Vunz naeuz dienbingz dwg dieg geizheih gwnz Byacwx. Minzgoz bi daihseiq《Vujmingz Yenci》yienghneix geiq naeuz:“Gwnz bya dieg bingz miz benq rinbingz ndeu, bet ndaek doen rin, saet aen cauq rin, mbouj hwnj ngawhrin, mbouj miz namhfaenx, bangxhenz gocaz faexgeq mwncup, gijneix couhdwg hawsien.” Gwnz Byacwx dienbingz miz benq gvangq, caemh miz benq gaeb, baihgwnz hwnj nywj heuswdswd, benq ceiq gvangq miz bak betcib lai moux. Dienbingz bangxhenz hwnj faex iq, mbouj miz faex hung, cij hwnj nywj hwnj em, gag gapbaenz benq nywj mwnswtswt ndeu. Cienznaeuz gwnz dienbingz ciengzseiz miz bouxsien daeuj dox- comz, gyoengqde dwk geiz、foux giemq、ndaek gimz、eu fwen、ndumq laeuj、gwn caz…… Byawz hwnj bya bae roeb gyoengqde, couh ndaej fukheiq youh ndaej souhgyaeu.

Cienznaeuz seizgonq laj din bya miz daeg mbauq ndeu, de ngamq ndaej cibbet bi, ciengzseiz hwnj bya bae raemj liu. De loq raen haeuj dienbingz aen gungdienh, fan yawj bonj bouh- mingh bouxsien gwnz daiz, raen gwnz bonj sij gij coh de, ndaej lix cibgouj bi ndwi, de doq doeksaet yat. Ciuq bonj bouhmingh sij de caiq gvaq bi ndeu couh deng dai lo! Yienznaeuz dwg aen loq ndeu, hoeng de ngoenznaengz simndum. Miz ngoenz ndeu, de hwnj bya raemj liu roeb goeng geq ndeu, de lwnh gij simnyap hawj goenggeq nyi, cam goenggeq miz mbouj miz maz banhfap bae gaijmingh, hawj de lai ndaej lix geij bi. Goenggeq yawj naj de le, naeuz de simsoh, wnggai ndaej souhgyaeu, caiq son de dawz byaek dawz laeuj daengz gwnz dienbingz bae, youq gizde raen song goeng sien dwk geiz couh cingj songde gwn, de ndwn bangxhenz raix laeuj. De ciuq goenggeq gangj de guh. Ngoenzhaenx, de riuj byaek laeuj hwnj dienbingz, raen song goeng sien naengh youq henz daizrin dwk geiz, goeng sien ndeu naengh daizrin baihbaek, goeng sien ndeu naengh daizrin baihnamz. De youq henz daizrin baij byaek baij laeuj iu song goeng sien gwn, songde doq dwk geiz doq gwn laeuj, gij yinxdaeuz dwk geiz hawj songde lumj henz ndang miz vunz. Baez yaepda gvaq byongh- ngoenz, song goeng sien cij cam de miz maz saeh, de couh gangj gij laizyouz hawj songde. Yienzlaiz, goeng sien naengh daizrin baihbaek guenj bouxvunz ngoenzseng, goeng sien naengh daizrin baihnamz guenj boux- vunz ngoenzdai. Goeng sien naengh daizrin baihbaek naeuz:“Bouxvunz ngoenzseng gaenq dwg mingh dingh, mbouj ndaej gaij lo.” Goeng sien naengh daizrin baihnamz dawz bonj bouhmingh okdaeuj fan yawj, doq gaij gij minghgyaeu baenz goujcib bi.

Caiq miz cienznaeuz, lajdin Byacwx ndaw mbanj miz song daeg hauxseng, gyanghaet benz hwnj dien- bingz bae gip raet, roeb song goeng sien dwk geiz, song daeg hauxseng couh ndwn baihhenz yawj. Gyang- ngoenz ngeng gvaq baihsae lo, song goeng sien buenz geiz caengz dwk sat, song daeg hauxseng couh roengz bya ma ranz. Dauq daengz ndaw mbanj baez yawj, ranz hung ranz iq luengq mbanj cungj bienq liux, vunzlaux lwgnyez mbouj miz saek boux roxnaj song daeg de, lwnh daengz gij coh gyoengqdoih caeuq gyoengq lwgnyez, vunzmbanj naeuz gyoengqde gaenq dai geij cib bi lo. Baenzlawz bungq cungj saeh neix ne? Yienzlaiz, song daeg de youq gwnz dienbingz yawj song goeng sien dwk geiz, buenx bouxsien henz ndang gvaq ngoenz ndeu, dangq vunzbiengz gvaq bak bi. Song daeg hauxseng dauq hwnj dienbingz bae, gvaqlaeng couh bienq- baenz bouxsien lo. Gij gojgaeq geizheih neix gaenq cienz geij bak bi, seizneix gyoengqvunz ngoenznaengz vanzlij hwnj dienbingz baij laeuj siu yieng baiq bouxsien, gouz bouxsien hawj fukheiq hawj souhgyaeu.

Lajdin Byacwx miz haujlai hawfwen. Gwnz hawfwen gyoengq canghfwen eu gij fwen, gij fwen miz fwen eu yiengzgan, caemh miz fwen eu yaemgan. Yienghneix couh cienznaeuz miz hawfangz Loegvet, youq laj din Byacwx Luzvaz、Lozboh、Maxdaeuz gizde. Vahcuengh Loegvet caeuq Lozyez gij yaem doxdoengz, gyoengq cien’gya vwnzva minzcuz nyinhnaeuz, Loegvet couhdwg Lozyez. Cienznaeuz vunz dai le gij hoenz yaek ma diegcoj Loegvet(Lozyez), gyanghwnz rog ndoi diegmoh raen miz dujduj feiz rongh, couhdwg gyoengq fangz riuj daeng- loengz bae ganj hawfangz. Hawfangz Loegvet miz cib diuz giuzdoengz, cibngeih aen gungdienh, caet aen miuh, vanzlij miz Mboqlumzcingz, bouxvunz baez gwn gij raemxmboq couh lumz gij cingz yiengzgan. Vunz dai le ginggvaq goengdauh、saegoeng guh fap yinx roen, cij ndaej ma daengz diegcoj hawfangz Loegvet, duzfangz ngamq ma yaek gwn gij raemx Mboqlumzcingz gonq, gek liux gij cingzyenz yiengzgan, caiq byaij gvaq cib diuz giuzdoengz, baiq cibngeih aen gungdienh, cij ndaej daengz hawfangz onjyouq.

Mboqlumzcingz dwg gyoengq- vunz cienznaeuz, roxnaeuz lajbiengz caen miz aen mboq neix ne? Gyoengq cien’gya vwnzva minzcuz diucaz, Lozboh Mbanjfunglinz miz congh mboq ndeu heuhguh Mboqnamzcau, gij eiqsei couhdwg Mboqdaivuengz. Congh mboq neix raemx daj gexlaeg riuz okdaeuj, hwnzngoenz raemx riuz mbouj dingz, raemx sawywenywen. Cienznaeuz congh mboq neix miz fangz, gyanghwnz vunzmbanj bae rap raemx ndaejnyi ndaw mboq gyoengq fangz ndaek gimz, lau ndaej doq cienq ndang saet deuz. Cinghciuz Daugvangh seiz Swhaen Fuj goeng hakfouh Lij Yencangh roxnyinh gij saeh neix miz yinxdaeuz, gaij gij coh aen mboq neix baenz Mboq- ndaekgimz, sij saw dik youq gwnz rin henz mboq. Gyoengq cien’gya vwnzva minzcuz nyinhnaeuz, aen mboq neix caeuq cienznaeuz aen Mboqlumzcingz doxlumj, caen gyaj lij deq roengz goengfou guh diucaz yenzgiu cij rox cingcuj lo.

Gijneix couhdwg gij cienznaeuz Byacwx lo, mwngz yawj liux roxnyinh geizheih lwi?

（2 sat）