“Gou hix siengj aeu aen soujgih he, couh lumj yiengh soujgih Laujlij dawz nei, youh lengj youh miznaj.” Daxboh lumj lwgnyez namnyoem- nyoem. Neix dwg daxboh baenz bingh le baez daih’it gangj de yaek aeu maz.“O, daengngoenz daj baihsae okdaeuj lo.” Daeg’iq yaep lwgda roxnyinh caen geizheih, aen naj guh gveij- gvaiq riuhoho naeuz:“Mwngz bouxgeq aeu dingq canghyw gangj, boiqhab gyoengqde guh genjcaz gwn yw, dou couh sikhaek cawx soujgih hawj mwngz.”

“Gwn mbouj baenz gwn, ninz mbouj baenz ninz, lumj duzfangz hwnj ndang nei, ngoenz daengz haemh ngeixngwkngwk, couh rox dawz soujgih guhcaemz. Miz saek ngoenz lwgda sou mengz couh yaek daej hix mbouj miz raemxda lo.”

“Guhcaemz ndaej maz, cungj lumz daengz gyaeuj laeng caez, yiengh maz cungj mbouj siengj guh, baenz maz vunz lwi?” Gaxgonq, daxboh baez yawjraen lwgnyez ndawranz dawz soujgih daeuj guhcaemz hwnj maez, haemz haeuj sim haeuj ndok bae, vih gij saeh lwglan maez soujgih neix, mbouj rox fathuj hat dou geijlai baez, liuh mbouj daengz baezneix de gingqyienz mbouj lumj gaxgonq lo, lai baez coi dou vaiq di cawx soujgih hawj de yungh, mboujnex couh fatheiq.

Soujgih gig vaiq couh cawx dauqma lo, aen soujgih daxboh yienghsiengq lumj gaemz cien seiq- fueng, angen youh gig hung, gij cih yawj ndaej cingcuj, caen fuengbienh bouxgeq dava haenx yungh. Aenvih daxboh rwz miz di nuk, gou daeg- daengq bang de diuz sing daengz ceiq hung bae, moix baez miz denva daeuj, gij sing yiengj goksadsad, youq aen ranz youh raez youh gaeb yiengj dangqmaz, youq gizgyae hix ndaej nyi.

Daxboh gag yungh soujgih dwg baez daih’it, doiq de daeuj gangj dwg saehmoq, de hag ndaej gig yunghsim, lij nanz mbouj nanz cam gou yiengh- neix yienghde, lumj laeq lwgnyez yienghyiengh cungj roxnyinh geizheih nei.

Daxboh yungh gij fwngz youh raez youh byom dawz aen soujgih yawj bae yawj dauq, loengh gwnz loengh laj, simhai dangqmaz, lij dawz haeuj henz rwz dingq gij sing yiengj, aen naj nyaeuq de sikhaek hai lumj duj va nei, riu ndaej bak hai daengz goekrwz lo.

Raen daxboh guhcaemz gvaq- yinx, gou youh son de baenzlawz yungh soujgih ingjsiengq, dingq fwen luzyinh. Bohlwg youq itheij doq son doq gangjriu.

“Gaca gaca”, gou ingj gij siengq daxboh angqvauvau riunyumnyum mbauq ndei yo youq soujgih.

Aen soujgih daxboh yawj hwnjdaeuj dojdatdat, lumj ndaek rin gwnz bo nei naeknwknwk, hoeng dawz youq fwngz miz faenhliengh, mbouj miz gyaj, couh lumj daxboh boux vunz nei lauxsaed baknaek, ciuhvunz mbouj miz vunzgviq bang gvaq.

Soujgih daxboh lumj gij doxgaiq gaeuqgeq nei naekcaem, dou mbouj miz bouxlawz yawj hwnj da, bouxboux cungj riuhaha dawz daeuj guh vah- douz, seiz mbouj seiz yungh soujgih daeuj gangj sam gangj seiq, yiemz de goengnaengz noix, hwnj vangj guh- caemz gazngwkngwk, mbouj gvaqyinx. Daxboh mboujguenj dou naeuz maz, ciuq dawz aen soujgih guh “bauj- boiq”, gingciengz mo daeh dawz okdaeuj youq dangqnaj daxmeh caeuq baengzyoux yienjbaij, moix ngoenz gyanghaet ninz roxnaeuz gyanghaemh yaek ninz seiz cungj ra aen soujgih de youq hengz ndang cij cuengqsim, lij daezsingj dou bang de cung dienh rim bae.

Daxboh mbat bingh couhdwg geij bi. Vihliux hawj daxboh haisim ndang cangq, gou gingciengz hawj daxboh doekgyad naengh youq gwnz daengq roxnaeuz ninz youq gwnz mbonq swiq din roxnaeuz yunghrengz anqmo ga biz de, doq yungh aen soujgih cuengq yinhyoz hawj daxboh dingq.

Daxboh dingqnyi gij go geiq sug le, lumjnaeuz ndang bingh de cawz liux, sikhaek bienq ndaej ansim youh vuenheij. Doeklaeng, daxboh ngoenz beij ngoenz bingh naek, makda de mbouj rox seizlawz couh menhmenh yawj mbouj raen lo. Yienghneix daxboh engqgya ingbaengh soujgih lo. Moix baez miz denva dwk gvaqdaeuj, de cungj muengzfwfwt yaek ciep, danghnaeuz dawz hawj de menh le, de couh mboujguenj baenzlawz hat ndaej bouxvunz gyaeuj in naj nding bae.

Aenvih hong nyaengq, geij beixnuengx dou mbouj ndaej seizseiz buenx youq henzndang daxboh, soujgih bouxgeq bienqbaenz baengz- youx daxboh liz mbouj hai lo. Boux vunz byaij daengz gizlawz, soujgih couh youq gizlawz. Buenx daxboh byaij gvaq gij saedceij mbwqfwtfwt, hawj daxboh daiq daeuj vaiqvued caeuq ligliengh gig lai.

Doeklaeng, daxboh bingh naek haeuj yihyen bae ciengjgouq, soujgih de couh hawj dou bang baujguenj, de roxnyinh gij saedceij swhgeij mbouj lai lo, youq yihyen ngamq aen lai singhgiz, de couh song ngoenz sam ngoenz heuhvetvet, nauh dauqma ranz, dou euq mbouj gvaq de, couh ciep de dauqma ranz lo.

Daxboh ngoenz yaek byaij seiz, de yunghrengz cak daiz aen ndangdaej hwnj, hawj dou dawz gij heiqyangj gwnz ndaeng bak caeuq gak cungj guenj rangh youq gwnz ndang de cienzbouh bueg okdaeuj. Daxboh saihoz rouxlulu baenz haujlai nanz, cij gangj ndaej ok sing iq “docih” he, couh caiq gangj mbouj ok saek coenz vah. Daxboh faj fwngz saenzdetdet dawz aen soujgih de siujsim yetyet dwk roengz fwngz gou daeuj, couh ansim laep da lizhai lo, louz gij simcieg lailai hawj gyoengqdou, hawj dou sim’in yaek dai yaek lix.

Vih daxboh guh “ngoenz daih- caet” banhaemh ngoenzde, gou yawj- raen aen soujgih daxboh, couh siengj daengz gij mbawsiengq daxboh riunyumnyum, nyaenx mbouj ndaej rubluh aen soujgih daxboh yawj bae yawj dauq. Youq ndaw soujgih daxboh, gou yawjraen mbawsiengq daxboh ninz youq gwnz mbonq ranzbingh, aen ndang de youh byom youh goz, gou siengj daengz gij maijndiep daxboh, sim’in gikdoengh dangqmaz, fwngz baez saenz, aijraij mbaenq deng soujgih angen, yaepyet couh dingqnyi gij sing daxboh youh geq youh menh haenx:“Lan iq Cici、Leilei, sou aeu dingq vah bohmeh, roengzrengz hagsib, mbouj ndaej dawz soujgih guhcaemz, caemz lailai haih swhgeij.”

Daxboh youh yungh Vahgun daengq dou geij beixnuengx:“Lwg ha, beixnuengx aeu doxbang dox- baengh, boux miz ngaenz mbouj ndaej yawjsiuj boux haemzhoj, caemhdoih gvaq ndei saedceij. Meh mwngz……” Doeklaeng, daxboh youh yungh vah- doj daengq daxmeh mbouj ndaej guh hong baeg lai, ndeindei goq ndang……

Neix dwg vahdaengq daxboh youq de sengmingh yaek liux seiz louz hawj dou, gou dingqnyi sim’in dangqmaz, raemxda laeroekroek……