2. Ciengj Gaisiz Deng GaemhFwj goenjgeuj gwnzmbwn,Lajbiengz vunz souh nanh,Bing Yizbwnj haeuj mbanj,Haeuj gyawz famh daengz gyawz.Cungguek Gungcanjdangj,Bueklanh dingj byairumz,Doxgiet gak loih vunz,Hoenx hwnj gwnz roengz laj.Hungzginh dangh Vangzhoz,Hwnj gwnzbo Sanjsih,Cungj mbouj goq dailix,Dingjhoenx vih guekgya.Laux Ciengj diuh bingdoih,Cungq doiq Sanj-Ganh-Ningz,Cangh Yangz mbouj nyaenxsim,Capbing mbouj bae dwk.Laux Ciengj mbouj cuengqsim,Mbin bae daengz Sih’anh,Bae coi dwk Gungdangj,Bangx sangj cimh baihlaeng.Hengz ndei rox bienq ak,Hengz yak cix mbouj baenz,Byaij gizrongh vunz gaen,Byaij gungx vunz mbouj cimh.Yozliengz nem Hujcwngz,Cungj gienqlaengz laux Ciengj,“Goz-Gung dingz hoenxciengq,Song mbiengj hab doxhuz”.Gienq sam youh gienq seiq,Gienq ndaej bak cix haemz,Gangj nyaenx lai mbouj baenz,Haemz daengz daep daengz saej.Humx dwk Vazcinghciz,Ciengj Gaisiz deng gaemh,Aen mbwn fwt bienq daemq,Hingzseiq gaenj dangqmaz.Ndaw gozminz cwngfuj,Doxceng guh ndaekdaeuz,Feihgih cang siuhaeu,Naeuz yaek caq Sih’anh.

Cunghgung daibyaujdonz,Cienmonz bae damzbuenq,Vih mbouj hawj guek luenh,Nyienghbouh yaeng hozbingz.Goz-Gung dingz hoenxciengq,Bakcungq cienq rogdou,Diegguek nyaenxlai gyaeu,Gyoengqraeuz caez henhoh.3. Mbouj Hawj Yizbwnj HaMbouj geij ngoenz anningz,Rumzyak dingz youh hwnj,Luzgouhgyauz saeh gaenj,Yizbwnj bauq dwk raeuz.Cingzgvang gig gaenjgip,Feiz haenq bik haeuj ndoeng,Rumz geuj hwnj geuj roengz,Seiqlengq hoenzsiu hwnj.（20）