Byacwx(Byadamingz) dwg goengq bya ceiq sang ndeu dieg baihnamz Gvangjsih. Cinghciuz Ganghhih bi daih ngeihcib haj bonj《Dacingh Itdungj Ci》geiq naeuz:“Byacwx youq baihsae Sanglinz Yen seiqcib lai leix, caeuq Swh’wnh Fuj Vujyenz Yen (bi 1912 cij gaij guh Vujmingz Yen) gapgyaiq, megbya doxlienz ngutvan faex heuswdswd, cungqgan miz haj goengq byasoem sang doemx fwj, gwnzde miz raengz, laeg mbouj rox rau.” Mingzdaih Gvanglu youq bonj《Yezcuz》sij naeuz:“Byacwx ciengz- seiz fat ok gij rongh geizheih, lumj diemj labcuk lienz baij geij leix gyae, aenvih yienghneix couh heuh- guh Byadamingz.” Gwnz Byacwx goengq byasoem heuhguh Byagyaeuj- lungz, sang cien caetbak roekcib mij, daj laj dinbya ngiengx gyaeuj yawj roxnyinh dingj bya sang daemx fwj, laj bya lingqlangq youh laeg, mizseiz gexlueg mokfoenfoen, ndaej dingqnyi gij sing geizheih, gwnz bya gij fwj fan bae fan dauq, ciengzseiz raen lumj gij “baed rongh” diegsien.

Beksingq cienznaeuz, seizgonq lajdin Byacwx miz boux mehmaiq ndeu, de souciengx duz ngwz rieng gyud ndeu, vunzmbanj heuh duzngwz guh Gaeggud. Gvaqlaeng Gaeggud bienqbaenz duzlungz hung ndeu, hen diuz Dahcuhgyangh, ndigah boux mehmaiq souciengx de gyoengqvunz couh heuhguh Mehlungz. Mehlungz ngoenz liggaeuq sam nyied cosam dai, Gaeggud cangq de youq Byacwx goengq byasoem ceiq sang, yiengh- neix gyoengqvunz couh heuh goengq byasoem neix guh Byagyaeujlungz. Gwnzmbwn goeng Nyawhdaeq rox Gaeggud baenzneix hauq meh- ciengx, gig gamjdoengh, hawj Gaeg- gud moix bi ngoenz sam nyied cosam ma Byacawx sauq moh baiq Mehlungz. Gyoengqvunz baiqfug Mehlungz dem Gaeggud, moix bi sam nyied cosam ciuq gwnz ndang duzlungz hoengz、bieg、henj、aeuj、ndaem haj cungj saek, cimq haj cungj saek haeuxcid bae naengj, yungh haeuxnaengj haj- saek baiq Mehlungz caeuq Gaeggud. Baiq sat Mehlungz dem Gaeggud le couh doxcomz diuz Dahliu song hamq lajdin Byacawx, hwnzngoenz eu fwen. Cungj gvenqciengz neix bi cienz bi, gig vaiq couh cienz daengz Mbanj- cuengh gak dieg, caiq itcig daihdaih ciepswnj roengzdaeuj. Seizneix Sam Nyied Sam Bouxcuengh hawfwen Vujmingz, couhdwg daj gijneix ginggvaq cien bi ciepswnj roengz- daeuj lo.

Gwnz Byacwx miz bet benq diegbingz hwnj nywj, gyoengqvunz heuhguh Dienbingz, baij youq gwnz Bwzveiz Gveihsen, cienznaeuz dwg dieg hawfangz, gyoengq sien daj gwnzmbwn roengzdaeuj neix doxcomz eu fwen diuq foux. Minzgoz bi daih- seiq《Vujmingz Yenci》geiq naeuz:“Byacwx lienzdaemh sam bak lai leix, Vujyenz Yen baihdoengbaek gazngaih, daj Hawyiengz daengz Mahdaeuz gak mbanj, cungj youq laj dinbya de, byasoem ceiq sang heuhguh Mohyez, liz gyae yawj sam goengq byasoem sang daengz mbwn, benz hwnj gwnz dingjbya, ngaem gyaeuj yawj gyoengq byasoem goengq doek goengq lumjbaenz bienq ndaej daemqdetdet.”

Goengq byasoem sang daihngeih Byacwx heuhguh Byayawjbing. Seiz- gonq cienznaeuz vunz benz hwnj gwnz dingjbya, danghnaeuz sing hung hemq, sikhaek miz fwj mbin daeuj humx, geij cik gaenh couh yawj mbouj raen ngaeuz ndang lo. Seizneix gwnz dingjbya ciengzseiz yaep ndeu mbwn ronghsagsag mbouj raen saek duj fwj, yaep ndeu fwj daeuj gienjfoenfoen, baez yaepda doq goeb goengq bya liux, iet fwngz cungj yawj mbouj raen haj lwgfwngz. Gyoengqvunz cienznaeuz, seizgonq Bouxcuengh gyoengq ciengq ndwn youq gwnz dingj Byayawjbing ceijbaij bouxbing baenzlawz hoenx- ciengq, laj bya bet benq diegbingz, gizsaed dwg gij dieg hoenxciengq, cien bing fanh max youq gizde hoenx bae hoenx dauq. Seizneix daj gwnz dingjbya yawj roengzbae, bet benq diegbingz lumj gaenh youq laj da, baihhenz ndoeng mwncupcup lumj gyoengq bingmax deq goengdaeuz fat minghlingh. Rumz cifofo, ndoeng fanfoedfoed, hawj vunz roxnyinh lumj mbawgeiz nyig rumz mbinyagyag, max sae bing hemq, hauh gyong lumj byajraez yiengjrumrum. Caiq miz vunz cienznaeuz, Sungcauz gyoengq bing nungzminz gijyi goengdaeuz Nungz Cigauh、Cingciuz goeng Bingzsihvangz Huz Sanhgvei、Daibingz Denzgoz goeng Yivangz Siz Dazgaih, caemh daiq gyoengq bingmax daeuj neix capyouq lienh bing gvaq.

（1）