyui/ raiz Veiz Yinyiz / hoiz）