Vanzgubai hengzmanz,Caux “Vanjnanz Saehbienq”,Sinhswginh deng suenq,Saehgienh saenq daengx biengz.“Gijmaz ceiq ienvuengj,Suenq mbat saeh gyanghnanz,Gag doxdwk ndawranz,Cax doxcamz doxgaj”.Vunz ndi hangz haeuj dou,Gou ndi moeb bouxwnq,Vunz heifouh ndaej gaenj,Gaemz heiq ndwnj mbouj roengz.Vanzgubai daeuj famh,Nyoegnyamx dieggoek raeuz,Vunz hangz haeuj bakdou,Bik raeuz bae doxbuek.Laezcim doiq laezcim,Mwngz ning gou hix doengh,Yaek hoenx daengh mwngz hoenx,Mbwn doemq byawz lau byawz.Dienhfaenz(电文) hawj Lauxciengj,Biengj caensiengq yaemmaeuz,De lau mingzsing haeu,Mieng naeuz “mbouj caiq dwk”.

6. Soemh Fwnrumz BaenajGoeng’ak Bungz Dwzvaiz,Gamj buekdai hoenxciengq,Bak aen donz ligliengh,Daengx sienq cungj ndaej hingz.Vih hoenxciemq ndaej swnh,Yizbwnj “baet” dieg laeng,Bazlu de ceiq caengz,Yaek cawz gaen cawz goek.Rub vunz cix gaj vunz,Bungz ranz diemj feiz coemh,Raen doihduz cix coemj,Moklaep goemq diegbiengz.Cungguek Gungcanjdangj,Okdaeuz dangj fwnrumz,Heuh raeuz daengx guek vunz,Soemh fwnrumz baenaj.Sanhdungh guh deihloiz(dileiz地雷),Cang gemhndoi gyangloh,Bingraq byaij daeuj coh,Byonghloh deng caq dai.Hozbwz vet deihgoengq,Gyoengqvunz ndoj ndeindei,Bingraq haeuj mbanj bae,Daihgya caez dwkhoenx.

（23）